ފަޅެއް ހިއްކައިގެން މާލޭގެ ރައްޔިތުންނަށް ގޯތި ދޫކުރުމުގެ ޕްލޭންގައި އަމާޒަކީ މަދުވެގެން 2,000 ގޯތި އެތަނުން ދޫކުރުން ކަމަށް ހައުސިން މިނިސްޓަރު މުހައްމަދު އަސްލަމް މިދިޔަ ބުރާސްފަތިދުވަހު ވިދާޅުވެއްޖެ އެވެ.
މާލޭގެ ރައްޔިތުންނަށް ގޯތި ދޫނުކުރާތާ އެތައް އަހަރެއް ވެފައިވާ ކަމުގެ ޝަކުވާ ބޮޑެވެ. އެކަމަކު, މާލޭގައި މިވަގުތު ހުރި ބިންތަކުން މާލޭގެ ރައްޔިތުންނަށް ގޯތި ދޫކުރެވޭކަށް ނެތެވެ. ހުޅުމާލެ މީގެ 20 އަހަރު ކުރިން ހިއްކައިގެން ކޮންމެވެސް ވަރަަކށް ގޯތި ދޫކުރި ނަމަވެސް ޕްލޭންކޮށްފައި އޮތީ އެތަނުން ގޯތި ވިއްކާށެވެ.
މިނިސްޓަރު އަސްލަމް "އަދަދު"އަށް ވިދާޅުވީ މާލޭ ރައްޔިތުންގެ ތެރެއިން ގޯތި ބޭނުންވާ ގިނަ ބަޔަކު އެބަތިބި ކަމަށެވެ. ބިމެއް ހިއްކައިގެން ވެސް ބޭނުންވާ އެންމެންނަކަށް ގޯތި ނުދެވޭނެކަން ފާހަގަކުރެއްވި އެވެ.
އެހެންވިޔަސް މި ސަރުކާރުގެ ވިސްނުމަކީ ހިއްކައިގެން ބިން ދެވޭނެ ގޮތެއް ހެދުމެވެ. އެކަމަކު އެއީ ކޮންތަނެއް ކަން އަދި އިއުލާނެއް ނުކުރެ އެވެ.
"އަލަށް ހިއްކައިގެން ގޯތި ދޭން ވައުދުވެވަޑައިގެންނެވި ބިމުން 2000 މަދުވެގެން ދެވޭނެ ކަމަށް ޕްލޭނެއް އެބަ އޮތް," މިނިސްޓަރު ވިދާޅުވި އެވެ.
ގޯތި ދޫކުރަން ބިން ހިއްކަން ނިންމާފައި ވަނީ އައިއެންޖީ ބޭންކުން ލޯނެއް ނަގައިގެން ބޮސްކާލިސްއާ ހަވާލުކޮށްގެންނެވެ. ގުޅިފަޅު ހިއްކުމުގެ މަސައްކަތް ކުރަނީ ވެސް ނެދަލެންޑްސްގެ އެ ކުންފުނިންނެވެ.
މާލޭގެ ރައްޔިތުންނަށް ގޯތި ދޫނުކުރާތާ އަހަރުތަކެއް ވެފައިވާ ކަމުގެ ޝަކުވާ ބޮޑުވެ, ރައްޔިތުންގެ މަޖިލީހުގައި ވެސް ވަނީ މިނިސްޓަރު އަސްލަމަށް މި ކަންބޮޑުވުމުގެ ސުވާލުތައް އަމާޒުކޮށްފަ އެވެ.
