މާދަމާ ބާއްވާ ލޯކަލް ކައުންސިލްތަކުގެ އިންތިހާބުގައި ހަރަކާތްތެރިވުމަށް ތ. ވިލުފުށިން ހަމަޖެއްސި އޮފިޝަލުން ތަކެއް ކަރަންޓީން ވުމުގެ ސަބަބުން މާލޭން އެ ރަށަށް އޮފިޝަލުން ފޮނުވަން އިލެކްޝަންސް ކޮމިޝަން (އީސީ) އިން ނިންމައިފި އެވެ.
އީސީގެ ރައީސް އަހުމަދު ޝަރީފް މިރޭ ކުރި ޓްވީޓެއްގައި ވިދާޅުވީ ވިލުފުށީގައި ބަހައްޓާ ދެ ވޯޓް ފޮށީގެ ގިނަ އޮފިޝަލުންތަކެއް ކަރަންޓީން ވިއިރު އެ ރަށުން އިތުރު އޮފިޝަލުން ނުލިބުނު ކަމަށެވެ. މާލޭން އެ ރަށަށް އޮފިޝަލުން ގެންދަން ޖެހޭތީ އެ ރަށުގައި ވޯޓްލުން ފެށޭނީ އެ އޮފިޝަލުންނަށް އެ ރަށަށް ދެވުމުން ކަމަށް ވެސް ޝަރީފް ވިދާޅުވި އެވެ.
އެހެންކަމުން ވިލިފުށީގައި ވޯޓްލާން ފެށޭނެ ސީދާ ވަގުތެއް އަދި ނޭނގެ އެވެ.
މ. ރަތްމަންދޫ އާއި ވ. ތިނަދޫން ވެސް އޮފިޝަލުން ނުލިބުމުން އެހެން ރަށްރަށުން އޮފިޝަލުން ގެންދަން ޖެހޭތީ އެ ދެ ރަށުގެ ވޯޓްލުން ވެސް ވަނީ މާދަމާ 7:30 އަށް ފަސްކޮށްފަ އެވެ.
އެހެން ރަށްރަށުގައި ވޯޓްލުން އޮންނާނީ ހެނދުނު 7:00 އިން ހަވީރު 5:00 އަށެވެ.
ކޮވިޑުގެ ސަބަބުން އޮފިޝަލުން ހޯދުމަށް ވަނީ ދަތިތަކާ ކުރިމަތިވެފަ އެވެ. ނަމަވެސް މާލޭން ރަށްރަށަށް އޮފިޝަލުން ފޮނުވައިގެން ނަމަވެސް ވޯޓުލުން ކުރިއަށް ގެންދާނެ ކަމަށް އީސީން ބުނެ އެވެ.
