ހުޅުމާލޭ ދެވަނަ ފިޔަވަހީގައި ބިނާކޮށްފައިވާ "ހިޔާ" ފްލެޓްތަކުގެ ކުއްޔަކީ ޑައުންޕޭމަންޓް ނުދައްކާނަމަ، މަހަކު 7،500 ރުފިޔާ ކަމަށް ސަރުކާރުން ކަނޑައަޅައިފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު މުހައްމަދު އަސްލަމް ވިދާޅުވި ގޮތުގައި، ޑައުންޕޭމަންޓާއެކު ކުއްލި ދައްކާނަމަ ކުލި ކުށަވާނެ އެވެ. އޭނާ ވިދާޅުވި ގޮތުގައި ޑައުންޕޭމަންޓަށްވާ ފައިސާ ދައްކާ މީހުންނަށް ދެ އޮޕްޝަނެއް ދޭނެ އެވެ. އެ މަޝްވަރާތައް މިހާރު ކުރިއަށްދާ ކަމަށް ވިދާޅުވި އެވެ.
އަސްލަމް ވިދާޅުވި ގޮތުގައި، 7،500 އަކީ ފްލެޓްގެ އަގާ ބަލާފައި ވަރަށް ކުޑަ އަގެކެވެ. ހިޔާ ފްލެޓްތައް އިމާރަތް ކުރުމުގެ އަގާއި ލޯނު ފައިނޭންޝަލް ހަރަދާއެކު އަސްލު ކުއްޔަކީ 11،000 ރުފިޔާ ކަމަށް ވިދާޅުވި އެވެ. އެ ބުރަ އެޗްޑީސީއިން އުފުލަން ޖެހޭނެކަން ފާހަގަ ކުރެއްވި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން އިމާރާތް ކުރި، ހިޔާ ފްލެޓްތަކުގެ އެޕާޓްމަންޓުތައް ބެހުމަށް ނަގާ ގުރުއަތުލުން މާދަމާ ފެށުމަށް ވަނީ ނިންމާފަ އެވެ. ލައިވްކޮށް ކުރިއަށް ގެންދާ ގުރުއަތުލުން ހަފުތާއަކަށް ދެމިގެންދާނެ އެވެ.
އެޗްޑީސީން ބުނެފައިވާ ގޮތުގައި، އެންމެ ފުރަތަމަ ގުރު ނަގާނީ ހާއްސަ އެހީއަށް ބޭނުންވާ މީހުންގެ ކެޓަގަރީން ކަމަށެވެ. ގުރުއަތު ނަގާނީ އެ ކެޓަގަރީއަކުން ފްލެޓް ލިބިފައިވާ މީހުންގެ އައިޑީކާޑް ނަމްބަރުގެ ތަރުތީބުންނެވެ.
ގުރު ނަގާއިރު ނެގުނު ފްލެޓާއި ފްލޯއާއި ޓަވަރު އެނގޭގޮތަށް ޓީވީ ސްކްރީނުން ދެއްކުމަށް ވަނީ ނިންމައިފަ އެވެ. އަދި އެސްއެމްއެސް މެދުވެރިކޮށް ފްލެޓްގެ ވެރި ފަރާތަށް އެ މައުލޫމާތު ދޭނެ އެވެ.
