"އަހަރެންނަކީ ހެންވޭރު މީހެއް، އެކަމަކު ވޯޓުލާން މި ޖެހެނީ ގަލޮޅަށް،"
ލޯކަލް ކައުންސިލް އިންތިހާބުގައި މާލެ ސަރަހައްދުގައި މިއަދު ވޯޓުލާންޖެހޭ ދާއިރާއާ މެދު އުފެދިފައިވާ އޮޅުންބޮޅުމަށް އިޝާރާތްކޮށް އެކަކު ބުންޏެވެ.
މި ފަހަރުގެ ކައުންސިލް އިންތިހާބަށް ލާމަރުކަޒީ ގާނޫނަށް ގެނެސްފައިވާ އިސްލާހާ އެކު، އިލެކްޝަންސް ކޮމިޝަން (އީސީ)އިން މާލޭގެ ދާއިރާތައް ބެހި އިރު މާލޭގެ ހަ ދާއިރާ އޮތީ އޮޅުންބޮޅުން ބޮޑުވެފަ އެވެ. މިހެން ހެދުމުން ގަލޮޅުގެ މީހުން ހެންވޭރަށް އަދި މާފަންނު މީހުން މައްޗަންގޮޅިއަށް ވެސް ވޯޓުލާން ޖެހެ އެވެ.
މި ބަދަލު ގެނައުމާ އެކު މާލޭގެ ބައެއް މީހުން ނުރުހުންފާޅުކުރި އެވެ. އެކަމަކު މިއީ ހައްލު ހޯދަން އުނދަގޫ ކަމެއް ކަަމަށް އިލެކްޝަންސުން ވަނީ ބުނެފަ އެވެ.
އީސީން އޭރު ބުނެފައިވަނީ، އެކަން ކޮށްފައިވަނީ އެންމެ އިންސާފުވެރިކަމާއެކު، ރަނގަޅަށް ކަމަށެވެ.
ނަމަވެސް، މިއަދު ވޯޓުލާން ނުކުންނައިރު، ޒަމާނުއްސުރެ ވޯޓުލަމުން އައި ދާއިރާ ވަނީ ބަދަލުވުމުން ބައެއް މީހުން ހިތްހަމަނުޖެހޭ ގޮތްވީ އެވެ.
މި އޮޅުން އަރަން މެދުވެރިވީ، ގާނޫނަށް ގެނައި އިސްލާހުގައި ސިޓީގައި ރަޖިސްޓަރީ ކުރެވިފައިވާ އާބާދީ 60،000 އަށް ވުރެ އިތުރު ނަމަ، 18 އިންތިހާބީ ދާއިރާ ކަނޑައަޅަންވާނެ ކަމަށް ހިމެނުމުންނެވެ.
މޭޔަރާ އެކު މާލެ އަށް މި އިންތިހާބުގައި 18 ކައުންސިލަރުން ހޮވަންޖެހޭއިރު، ކައުންސިލަރުން ނިސްބަތްކުރާނެ 18 ދާއިރާއަކަށް މީހުން ބެހީ، ބައެއް ދާއިރާތަކަށް ދެ އަވަށުގެ މީހުން އެއްކޮށްލައިގެންނެވެ.
އެހެން ހެދުމުން، ބައެއް މީހުން ދެ ދާއިރާއަކަށްވެސް ނިސްބަތްވެ އެވެ.
މާލެ 18 ދާއިރާ އަށް ބަހާލާފައިވާ ގޮތް.
މާލޭގެ ދާއިރާތައް މަސްހުނިވެ، ޒަމާނުއްސުރެ އޮތް އަވަށްތަކުގެ ސަގާފަތް މި ބަދަލާއެކު ގެއްލިގެން ގޮސްފައިވާކަމީ ގިނަ ބައެއްގެ ޝަކުވާ އެވެ.
އިލެކްޝަނުން ބުނަމުންދަނީ، މާލޭގެ ދާއިރާތައް ބަހާފައިވަނީ ސިޔާސީ ޕާޓީތަކާއި ރައްޔިތުންގެ މަޖިލީހުގެ އިތުރުން އާއްމުންގެ ހިޔާލު ހޯދައިގެން ކަމަށެވެ.
ނަމަވެސް، މާލޭ ސަރަހައްދުގައި މިއަދު 51،000 އަށް ވުރެ ގިނަ މީހުންނަށް ވޯޓުލެވޭއިރު، މި ބަދަލު ގެނައިކަން ނޭނގޭ ގިނަ ބަޔަކު އެބަ ތިއްބެވެ.
ވޯޓުލާންޖެހޭ ފޮށި ޔަގީންކުރާނެގޮތް. ގްރެފިކްސް: އަހުމަދު އިހްސާނު/އަދަދު
ކުރިން ބޭއްވި އިންތިހާބުތަކުގައި ޒަމާނުއްސުރެ ވޯޓު ލަމުން އައި މަރުކަޒާއި، ދާއިރާވެސް ބަދަލުވެފައި އޮތުމަކީ އެކަށީގެންވާ ކަމެކެވެ.
ވޯޓުލާން ދިޔުމުގެ ކުރިން، އެކަން ޔަގީންކޮށްލަންޖެހެ އެވެ. ކުރިން ހެންވޭރަށް ވޯޓުލީ މީހަކު، މިއަދު ގަލޮޅަށް ވޯޓުލާން ޖެހިދާނެ އެވެ.
