ޅ. ކަނުހުރާ ރިސޯޓް ސިންގަޕޫރުގެ ހޮޓެލް ޕްރޮޕަޓީ ލިމިޓެޑް (އެޗްޕީއެލް) އަށް ވިއްކާލައިފި އެވެ.
ކަނުހުރާ ވިއްކާލުމުގެ މުއާމަލާތާ ގުޅިގެން ޓޫރިޒަމް މިނިސްޓްރީން ކުރި އިއުލާނުގައި ވަނީ ޅ. ކަނުހުރާގެ ލީސް އެގްރީމަންޓް އެހެން ފަރާތަކަށް ބަދަލު ކުރުމުގެ ހުއްދައަށް ހުށައަޅާފައިވާތީ، އެ ރަށާއި ގުޅިގެން އެއްވެސް ދަރަންޏެއް ނުވަތަ މައްސަލައެއް އޮތް ފަރާތެއް ވާނަމަ 14 ދުވަހުގެ ތެރޭގައި މިނިސްޓްރީއަށް އެންގުމަށެވެ.
ފަސް ތަރީގެ ކަނުހުރާ ރިސޯޓްގެ އޮޕަރޭޓް ކުރަމުން އަންނަނީ މޮރިޝަސްގެ ސަން ލިމިޓަޑް ކުންފުނިންނެވެ. މާލެއިން ފުރައިގެން 40 މިނިޓުން ސީޕްލޭންގައި ދެވޭ މި ރިސޯޓުގައި 80 ވިލާ އަދި އަށް ރެސްޓޯރަންޓް ހުރެ އެވެ. މައުލޫމާތު ލިބިފައިވާ ގޮތުގައި މި ފަސް ތަރީގެ ފެންވަރަށް ތަރައްގީ ކުރީ 2017 ވަނަ އަހަރު އެވެ.
ކަނުހުރާ ރިސޯޓް ވިއްކާލި އަގެއް ކަށަވަރު ވެފައެއް ނުވެ އެވެ. ނަމަވެސް، ބައެއް މީޑިއާތަކުގައި ރިޕޯޓްކޮށްފައިވާ ގޮތުގައި ކަނުހުރާ ވިއްކާލީ 40 މިލިއަން ޑޮލަރު (616 މިލިއަން ރުފިޔާ) އަށެވެ.
ކަނުހުރާ ރިސޯޓް ގަތް ހެޗްޕީއެލް ކުންފުންޏަކީ ރާއްޖޭގައި މިހާރު ވެސް ގިނަ ރިސޯޓް ޕްރޮޕަޓީތަކެއް އޮޕަރޭޓް ކުރަމުން އަންނަ ކުންފުންޏެކެވެ. މި ކުންފުނީގެ ވެރިޔަކީ ސިންގަޕޫރުގެ ބިލިއަނަރު އޮޮންގް ބެންގް ސެންގް އެވެ.
