އަދަދު ނޫހުން ގެނެސްދިން "އައިޝާ" ޑޮކިއުމެންޓްރީގެ މައްސަލައިގައި ފުލުހުން ހިންގާ ތަހުގީގަށް ރައީސުލްޖުމްހޫރިއްޔާ މުހައްމަދު މުއިއްޒުގެ ބަޔާނެއް ނެގިތޯ އެހުމުން ފުލުހުން ޖަވާބެއް ނުދީ ހަނުތިބެއްޖެ އެވެ.
މުއިއްޒުގެ ޖިންސީ ޝިކާރައަކަށްވި ކަމަށް ތުހުމަތު ކުރާ ރައީސް އޮފީހުގައި ކުރިން މަސައްކަތްކުރި މުވައްޒަފެއްގެ ވާހަކަ ގެނެސްދިން ޑޮކިއުމެންޓަރީގެ ތަހުގީގުގައި އެމަނިކުފާނުގެ ބަޔާނެއް ފުލުހުން ނަގާފައިވާ ކަމަށް ވިދާޅުވީ، އެ މައްސަލައިގައި ފުލުހަށް ހާޒިރުކުރި ރައީސް އޮފީހުގެ ކުރީގެ މުވައްޒަފުގެ ގާނޫނީ ވަކީލު ހުސެއިން ޝަމީމް އެވެ. އޭނާ އެހެން ވިދާޅުވީ ފުލުހުންނާ ހަވާލާދީ އެވެ.
ނަމަވެސް، އެކަމާ ގުޅޭގޮތުން އަދަދު ނޫހުން ފުލުހުންނާ މިއަދު ހެނދުނު ސުވާލުކުރުމުން، މި ހަބަރު ޝާއިއު ކުރުމާ ހަމައަށް ވެސް އެއްވެސް ޖަވާބެއް ފުލުހުން ދީފައެއް ނުވެ އެވެ. އެ ސުވާލު ކުރުމުން ފުލުހުންގެ މީޑިއާ އޮފިޝަލް ވިދާޅުވީ ބަލާލައިފައި ޖަވާބެއް ދެއްވާނެ ކަމަށެވެ. އެއަށްފަހު ފުލުހުންގެ ފަރާތުން ޖަވާބެއް ނުދެއްވަ އެވެ.
އަދަދު ނޫހުން "އައިޝާ" ޑޮކިއުމެންޓްރީ އާންމުކުރިތާ މަސްދުވަސް ފަހުން ފުލުހުން ތަހުގީގެއް ހިންގަން ފެށީ އެ ޑޮކިއުމެންޓްރީއާ ގުޅޭގޮތުން މުއިއްޒުއާ މި ނޫހުން ސުވާލުކުރުމުންނެވެ.
ޑޮކިއުމެންޓަރީގެ މައްސަލަ ބަލަން އަމުރު ކުރީ މުއިއްޒެވެ. އެމަނިކުފާނު އެގޮތަށް އެންގިތާ މަދު ގަޑިއިރުތަކެއްގެ ތެރޭގައި ފުލުހުން ވަނީ އަދަދު ނޫހުގެ އޮފީހަށް ވަދެ ލެޕްޓޮޕްތަކާއި ހާޑްޑިސްކުތަކެއް ގެންގޮސްފަ އެވެ.
އެ މައްސަލައާ ގުޅިގެން އަދަދު ނޫހަށް ރެއިޑު ކުރުމުގެ އިތުރުން މި ނޫހުގެ ސީއީއޯ ހުސެއިން ފިޔާޒް މޫސާ އަދި މެނޭޖިން އެޑިޓަރު ހަސަން މުހައްމަދުގެ ޕާސްޕޯޓު ހިފަހައްޓަން ފުލުހުން އެދިގެން ކްރިމިނަލް ކޯޓުން ވަނީ އަމުރެއް ނެރެފަ އެވެ. އަދި އެ މައްސަލައިގެ ތަހުގީގަށް ފިޔާޒް އާއި ހަސަން ވަނީ މިދިޔަ ހަފުތާގައި ފުލުސް އޮފީހަށް ވެސް ހާޒިރުކޮށްފަ އެވެ.
އޭގެ އިތުރުން ފުލުހުން ވަނީ ކޯޓު އަމުރެއްގެ ދަށުން ރައީސް އޮފީހުގެ ކުރީގެ މުވައްޒަފެއްގެ ޕާސްޕޯޓު ވެސް ހިފަހައްޓައިފަ އެވެ. އޭނާގެ ބަޔާން ނެގީ މިއަދު އެވެ. ނަމަވެސް، އޭނާގެ ފަރާތުން ދިފާއުގައި އެއްވެސް ވާހަކައެއް ދެއްކުމުގެ ފުރުސަތެއް ފުލުހުން ދީފައެއް ނުވެ އެވެ.
