ކޮރަޕްޝަން މުޅިން ނައްތާ ނުލެވުނު ނަމަވެސް، މި ސަރުކާރުގެ ތަފާތަކީ ކޮރަޕްޝަނަށް މަގުފަހިވާ ކަންކަން ހުއްޓުވަން ކުރަމުންދާ މަސައްކަތް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ސަރުކާރު ހިއްސާވާ ކުންފުނިތަކުގެ ޕްރޮކިއުމަންޓް ގައިޑްލައިނާއި ޖޮބް ކްލެސިފިކޭޝަން ފްރޭމް ވޯކް ނެރެން މިއަދު ހެނދުނު ބޭއްވި ހަފުލާއެއްގައި މިނިސްޓަރު އަމީރު ވަނީ ސަރުކާރުން ކޮރަޕްޝަނަށް ހުޅުވިފައިވާ ދޮރުތައް ބަންދުކުރަން ކުރަމުންދާ މަސައްކަތްތަކާ ގުޅޭ ގޮތުން ވާހަކަ ދައްކަވާފަ އެވެ.
އެގޮތުން ކޮރަޕްޝަން ހުއްޓުވަން މިހާރަށް ވުރެ އުސޫލުތައް ހަރުދަނާކޮށް، ނިޒާމުތައް ގާއިމްކުރަން މި ސަރުކާރުން މަސައްކަތް ކުރަމުން އަންނަ ކަމަށް އަމީރު ވިދާޅުވި އެވެ. އަދި އެ ބަދަލުތަކާ އެކު ކޮންމެ މީހެއްގެ މައްޗަށް ކޮރަޕްޝަންގެ ތުހުމަތު ކުރެވުނަސް އެ މައްސަލަ ބެލޭނެ ކަމަށް އޭނާ ވިދާޅުވީ އެވެ.
"މި ތަފާތުތަކާއެކު ސަރުކާރުގެ އެކި ފަންތީގެ ބޭފުޅުންނާއި ކުންފުނިތަކުގެ އެންމެ އިސް ފަރާތްތަކަށް އިނގިލި ދިއްކުރެވޭ މައްސަލަތައް ވެސް އެދަނީ ބެލެމުން،" އަމީރު ވިދާޅުވި އެވެ.
ވަގު ހިފޭނެ ޕޮލިސީތައް ގާއިމްވެގެން ދާނެ
ނިޒާމުގައި ކޮރަޕްޝަން އަށަގެންފައިވާ ވަރަށް ބަލާއިރު ކޮރަޕްޝަން ނައްތާލަން އުނދަގޫ ނަމަވެސް، އަމީރު ވިދާޅުވި ގޮތުގައި، ސަރުކާރުން މަސައްކަތް ކުރަނީ ކޮރަޕްޝަނަށް މަގުފަހިވާ ގޮތަށް ހުރި ކަންކަން ބަދަލުކުރުމަށެވެ.
މިއަދު ތައާރަފުކުރި ސަރުކާރު ކުންފުނިތަކުގެ ޕްރޮކިއުމަންޓް ގައިޑްލައިނަށް އިޝާރާތްކުރައްވާ އަމީރު ވިދާޅުވި ގޮތުގައި، އެފަދަ ޕޮލިސީތަކާއެކު "ވަގު" ހިފޭނެ މެކޭނިޒަމްތައް ގާއިމު ވެގެންދާނެ ކަމަށެވެ.
އަމީރު ވަނީ މި ހަފުލާއަށް ހާޒިރުވެ ތިއްބެވި އޮޑިޓާ ޖެނެރަލަށާއި އޭސީސީގެ ރައީސްއަށް ނިސްބަތް ކުރައްވާ، އެ ފަރާތްތަކަށް މިނިވަންކަމާއެކު ޒިންމާ އަދާކުރެވޭނެ ފުރުސަތު ތަނަވަސްކޮށްދީފައިވާނެ ކަމަށް ވިދާޅުވެފަ އެވެ.
