ދައްކަން މިއުޅެނީ ވިޔަ އަކުރުތަކުގެ ވާހަކައެއް ނޫނެވެ. އޮންލައިން ނޫހެއްގެ ގޮތުގައި "އަދަދުޑޮޓްކޮމް" ނެރުމުގެ ވާހަކަ އެވެ. މިކަންވުމުގެ މައިގަނޑު ސަބަބަކީ "އިތުރު ވިސްނުމަކުން" ނޫސްވެރިކަން ކުރަން އެދޭ ބަޔަކު އެކުވުމެވެ. މިކަން މިގޮތަށް ވުމަށް މެދުވެރިވި ސަބަބުތަކާއި ހާލަތްތައް އެބަހުއްޓެވެ. ނަމަވެސް އެ ހުރިހާ ތަފުސީލުތަކަށް މިވަގުތު ދިއުން މުނާސަބެއް ނޫނެވެ.
އަދަދު ހަގީގަތަކަށް ވެގެންދިޔަކަމަށްޓަކައި މާތް ﷲ ހަޒުރަތަށް ޝުކުރުކުރަމެވެ. ރެޔާއި ދުވާލު މަސައްކަތްކުރަމުން އަންނަ އަދަދުގެ ޓީމަށް އައްސަރިބަހާއި ސާބަސް ހައްގެވެ. އަދި މިކަން ވުމުގައި އެހީތެރިވެދިން ހުރިހާ ފަރާތްތަކަށް، ހާއްސަކޮށް، އަދަދުގެ ޓީމަށް އިތުބާރުކޮށް އިސްތިހާރު ދިން ވިޔަފާރިތަކާއި އިސްތިހާރު ދިނުމަށް އެއްބަސްވެފައިވާ ފަރާތްތަކަށް ހިތުގެ ފުންމިނުން ޝުކުރު އަދާކުރަމެވެ.
ރަނގަޅު ނޫސްވެރިކަމަކަށް ރައްޔިތުން އެދޭ މިންވަރާއި އެދޭ ގޮތް މި ޓީމަށް އެނގެ އެވެ. ރައްޔިތުން އެދެނީ، ވަކި އަތަކަށް ނުޖެހި ލިޔުމަށެވެ. މައްސަލަތައް ތިލަކުރުމަށެވެ. ފެންނަ މަންޒަރު ނުފެންނަ ކަމަށް ނުހެދުމަށެވެ. ނުފެންނަ މަންޒަރު ފެންނަ ކަމަށް ވެސް ނުހެދުމަށެވެ. ތަހުގީގީ ނަޒަރަކުން ބެލުމަށެވެ. ކަންނެތް ނޫސްވެރިކަމުން ދުރުވެ، ތެދުވެރި ގަލަމަކުން ލިޔުމަށެވެ. ޒިންމާދާރު ނޫސްވެރިކަމެއް ފެނުމަށެވެ.
މިކަންކުރުމަށް އަދަދު ޓީމުގައި ތިބީ ފަންނުގެ ރެކޯޑް އެހާމެ ފުރިހަމަ، ތަޖުރިބާ ނުހަނު ގިނަ ނޫސްވެރިންނެވެ. ޓީމުގެ ނިއުސް އެޑިޓަރަކީ ހަރަކާތްތެރި، އަދި ހިނގާ ގަލަމުގެ ފަޒީނާ އަހުމަދެވެ. މެނޭޖިން އެޑިޓަރަކީ، ކުޅިވަރުގެ ނޫސްވެރިއެއްގެ ގޮތުގައި ލިޔަން ފެށި، އަދި މިހާރު އަދަބިއްޔާތުގެ ލިޔުންތައް ފަސޭހަކަމާއި ފުރިހަމަކަމާ އެކު ވިރުވައި އަޅާލާ މުހައްމަދު ހަމްދޫނެވެ. އަދަދުގެ ސީނިއާ އެސޯސިއޭޓް އެޑިޓަރަކީ ކޮންމެ ދާއިރާއެއްގައި ވެސް ގަލަން ހިންގޭ މުހައްމަދު ވިޝާމެވެ. ޓީމުގައި ދެން ހިމެނެނީ އެ މީހެއްގެ ދާއިރާގައި ކުޅަދާނަ ޒުވާން ނޫސްވެރިންނެވެ. ހަސަން މުހައްމަދާއި ނާޒިމް ހަސަން އާއި އައްޒާމް އަލިފުޅު އަދި އަހުމަދު ސާއިލް އަލީ ފަދަ ނޫސްވެރިންނެވެ. ވީޑިއޯގްރާފަރުންނާއި ފޮޓޯގްރާފަރުންނާއި ކްރިއޭޓިވް އާޓިސްޓުންގެ މަސައްކަތުގެ ފުރިހަމަކަން އަދަދުން މިހާރު ވެސް ފެންނާނެ އެވެ. މި ޓީމާ އެކު އަދަދުގެ ކޮންޓެންޓް ތަފާތުވާނެކަން ޔަގީނެވެ. ކިޔާހިތުން ކިޔާލާނެ، ބަލާ ހިތުން ބަލާލާނެ ކޮންޓެންޓް ގެނެސްދެވޭނެ އެވެ.
އަދަދުގެ ލިޔުންތެރިން އަދި ކޮންޓްރިބިއުޓަރުންގެ ގޮތުގައި ތިއްބެވީ އެ ބޭފުޅެއްގެ ދާއިރާގައި އެންމެ ކުރީ ސަފުގައި ގުނާލެވޭނެ ބޭފުޅުންނެވެ. އެ ކޮންޓެންޓް ވެސް ތަފާތުވާނެ އެވެ. އޮއްޓަރާއި ލިޔުމުގެ މުއްސަނދިކަން ހުންނާނެ އެވެ.
ހަގީގަތުގައި ވެސް ނޫސްވެރިކަމަކީ ފަސޭހަ މަސައްކަތެއް ނޫނެވެ. ގޮންޖެހުންތައް ވެސް ބޮޑެވެ. މަސައްކަތް ބުރަ ބޮޑެވެ. އެކަމަކު ލެޔާއި ގުޅިފައިވާ މަސައްކަތަކަށް މިކަން ވުމާއި، ވަރުގަދަ ޓީމެއް އެކުވި ވަގުތު، އަޅުގަނޑަށް މުހިންމުވީ މަގާމުގެ އިއްޒަތާއި ލައްޒަތެއް ނޫނެވެ. މިހާރު މިހުރީ މިވަގުތު އޮތް އެންމެ ގަދަ ޓީމާއެކު ނޫސްވެރިކަމުގަ އެވެ. މި ޓީމުގެ އަމާޒާއި ފެންނަ އޮތް މަންޒިލް ވެސް ސާފެވެ. ޓީމަށް އޮތް އިތުބާރު ނުހަނު ބޮޑެވެ. އެއާއެކު އޮތް ޒިންމާ ވެސް ބޮޑެވެ. އަދަދުގެ ޓީމު މަސައްކަތްކުރާނީ ގައުމަށް ބޭނުންވާ ފަދަ ނޫސްވެރިކަމެއް ކުރުމުގައި ދެމިތިބުމަށެވެ. އިރާދަކުރެއްވިއްޔާ އެކަން ވާނެ އެވެ. "އަދަދު" ފުރިހަމަ ވާނީ އެހާ ހިސާބުންނެވެ.
