ދުނިޔޭގެ އެންމެ ބޮޑު 3ޑީ ޕްރިންޓަޑް ފަރާ އެކު ގިނިސް ބުކް އޮފް ވޯލްޑް ރެކޯޑްސް އިން ސަމާ އައިލެންޑް ރިސޯޓަށް ޖާގަ ލިބިއްޖެ އެވެ.
ގިނިސް ރެކޯޑް ލިސްޓުން ޖާގަ ލިބުނު މި ފަރަކީ 2018 ވަނަ އަހަރުގެ ތެރޭގައި ސަމާ އައިލެންޑުން އެ ރިސޯޓުގެ މައި ޖެޓީ ކައިރިން އޮންނަ "ބްލޫ ލެގޫން" ޑައިވް ސައިޓަށް ފެއްތި 3ޑީ ޕްރިންޓަޑް ރީފް ސިސްޓަމެކެވެ.
މިއީ 3ޑީ ޓެކްނޮލޮޖީގެ ބޭނުން ކޮށްގެން މަރުވެފައިވާ ފަރުތަކަށް އަލުން ދިރުން ގެނުވޭތޯ އެ ރިސޯޓުން ފެށި އަޖުމަ ބެލުމުގެ މަސައްކަތެކެވެ.
މި 3ޑީ ޕްރިންޓަޑް ފަރުތަކަކީ އޮސްޓްރޭލިއާގެ މެލްބަންގައި ހުންނަ ރީފް ޑިޒައިން ލެބްގެ ޑިޒައިނަރު އެލެކްސް ގޯޑްގެ އީޖާދެކެވެ. އަދި މި ފަރުތައް ފަރުމާ ކޮށްފައި ވަނީ ރާއްޖޭގެ ފަރުތަކާއި މުރަކަތައް އަސްލަކަށް ބަލައިގެންނެވެ. މި މުރަކަތައް ހަދާފައިވަނީ މުރަކަތައް ހެދިފައި ހުންނަ ކެލްސިއަމް ކާބޯނޭޓާ ވައްތަރު މާއްދާއެއް ކަމުގައިވާ ސެރަމިކް ބޭނުން ކޮށްގެންނެވެ.
އެންމެ ފަހުގެ 3ޑީ ޕްރިންޓިން ޓެކްނޮލޮޖީ ބޭނުން ކޮށްގެން އުފެއްދި މި ފަރުގެ މޯލްޑްތައް ރާއްޖެ ގެނައުމަށް ފަހު ފެއްތީ ސަމާ އައިލެންޑްގެ ކޮރަލް ނާސަރީ ހުންނަ ސަރަހައްދު ކައިރިއަށް، ހަތް މީޓަރު އަޑިއަށެވެ. މި މޯލްޑުތަކުގައި އިންދި މުރަކަތަކަކީ ސަމާ އައިލެންޑުގެ ކޮރަލް ނާސަރީގައި އާލާކޮށްފައި ހުރި މުރަކަ އެވެ.
ކ. ޒިޔާރަތްފުށީގައި ތަރައްގީ ކޮށްފައިވާ ސަމާ އައިލެންޑް ރިސޯޓަކީ ރާއްޖޭގެ އެންމެ ދުވަސްވީ ރިސޯޓްތަކުގެ ތެރެއިން ރިސޯޓެކެވެ. ދެކުނު އޭޝިއާ ސަރަހައްދުގެ އެންމެ މަގުބޫލު ބީޗް ރިސޯޓްތަކުގެ ތެރޭގައި ހިމެނޭ ސަމާ އައިލެންޑަކީ ތިމާވެއްޓާ ރައްޓެހި، ދެމެހެއްޓެނިވި ފަތުރުވެރިކަމަށް ބާރުއަޅާ ރިސޯޓެކެވެ.
