މި އަހަރުގެ ފެބްރުއަރީ މަހު ދައުލަތަށް ލިބުނު އާމްދަނީ، އަންދާޒާ ކުރި އަދަދަށް ވުރެ %41.2 އިތުރުވެއްޖެ ކަމަށް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ތަފާސް ހިސާބުތަކުން ދައްކައިފި އެވެ.
މީރާ އިން އެންމެ ފަހުން އާންމު ކުރި ދައުލަތުގެ އާމްދަނީ ރިޕޯޓަށް ބަލާއިރު، ފެބްރުއަރީ މަހުގެ ތެރޭގައި ޓެކުހާއި އެހެނިހެން އާމްދަނީގެ ގޮތުގައި ދައުލަތަށް ލިބުނީ 994.12 މިލިއަން ރުފިޔާ އެވެ. މީގެ ތެރޭގައި ޑޮލަރު އާމްދަނީގެ ގޮތުގައި ލިބުނު 41.71 މިލިއަން ޑޮލަރު (643.16 މިލިއަން ރުފިޔާ) ހިމެނެ އެވެ.
އަންދާޒާތަކަށް ވުރެ އާމްދަނީ އިތުރުވީ ނަމަވެސް މިދިޔަ އަހަރުގެ މި މުއްދަތާ އަޅާ ބަލާއިރު ދައުލަތަށް ލިބުނު އާމްދަނީ ވަނީ %30.9 ދަށަށް ގޮސްފަ އެވެ. މިއީ އަހަރުން އަހަރަށް ބަލާއިރު، ފެބްރުއަރީ މަހުގެ އާމްދަނީއަށް މި ވަރުގެ ބޮޑު ހީނަރުކަމެއް އައި ފަހަރެވެ.
މީރާއިން ބުނި ގޮތުގައި، ދައުލަތުގެ އާމްދަނީ ދަށަށް ދިޔައީ ކޮވިޑު ބަލިމަޑުކަމުގެ ސަބަބުން ފަތުރުވެރިކަމުގެ ދާއިރާއިން ލިބޭ އާމްދަނީ ދަށަށް ދިއުމުގެ ސަބަބުންނާއި ލީސް ޕީރިއަޑް އެކްސްޓެންޝަން ފީ ގެ ގޮތުގައި މި އަހަރުގެ ފެބްރުއަރީ މަހު ދައުލަތަށް އާމްދަނީއެއް ލިބިފައި ނުވާތީ އެވެ.
ފެބްރުއަރީ މަހު ދައުލަތަށް ލިބުނި އާމްދަނީގެ ތަފްސީލުތަކަށް ބަލާއިރު، ޓެކްސް އާމްދަނީގެ ގޮތުގައި 886.42 މިލިއަން ރުފިޔާ އަދި ޓެކްސް ނޫން އާމްދަނީގެ ގޮތުގައި 107.69 މިލިއަން ރުފިޔާ ލިބުނެވެ. ދައުލަތަށް ލިބުނު އާމްދަނީގެ ތެރެއިން އެންމެ ބޮޑު އާމްދަނީ އެއް ލިބުނީ ޖީއެސްޓީ (672.78 މިލިއަން ރުފިޔާ) އާއި އިންކަމް ޓެކްސް (107.47 މިލިއަން ރުފިޔާ) އަދި ގްރީން ޓެކްސް (63.54 މިލިއަން ރުފިޔާ) އިންނެވެ.
އަހަރުގެ މިހާތަނަށް ދައުލަތަށް އާމްދަނީގެ ގޮތުގައި 2.5 ބިލިއަން ރުފިޔާ ލިބިފައި ވާއިރު، މިއީ މިދިޔަ އަހަރާ އަޅާ ބަލާއިރު 300 މިލިއަން ރުފިޔާ ދަށް އަދަދެކެވެ. އެހެން ނަމަވެސް، އަހަރުގެ މިހާތަނަށް ދައުލަތަށް ލިބެމުން އަންނަ އާމްދަނީ އަށް ބަލާއިރު، މި އަހަރަށް ޓެކުހާއި އެހެނިހެން ގޮތްގޮތުން ދައުލަތަށް ލިބޭނެ ކަމަށް އަންދާޒާ ކުރި 10 ބިލިއަން ރުފިޔާ އަށް ވުރެ ބޮޑު އަދަދެއް ލިބޭނެ ކަމަށް ބެލެވެ އެވެ.
