ފުލުހުންގެ ސުޕްރިންޓެންޑެންޓުންގެ ރޭންކަށް ފުރަތަމަ ފަހަރަށް ތިން އަންހެން ފުލުހަކު ޕްރޮމޯޓްވެއްޖެ އެވެ.
ފުލުހުންގެ ހިދުމަތުގައި އަންހެނުން ދެމިތިބިތާ 33 އަހަރު ފަހުން މިއައީ ތާރީޚީ ބަދަލެކެވެ. އަންހެން ތިން އޮފިސަރުންނަށް މަގާމުގެ ކުރިއެރުން ލިބުނު ކަމުގެ ލިއުން ހަވާލުކޮށްދެއްވީ ހޯމް މިނިސްޓަރު އިމްރާން އަބްދުالله އެވެ.
ފުލުސް އޮފީހުން މިއަދު ބުނިގޮތުގައި ސުޕްރިންޓެންޑެންޓުންގެ ގޮތުގައި މަގާމުގެ ކުރިއެރުން ލިބުނީ ޗީފް އިންސްޕެކްޓަރުންގެ ގޮތުގައި ތިއްބެވި އިޒްމިއާ ޒާހިރު އާއި މަރިޔަމް އަޒްމާގެ އިތުރުން ފާތިމަތު ނަޝްވާ އަށެވެ.
އިޒްމިއާ: އަންހެނުންގެ ދައުރު ފުޅާކުރަން ގިނަ މަސައްކަތްތަކެއް
ފުލުސް އޮފީހުން އާއްމުކުރި މައުލޫމާތުތަކުގައިވާ ގޮތުން އޯގަނައިޒޭޝަނަލް ރިފޯމް ޑިޕާޓްމަންޓުގެ ހެޑަކަށް ހުންނެވި އިޒްމިއާ ގެންދަވަނީ ފުލުހުންގެ ހިދުމަތުގައި އަންހެނުންގެ ދައުރުފުޅާކުރަން ގިނަ މަސައްކަތްތަކެއް ކުރައްވަމުންނެވެ. އޭނާ ހިމެނިވަޑައިގަންނަވަނީ ފުލުހުންގެ ތެރެއަށް ކޮމިޝަންޑް ކުރެވުނު މަދު އަންހެން އޮފިސަރުންގެ ތެރޭގަ އެވެ. ފުރަތަމަ ފަހަރަށް ޑިވިޝަން ކޮމާންޑަރުކަން ކުރެއްވި އަންހެން ފުލުހަކީ އިޒްމިއާ އެވެ.
އޭނާ ވަނީ ފުލުހުންގެ ސްޕޯކްސް ޕާސަންގެ މަގާމް ވެސް ފުރުއްވައިފަ އެވެ.
އަޒްމާ: އިންވެސްޓިގޭޝަންގައި ގިނަ އަހަރުތަކެއް
ސެންޓްރަލް ޑިވިޝަން ކޮމާންޑަރުގެ ގޮތުގައި ހުންނެވި މަރިޔަމް އަޒްމާއަކީ ފުލުހުންގެ ހިދުމަތުގައި އެންމެ ދިގު މުއްދަތެއް ހޭދަކުރެއްވި އަންހެން އޮފިސަރެވެ. ފުލުހުންގެ ހިދުމަތުގައި 25 އަހަރު ހޭދަކުރައްވާފައިވާ އަޒްމާ ވަނީ އެކި ދާއިރާތަކުގައި މަސައްކަތް ކުރައްވައިފަ އެވެ.
އެންމެ ގިނަ އަހަރުތަކެއް ހޭދަކުރެއްވީ އިންވެސްޓިގޭޝަންގެ ދާއިރާގަ އެވެ. ވިކްޓިމް ސަޕޯޓްގެ މަގާމާއި ފެމެލީ އެންޑް ޖެންޑަ އެފެއާޒް ޑިޕާޓްމަންޓްގެ ހެޑްކަން ވެސް ކުރެއްވި އެވެ.
އަޒްމާއަކީ ފުލުހުންގެ މުއައްސަސާގައި އަންހެނުންގެ ދައުރުފުޅާކޮށް ބާރުވެރިކުރަން އުފެއްދި ވިމެން އިން ޕޮލިސިންގެ ނެޓްވޯކްގެ ރައީސެވެ.
ނަޝްވާ: ކުށްމަދު ކުރުމުގައި އިސް ދައުރެއް
އަޕަ ނޯތު ޕޮލިސް ޑިވިޝަންގެ ކޮމާންޑަރުގެ މަގާމުގައި ހުންނެވި ނަޝްވާ ވެސް ވަނީ ފުލުހުންގެ ހިދުމަތުގައި 25 އަހަރު ހޭދަކުރައްވައިފަ އެވެ. މި މުއްދަތުގައި, އެޑްމިން އޮފިސަރުގެ މަގާމުން ފެށިގެން ގިނަ ކުރިއެރުންތަކެއް ހޯއްދެވި އެވެ.
ފުލުހުން ބުނީ ނަޝްވާގެ އެންމެ ބޮޑަށް ފާހަގަކުރެވޭ އެއް ހިދުމަތަކީ ކްރައިމް ޕްރިވެންޝަން އެންޑް ޕަބްލިކް އެފެއާޒް ޑިޕާޓްމަންޓްގެ އިސްވެރިއެއްގެ ހައިސިއްޔަތުން ކޮމިއުނިޓީއާ ގުޅިގެން ކުށްމަދުކުރަން ރާވާއި ހިންގެވި ޕްރޮގްރާމްތަކެވެ. އޭގެތެރޭގައި ސްކޫލް ދަރިވަރުންނަށް އަމާޒުކޮށްގެން ހިންގާ ފުރާވަރު ކޭމްޕް ފުލުހުން ފާހަގަކުރި އެވެ.
ފުލުހުންގެ ޕޮލިސް އެކަޑަމީން ހިންގާ ތަފާތު އެކި ކޯސްތަކުގައި ލެކްޗަރާއެއްގެ ގޮތުގައި ސެޝަންތައް ވެސް އޭނާ ނަންގަވަ އެވެ. ނަޝްވާއަށް ވަނީ 2018 ވަނަ އަހަރު ރެހެންދި އެވޯޑު ވެސް ލިބިވަޑައިގެންފަ އެވެ. އަދި ސައުތު އޭޝިއަން ޕާޓްނާޝިޕް ސަމިޓް އެންޑް ބިޒްނަސްގެ ފަރާތުން ޕަބްލިކް ސެކްޓާ އިން ހޮވި ސީއެސްއާރު ލީޑަޝިޕް އެވޯޑާއި 2018 ވަނަ އަހަރު ވިމެން އޮން ބޯޑް އެވޯޑް ލިބިވަޑައިގަތެވެ.
މި ތިން އަންހެން އޮފިސަރުން ހޯއްދެވި ކުރިއެރުމަކީ ފުލުހުންގެ ހިދުމަތުގައި ތިބި އަންހެނުންނަށް ލިބުނު ވަރަށް ބޮޑު ހިތްވަރެއް ކަން ފުލުސް އޮފީހުން ފާހަގަކުރެ އެވެ.
