ވެންޓިލޭޓަރުތައް ހޯދުމުގައި ހިންގި ކަމަށް ތުހުމަތުކުރާ ހިޔާނާތުގެ މައްސަލައިގައި ދައުވާ ނުކުރުމުން, ޕްރޮސިކިއުޓަ ޖެނެރަލް ހުސެއިން ޝަމީމް މަގާމުން ދުރުކުރަން ރައްޔިތުންގެ މަޖިލީހަށް ހުށަހަޅާނެ ކަމަށް އިދިކޮޅު ކޯލިޝަނުން މިއަދު ބުނެފި އެވެ.
ކޮވިޑް-19 އަށް ވެންޓިލޭޓަރުތައް ހޯދަން ދުބާއީގެ އެގްޒެކިިއުޓާސް ޖެނެރަލް ޓްރޭޑިންއާ ހަވާލުކުރުމުގައި ކޮރަޕްޝަން ހިންގާފައިވާ ކަމަށް ތުހުމަތުކޮށް ދައުވާ އުފުލައިދޭން އެންޓި ކޮރަޕްޝަން ކޮމިޝަނުން އެދުމުން ޕްރޮސިކިއުޓަ ޖެނެރަލް ވަނީ ދެ ފަހަރަށް ވެސް މައްސަލަ އަނބުރާ ފޮނުވާލައިފަ އެވެ. އޭސީސީގެ ތަހުގީގުން ދައުވާ ކުރެވޭނެ ވަރުގެ ހެއްކެއް ހޯދިފައި ނުވާ ކަމަށް ޕީޖީ ޝަމީމް ވިދާޅުވެ އެވެ.
މި މައްސަލައިގައި ހިތްހަމަނުޖެހުންފާޅުކުރައްވައި ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވެސް ވަނީ ޕީޖީ މަގާމުން ދުރުކުރަން ޖެހޭ ކަމަށް ވިދާޅުވެފަ އެވެ. އެކަމަކު ޕީޖީ އާއި އޭސީސީގެ ރައީސް މަރިޔަމް ޝިއުނާ ވަކިކުރަން ހުށަހެޅުމާ މެދު ގޮތެއް ނިންމަން ބޭއްވި ޕާލަމެންޓްރީ ގްރޫޕްގެ ބައްދަލުވުމުގައި އެކަމަށް ތާއީދެއް ނުލިބުނެވެ.
ޕީޕީއެމް/ޕީއެންސީ ކޯލިޝަނުން ބޭއްވި ނޫސްވެރިންގެ ބައްދަލުވުމުގައި މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވީ ކޮވިޑް-19ގެ ތެރޭގައި ޚިޔާނާތް ހިންގިކަން ފެންނަން އޮތް އިރު އެކަމާ ހަވާލުވާނެ މީހަކު ދައުލަތުގެ ތެރޭގައި ނެތުމަކީ ސީރިއަސް މައްސަލައެއް ކަމަށެވެ. އޭސީސީގެ ތަހުގީގުން ސާބިތުވާން އޮތް ކަމެއްގައި ދައުވާ ނުކުރުމުގައި ޕީޖީގެ އިހުމާލު އޮތް ކަމަށް އިދިކޮޅަށް ގަބޫލުކުރެވޭ ކަމަށާއި މައްސަލަ މާދަމާ މަޖިލީހަށް ވައްދާނެ ކަމަށް އާދަމް ޝަރީފް ވިދާޅުވި އެވެ.
"އަޅުގަނޑުމެން ގަބޫލުކުރާ ގޮތުގައި މިކަމަށް މަޖިލީހުގެ ވެސް އެއްބާރުލުން ލިބޭނެ. ސަބަބަކީ އެމްޑީޕީން އެބަ ގަބޫލުކުރޭ މިއީ ވަރަށް ބޮޑު ޚިޔާނާތެއް ކަމަށް, ވައްކަމެއް ކަމަށް,“ ޕީއެންސީގެ ޕީޖީ ލީޑަރު އާދަމް ޝަރީފް ވިދާޅުވި އެވެ.
ރައްޔިތުންގެ މަޖިލީހުގެ ސާފު އަޣުލަބިއްޔަތު 65 މެމްބަރުންނާ އެކު އެމްޑީޕީގައި އޮތް އިރު ޕީޕީއެމާއި ޕީއެންސީ ކޯލިޝަން ތަމްސީލްކުރައްވަނީ އަށް މެމްބަރުންނެވެ.
ވައްކަމާއި ހިޔާނާތާ ދެކޮޅު ކަމަށް އެމްޑީޕީން ބުނާ އިރު ޕީޖީ ވަކިކުރަން އެ ޕާޓީގެ ރުހުން ނުލިބެންވީ ސަބަބެއް ނެތް ކަމަށް އިދިކޮޅުން ބުންޏެވެ.
އިތުބާރު ނެތް ކަމުގެ ވޯޓު ނަގައި ހޯމް މިނިސްޓަރު އިމްރާން އަބްދުالله ވެސް މަގާމުން ދުރުކުރަން އިދިކޮޅު ކޯލިޝަނުން މަޖިލީހަށް ވެއްދި އެވެ. އެކަމަކު ސަރުކާރު ހިންގާ ކޯލިޝަންގެ އެއް ލީޑަރު, އިމްރާން ވަކިކުރަން އެމްޑީޕީގެ ތާއީދެއް ނުލިބުނެވެ.
ވެންޓިލޭޓަރުތައް ހޯދަން ހަވާލުކުރި ގޮތުގެ މައްސަލައިގައި ކުރީގެ ހެލްތު މިނިސްޓަރު އަބްދުالله އަމީން އާއި އެ މިނިސްޓްރީގެ 11 މުވައްޒަަފަކަށް ދައުވާ ނުކުރަން ޕީޖީގެ ނިންމެވުން ތިން ވަނަ ފަހަރަށް މުރާޖައާކޮށްދޭން އެދޭނެ ކަަމަށް އޭސީސީން ވަނީ ބުނެފަ އެވެ. ދައުވާކުރަން ބޭނުންވާ އުންސުރުތައް އެ މައްސަލައިގައި ހަމަނުވާ ކަމަށް ޕީޖީ ވިދާޅުވި ނަމަވެސް އޭސީސީން އެކަން ގަބޫލެއް ނުކުރެ އެވެ. އެ ކޮމިޝަނުން ބުނަނީ އެ މައްސަލައިގައި މިހާތަނަށް ހޯދިފައިވާ ކަންކަމުން ދައުވާ ނުކުރެވެންވީ ސަބަބެއް ނެތް ކަމަށެވެ.
ދުބާއީގެ އެގްޒެކިއުޓާސްއާ ހަވާލުކުރީ 75 ވެންޓިލޭޓަރު ހޯދުމަށެވެ. މީގެތެރެއިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ ވެންޓިލޭޓަރުތައް ފޮނުވާނެ ކަމުގެ ޔަގީންކަމެއް ހެލްތު މިނިސްޓްރީއަށް ނެތުމުން މައްސަަލައިގައި އެޓާނީޖެނެރަލްގެ ލަފައަކަށް ވަނީ އެދިފަ އެވެ.
