ވިލިމާލޭގައި ހުންނަ ކުޑަކުދިންގެ ހިޔާގައި ކުދިންނަށް އެކަށީގެންވާ ރައްކާތެރިކަމެއް ނެތި އިހުމާލުތަކެއް ފާހަގަވެފައިވާ މައްސަލައިގައި ޖެންޑާ މިނިސްޓަރު އައިޝަތު މުހައްމަދު ދީދީއާ ސުވާލުކުރަން ރައްޔިތުންގެ މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީން ނިންމައިފި އެވެ.
ކޮމިޓީން އިއްޔެ މިގޮތަށް ނިންމީ ހިޔާއާ ގުޅޭ ގޮތުން ޗިލްޑްރަންސް އޮމްބަޑްސްޕާސަން ނިއުމަތު ޝަފީގު ފާޅުކުރެއްވި ކަންބޮޑުވުންތަކަކާ ގުޅިގެންނެވެ.
ކޮމިޓީއަށް މިނިސްޓަރު އައިޝާ އިއްޔެ ވަޑައިނުގަތް ސަބަބާ ގުޅޭ ގޮތުން މެމްބަރުން ސުވާލުކުރެއްވުމުން ކޮމިޓީގެ މުގައްރިރު ޖީހާން މަހްމޫދު ވިދާޅުވީ މިނިސްޓަރު ހުންނެވީ ޗުއްޓީއެއްގައި ކަމަށެވެ. މިނިސްޓަރުގެ ބަދަލުގައި ކޮމިޓީގައި އިއްޔެ ޖަވާބުދާރީވަޑައިގަތީ ޑެޕިއުޓީ މިނިސްޓަރު ފާތުމަތު ޔުމްނާ އެވެ.
ހިޔާގެ ހާލަތު، ނިއުމަތު ސިފަކުރެއްވި ގޮތުން އޭނާގެ އެންމެ ބޮޑު ކަންބޮޑުވުމަކީ، ހިޔާގެ ހަތަރު ފާރުގެ ތެރޭގައި ކުދިން ހަމައެކަނި "ބަންދުކޮށްފައި" ތިބުމެވެ. އަހުލާގީ ގޮތުން ކުދިން ރަނގަޅު ކުރަން އެކަށީގެންވާ މަސައްކަތެއް ނުކުރުމާއި އުނގެނުމުގެ ފުރުސަތު ނެތް ކަމަށް ވެސް ކަމަށް ވިދާޅުވި އެވެ.
ނިއުމަތުގެ ވާހަކަތަކަށް ބާރުލިބޭ ގޮތަށް ހިއުމަން ރައިޓްސް ކޮމިޝަން (އެޗްއާރުސީމް) އިން ވެސް ވަނީ ހިޔާގައި ކަންކަން ރަނގަޅު ނުވާ ކަމުގެ ކަންބޮޑުވުންފާޅުކުރައްވައިފަ އެވެ.
އެ ކޮމިޝަންގެ މެމްބަރު ޝިފާތު އަބްދުއްރައްޒާގު ވިދާޅުވީ 2008 ވަނަ އަހަރުން ފެށިގެން ހައްލުކުރަން އެދެމުން އައި ބައެއް ކަންކަމަށް އެދެވޭ ހައްލުތަކެއް އަދިވެސް ނުހޯދި އެބަހުރި ކަމަށެވެ.
އެކަމަކު ކޮމިޓީގައި ޖެންޑާ މިނިސްޓްރީން ބުނެފައި ވަނީ މައްސަލަތަަކަށް ގިނަ ހައްލުތަކެއް ހޯދުނު ކަމަށެވެ. ވިލިމާލޭގައި ހުންނަ ކުޑަކުދިންގެ ހިޔާ އާއި ފިޔަވަތީގައި ތިބި ކުދިން "އަމާން ވެއްޓަށް" ރަށްރަށަށް ބަދަލުކުރީ ވެސް އެހެންވެ ކަމަށް މިނިސްޓްރީން ބުންޏެވެ.
