ވަޒީފާ ހޯދާ ފަރާތްތަކާއި ވަޒީފާ ދޭ ފަރާތްތަކަށް ހާއްސަކޮށްފައިވާ ޕޯޓަލްއަށް އާ ފީޗާސްތަކަކާ އެކު ރާއްޖޭގެ ވަޒީފާގެ ބާޒާރު ވާޗުއަލްކޮށްފި އެވެ.
އިކޮނޮމިކް މިނިސްޓްރީން މިއަދު ވަނީ ދިވެހި ބަހުން ވެސް ބޭނުންކުރެވޭ ގޮތަށް އެ ޕޯޓަލް ރީލޯންޗްކޮށްފަ އެވެ.
މިކަން އިއުލާންކުރަން އިކޮނޮމިކް މިނިސްޓްރީން ނެރުނު ބަޔާނެއްގައި ބުނީ ވަޒީފާ އިއުލާންކުރާ ހިސާބުން ފެށިގެން ގޮސް ވަޒީފާ ހަމަޖެހެންދެން ހުރިހާ މަރުހަލާއެއް އެ ޕޯޓަލް މެދުވެރިކޮށް ކުރިއަށް ގެންދެވޭނެ ކަމަށެވެ. އޭގެތެރޭގައި ވަޒީފާއަށް ޝަރުތު ހަމަވާ ފަރާތްތައް ޝޯޓްލިސްޓްކުރުމާއި އިންޓަވިއު ކުރުން ވެސް ހިމެނެ އެވެ.
އިކޮނޮމިކް މިނިސްޓްރީން ބުނިގޮތުގައި މި ބަދަލާ އެކު މިއަދުން ފެށިގެން ރާއްޖޭގެ ވަޒީފާގެ ބާޒާރު ވާޗުއަލް ކުރެވުނީ އެވެ.
ޖޮބް ސެންޓާ ޕޯޓަލް ވެބްސައިޓް ބެހިފައި ވަނީ މައިގަނޑު ތިން ބަޔަކަށެވެ. އެއީ ވަޒީފާ ހޯދާ މީހުންނަށް ހާއްސަ ޕޯޓަލް އާއި ވަޒީފާ ދޭ ފަރާތްތަކަށް ހާއްސަ ޕޯޓަލްގެ އިތުރުން ވަޒީފާތަކަށް ބޭނުންވާ ތަމްރީން ޕްރޮގްރާމްތައް ހިންގާ ފަރާތްތަކަށް ހާއްސަ ޕޯޓަލް އެވެ.
ވެބްސައިޓުގެ އާ ފީޗާތައް
- ކުރިން ވެބްސައިޓު ބޭނުން ކުރެވެނީ އިނގިރޭސި ބަހުން އެކަނި ނަމަވެސް، މިހާރު ދިވެހި ބަހުންނާއި އިނގިރޭސި ބަހުން ވެސް ބޭނުން ކުރެވޭނެ
- ނުކުޅެދުންތެރިކަން ހުންނަ މީހުން ވެސް ޕޯޓަލްގައި ރަޖިސްޓްރީ ކުރާނެ، އަދި ބައެއް ވަޒީފާތައް އެ މީހުންނަށް ހާއްސަ ކުރާނެ
- އިންޓަވިއުއަށް ކިޔައި، ޕޯޓަލްގެ ތެރެއިން އިންޓަވިއު ކުރިއަށް ގެންދާނެ
ޖޮބް ސެންޓާ ޕޯޓަލްއަކީ އިކޮނޮމިކް މިނިސްޓްރީން ދިވެހިންނަށް ވަޒީފާގެ ފުރުސަތުތައް ފަސޭހައިން ފަހިކޮށްދިނުމުގެ މަގުސަތުގައި ގާއިމްކުރި ވެބްސައިޓެކެވެ.
އެ ޕޯޓަލްގައި މިހާތަނަށް 36،734 މީހަކު ރަޖިސްޓްރީ ވެފައި ވާއިރު، ވަޒީފާދޭ 864 ވިޔަފާރިއަކުން ވަނީ ރަޖިސްޓްރީ ވެފަ އެވެ.
