މިދިޔަ ހަފްތާ ބަންދުގައި ވ. އަންބަރާއަށް ދަތުރު ދިޔަ ގިނަ އަދަދެއްގެ ޒުވާނުންތަކެއް ފުލުހުން ހުއްޓުވި މައްސަލައިގެ ކަންބޮޑުވުން ލިބެމުންދާ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު މަޖިލީހުގެ މިއަދުގެ ޖަލްސާގައި ވިދާޅުވެއްޖެ އެވެ.
އިންޑިއާގެ އެހީގައި އުތުރު ތިލަފަޅުގައި އަޅާ ޑޮކްޔާޑާ ގުޅޭ ގޮތުން ދޮގު މައުލޫމާތުތައް ފަތުރާ ކަމަށް ބުނެ އެކަން ބަލަން ސަރުކާރު ހިންގާ ކޯލިޝަންގެ މައި ޕާޓީ އަދި މަޖިލީހުގެ ސާފު އަގުލިބިއްޔަތު އޮންނަ އެމްޑީޕީގެ މެންބަރަކު ހުށަހެޅުއްވި ކުއްލި މައްސަލައިގެ ބަހުސްގެ ވަގުތު އިތުރުކުރުމަށް ވޯޓަށް އެހުމުގެ ކުރިން، ނަޝީދު ވިދާޅުވީ ހަފްތާ ބަންދުގައި ދަތުރު ދިޔަ ޒުވާނުންތަކެއް ފުލުހުން ހުއްޓުވި މައްސަލައިގެ ކަންބޮޑުވުން އެ ޒުވާނުންގެ އިތުރުން މަޖިލީހުގެ ބައެއް މެންބަރުންގެ ފަރާތުން ރިޔާސަތާ ހަމައަށް އައިސްފައިވާ ކަމަށެވެ.
ނަޝީދު އެ އިޝާރާތް ކުރެއްވީ އަންބަރާއަށް ދަތުރު ދިޔަ 95 ޒުވާނަކު ހުއްޓުވައި، ކޮވިޑް-19 އާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އަޅާފައިވާ ރައްކާތެރިކަމުގެ މިންގަނޑާ ހިލާފަށް އެރަށް ދިޔަ ކަމަށް ބުނެ އެ މީހުން ޖޫރިމަނާކުރި މައްސަލަ އަށެވެ.
އެމަނިކުފާނު ވިދާޅުވީ ދަތުރު ނުދެވުމުގެ ދެރަވުމުގައި މަޖިލީހުން ބައިވެރިވާ ކަމަށާއި، ނަމަވެސް ކޮވިޑް-19 އިގެ ހާލަތުގައި ދަތުރު ދިއުން ފަދަ ކަންކަމަށް ހުރަސްއެޅޭނެ ކަމަށެވެ.
އެއާ ވިދިގެން ނަޝީދު ވިދާޅުވީ، ދީނީ ހަރުކަށި ފިކުރުގެ ފަރާތްތަކުން، ފަޅު ރަށްރަށަށް ޒުވާނުން ގެންގޮސްގެން އެކި ބާވަތުގެ ތަމްރީނު ހަރަކާތްތައް ހިންގާކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.
"ފުލުހުން ކަންބޮޑުވޭ، ޒުވާނުން ގުރޫޕުތަކުގައި ތިބެ ދެން ބައެއް ފަހަރަށް އެ ބާވަތުގެ ގުރޫޕުތަކުން ކުރެވޭ ކަންތައްތަކާ ގުޅޭގޮތުން ވެސް. ހާއްސަ ގޮތެއްގައި ހަރުކަށި ދީނީ ފިކުރުތަކަށް ލެނބި، އެ މީހުންގެ ތަމްރީންތަކަށް ފަޅު ރަށްރަށަށް ދާ ހަބަރު މި އޮންނަނީ ފުލުހުންނަށް ލިބިފައި،" ނަޝީދު ހާމަކުރެއްވި އެވެ.
އެހެންކަމުން، ދަތުރުދާ ޒުވާނުން އެފަދަ "އިމޭޖަށް" ވިސްނައިގެން ދަތުރު ދާން ރޭވުމަކީ މުހިއްމުކަމެއް ކަމަށް އެމަނިކުފާނު ފާހަގަކުރެއްވި އެވެ.
އަންބަރާއިން އަތުލައިގަތް މީހުން ތިބީ މަސްތުވާތަކެތި ބޭނުން ކުރަން ކަމަށް ބައެއް މީޑިއާ ރިޕޯޓްތައް ބުނި ނަމަވެސް، އެކަން ފުލުހުން ވަނީ ދޮގުކޮށްފަ އެވެ.
އޭގެ ތެރެއިން އެއްވެސް މީހެއްގެ މައްޗަށް މަސްތުވާތަކެތި ބޭނުންކުރި ކަމުގެ ތުހުމަތު ކުރެވިފައި ނުވާ ކަމަށް ފުލުހުން ވަނީ ބުނެފަ އެވެ.
