މާލެ އިން ފުރައިގެން 10 ވަރަކަށް މިނެޓްގެ ތެރޭގައި ދެވޭނެ ފްލޯޓިން ސިޓީއެއް ރާއްޖޭގައި ހެދުމަށް ނެދަލޭންޑްސްގެ ޑަޗް ޑޮކްލޭންޑް ކުންފުންޏާ ދެ ވަނަ ފަހަރަށް ހަވާލުކޮށްފި އެވެ.
މި ޕްރޮޖެކްޓުގައި އެންމެ ފުރަތަމަ ސޮއިކުރީ ކުރީގެ ރައީސް މުހައްމަދު ނަޝީދުގެ ވެރިކަމުގައި 2010 ގަ އެވެ.
އެއްބަސްވުމުގައި އޭރު އޮތް ގޮތުން ނަމަ ފްލޯޓިން ސިޓީ ހަދަން ފަސް ރަށެއް ޑަޗް ޑޮކްލެންޑަށް ދޭ ގޮތަށް ވަނީ ހަމަޖައްސައިފަ އެވެ. ނަމަވެސް ފަހުން އެ މަޝްރޫއާ ގުޅޭ ތަފްސީލު އާއްމެއް ނުކުރެ އެވެ.
ފްލޯޓިން ސިޓީގެ ޕްރޮޖެކްޓް ވެބްސައިޓުގައި އާއްމުކުރި ނޫސް ބަޔާނެއްގައިވާ ގޮތުން 10 އަހަރުގެ ދިހަ އަހަރުގެ މުއްދަތަކަށް ކުރިއަށް ގެންދާ މި މަޝްރޫއުގައި މީހުންނަށް ދިރިއުޅެވޭ ގޮތަށް ގިނަ ގެތައް ހަދާނެ އެވެ.
މި ތަންތަން ހަދަން ހަމަޖައްސާފައި ވަނީ 200 ހެކްޓަރުގެ ފަޅެއްގަ އެވެ. މި ގެތައް ދޫކުރާނީ އަތްފޯރާފަށުގައި ކަމުގެ ޔަގީންކަން ޑަޗް ޑޮކްލޭންޑުން ދެ އެވެ.
"ސުވަރުގެއެއް ފަދަ ތަފާތު މާހައުލެއްގައި މިތަން ހުރުމުގެ ސަބަބުން އަދި ދިވެހި ސަރުކާރުގެ ފުރިހަމަ އެއްބާރުލުމާ އެކު ހެދުމަށް ރޭވިފައިވާ ތަނަކަށް ވުމާ އެކު އަޅުގަނޑުމެން އުފަލާއި އެކު މި ދައްކާލަނީ ދުނިޔޭގެ ފުރަތަމަ ފްލޯޓިން ސިޓީ" ޑަޗް ޑޮކްލެންޑްސްގެ ސީއީއޯ ޕޯލް އެޗްޓީއެމް ވިދާޅުވި އެވެ.
ބަޔާނުގައި ބުނެފައިވާ ގޮތުގައި މި މަޝްރޫއުގެ ޕްލޭނިން މަސައްކަތް މިހާރު ވަނީ ނިމުމާ ގާތްވެފަ އެވެ. އަމަލީ މަސައްކަތް ފަށަން ލަފާކޮށްފައި އޮތީ އަންނަ އަހަރުގަ އެވެ. މުޅި މަޝްރޫއު ނިމޭނެ ކަމަށް ލަފާކޮށްފައި ވަނީ ފަސް އަހަރުގެ ތެރޭގަ އެވެ.
