ކޮވިޑް-19 އާ ދެކޮޅަށް ރާއްޖޭން ކުރަމުންގެންދާ މަސައްކަތްތަކަށް އެހީތެރިވުމުގެ ގޮތުންނާއި، ރައްކާތެރި ގޮތެއްގައި މެޑިކަލް ވޭސްޓް ނައްތާލުމުގެ މަސައްކަތް ހަރުދަނާކުރުމަށްޓަކައި ކެނެޑާ ސަރުކާރުން ރާއްޖެ އަށް 1.35 ކެނޭޑިއަން ޑޮލަރު (އެއް މިލިއަން އެމެރިކާ ޑޮލަރު) އެހީއެއް ފޯރުކޮށްދީފިއެވެ.
މި ޕްރޮޖެކްޓް އިފްތިތާހު ކުރުމަށް މިއަދު ބޭއްވި ވާޗުއަލް ރަސްމިއްޔާތުގައި ހެލްތު މިނިސްޓަރު އަހުމަދު ނަސީމު ވަނީ ކެނެޑާ ސަރުކާރު ވޯލްޑް ހެލްތު އޯގަނައިޒޭޝަން (ޑަބްލިއުއެޗްއޯ) ގުޅިގެން ދިވެހި ރައްޔިތުންނަށް ފޯރުކޮށްދެއްވާ އެހީތެރިކަން ފާހަގަ ކުރައްވާ ޝުކުރު އަދާކުރައްވައިފަ އެވެ. އަދި ސްރީ ލަންކާގައި ހުންނަވާ ކެނެޑާގެ ހައި ކޮމިޝަނަރު ޑޭވިޑް މެކިނޮން ވަނީ މި ޕްރޮޖެކްޓް ދިވެހިރާއްޖޭގައި ގާއިމު ކުރުމަށް ސަރުކާރުން ފޯރުދެއްވި އެހީތެރިކަން ފާހަގަ ކުރައްވާ މިނިސްޓަރަށް ޝުކުރުއަދާކުރައްވައިފަ އެވެ.
ކެނެޑާ ސަރުކާރާއި ޑަބްލިއުއެޗްއޯ ގުޅިގެން ރާއްޖޭގައި ގާއިމްކުރާ "ޑިސްއިންފެކްޝަން އޮފް މެޑިކަލް ވޭސްޓް" ޕްރޮޖެކްޓްގެ ދަށުން އަތޮޅު ތެރޭގެ ސިއްހީ ހިދުމަތްދޭ މަރުކަޒުތަކުގައި "މެޑިކަލް ވޭސްޓް މެނޭޖްމަންޓް" މަރުހަލާތައް ހަރުދަނާކުރުމަށް 40 އޮޓޯކްލޭވް ހޯދުމަށް ވަނީ ހަމަޖެހިފައެވެ. އަދި 10 އަތޮޅެއްގައި "މެޑިކަލް ވޭސްޓް މެނޭޖްމަންް"' ގެ ހިދުމަތްތައް ގާއިމު ކުރެވިގެންދާނެ އެވެ.
ސިއްހީ ހިދުމަތް ދިނުމަށް ބޭނުންކުރެވޭ ތަކެތި ރަނގަޅުގޮތުގައި ނައްތާލުމަކީ ކޯވިޑް-19 ފަދަ ގައިންގަޔަށް އަރާބަލިތަކުންނާއި، އެހެނިހެން ޖަރާސީމްތަކުން ރައްކާތެރިވުމަށް ވަރަށް މުހިންމު ކަމެކެވެ. މިހިދުމަތް ގާއިމު ކުރުމުގެ ސަބަބުން ސިއްހީ ހިދުމަތްދޭ މަރުކަޒުތަކުގައި މަސައްކަތްކުރާ މުވައްޒަފުންނާއި، ހިދުމަތް ހޯދާ ފަރާތްތަކަށް އިތުރު ރައްކާތެރިކަން ލިބިގެންދާނެ އެވެ.
