ޑިޒައިން އެންޑް ބިލްޑް އުސޫލުން ގއ. ކޫއްޑޫ އާއި ކ. ކަނޑުއޮތްގިރީ ގައި ބަނދަރު ހެދުމުގެ މަސައްކަތްތަކަށް ބީލަން ހުށަހެޅުމުގެ ފުރުސަތު ފިނޭންސް މިނިސްޓްރީންް ހުޅުވާލައިފި އެވެ.
މި މަޝްރޫއަކީ ދިވެހި ސަރުކާރުން ސައުދީ ފަންޑް ފޯ ޑިވެލޮޕްމަންޓް ގެ އެހީގައި ހިންގާ ޑިވެލޮޕްމަންޓް އޮފް ފިޝަރީޒް ސެކްޓާ ޕްރޮޖެކްޓް ގެ ތެރެއިން، ފިޝަރީޒް މިނިސްޓްރީ ގެ ބެލުމުގެ ދަށުން ހިންގާ މަޝްރޫއެކެވެ.
މިކަމާ ގުޅިގެން ފިނޭންސް މިނިސްޓްރީން ނެރުނު އިއުލާނުގައި ބުނީ، މި ބީލަންތަކުގައި ބައިވެރިވެވޭނީ ހަމައެކަނި ދިވެހި އަދި ސައުދީ އަރަބިއްޔާގެ ކުންފުނިތަކަށް ކަމަށެވެ.
މީގެ ތެރެއިން ދިވެހި ކުންފުނިތައް ވާންވާނީ އިންފްރާސްޓްރަކްޗާ މިނިސްޓްރީ ގެ "އިމާރާތްކުރުމުގެ ޢަމަލީ މަސައްކަތް ކުރާ ފަރާތްތަކުގެ ގަވާއިދު" ގައިވާ ގޮތުގެމަތީން ރަޖިސްޓަރީވެފައިވާ ފަރާތްތަކަށެވެ.
ފިނޭންސުން އިތުރަށް ބުނީ މި މަަސައްކަތަށް ޝަރުތުހަމަވާ ފަރާތްތައް ހޯދުމުގެ ކަންތައް ކުރާނީ އިންޓަނޭޝަނަލް ކޮމްޕެޓިޓިވް ބިޑިން އުސޫލާއި ސައުދީ ޑިވެލޮޕްމަންޓް ފަންޑުގެ އުސޫލުތަކާ އެއްގޮތްވާ ގޮތުގެ މަތިން ކަމަށެވެ.
ބީލަމާ ހުށައަޅަން ބޭނުންވާ މައުލޫމާތު މި ލިންކުން ލިބޭނެ އެވެ. އަދި އިތުރު މައުލޫމާތު ފިނޭންސް މިނިސްޓްރީގެ ވެބްސައިޓު، www.finance.gov.mv ގައި އަދާހަމަކުރެވެމުން ދާނެ އެވެ.
ބަޖެޓު ފޮތުގައިވާ މައުލޫމާތަށް ބަލާއިރު ކޫއްޑޫ އަދި ކަނޑުއޮތްގީރީގައި މިފްކޯގެ ހިދުމަތްތައް ފުޅާކުރަން މަޝްރޫއެއް ވަނީ ހިމަނާފަ އެވެ.
ނަމަވެސް މި މަޝްރޫއަށް ބަޖެޓު ކުރެވިފައިވާ ފައިސާގެ އަދަދެއް ހިމަނާފައެއް ނުވެ އެވެ.
