ރިޔާސީ އިންތިހާބާއި މަޖިލިސް އިންތިހާބު އެއްކުރަން އުޅެނީ އެކެއްގެ މުށުތެރެއަށް ބާރުތައް ޖަމާކުރަން ކަމަށް ޓްރާންސްޕޭރެންސީގެ ކުރިން މަސައްކަތް ކުރެއްވި އައިމަން ރަޝީދު އިއްޔެ ވިދާޅުވެއްޖެ އެވެ.

"ދެ އިންތިހާބު އެއްކުރަން ނުފެނޭ" ނަމުގައި ބޭއްވި ނޫސްވެރިންގެ ބައްދަލުވުމުގައި އައިމަން ވިދާޅުވީ ދެ އިންތިހާބު އެއްކޮށްލަން އުޅެނީ ތިން ބާރު ވަކިވެފައި އޮތުމުގެ ބަދަލުގައި ރައްޔިތުންގެ މަޖިލީހުގެ ބާރާއި ފަނޑިޔާރުގޭގެ ބާރާއި ސަރުކާރު ހިންގުމުގެ ބާރުވެސް އެކަކުގެ ބާރުގެ ދަށަށް ގެންދަން ކަމަށެވެ.

"މި ކުރެވޭ ކަމަކީ ހުރިހާ ބާރުތަކެއް އެކެއްގެ މުށުތެރެއަށް ޖަމާވުމުގެ ކަންކަން ފެށިގެން މިދަނީ. އެ ތަރުތީބު ފެނިގެން މިދަނީ. ހަމަ އެއާ އެއްކޮށް ތިން ބާރު ވަކިވެފައި އޮތުމުގެ ބަދަލުގައި ދެން ވަކިވެގެންދާނީ އެންމެ ބާރަކަށް. ރައްޔިތުންގެ މަޖިލީހުގެ ބާރާއި ފަނޑިޔާރުގޭގެ ބާރާއި އަދި ސަރުކާރު ހިންގުމުގެ ބާރުވެސް އެއް މީހެއްގެ މި ބަދަލުވެގެން މިދަނީ،" އޭނާ ވިދާޅުވި އެވެ.

އައިމަން ވިދާޅުވީ ދެ އިންތިހާބު އެއްކޮށްލުމުން ރައްޔިތުންގެ ބާރު އެއްކޮށްހެން ކެނޑިގެންދާނެ ކަމަށާއި އޭގެ ސަބަބުން ރައްޔިތުން ކަންކަމުގައި ބައިވެރިވުމާއި ހިޔާލުފާޅުކުރުންވެސް ގެއްލިގެންދާނެ ކަމަށެވެ.

އޭގެއިތުރުން ތަފާތު ހިޔާވަލެއް، ތަފާތު ފިކުރެއް އޭރެއްގެ ސަރުކާރު ހިންގަން ހުންނަ މީހަކާ ތަފާތު ވިސްނުމެއް ދައުލަތުގައި ގެންގުޅުމަކީ ވަރަށް އުނދަގޫ ކަމަކަށް ވެގެންދާނެ ކަމަށް އޭނާ ވިދާޅުވި އެވެ.

"ރައްޔިތުންނާ ގާތުން ހިދުމަތް ފޯރުކޮށްދިނުމާއި ރައްޔިތުންގެ ކަންކަން ރައްޔިތުންވެގެން ރައްޔިތުން ނިންމުމުގެ ބާރު މުޅިން ކެނޑިގެން މިދަނީ. ދެން ހިޔާލު ފާޅުކުރުމާއި ރައްޔިތުން ކަންކަމުގައި ބައިވެރިވުމާއި މި ގާނޫނު އަސާސީގެ ފަރުމާއަކީ. އެކަން އެއްކޮށް ކަހަލަ ގޮތަކަށް ގެއްލިގެން މިދަނީ،" އައިމަން ވިދާޅުވި އެވެ.

"އޭގެ މާނައަކީ ތަފާތު ހިޔާލެއް، ތަފާތު ފިކުރެއް އޭރެއްގެ ސަރުކާރު ހިންގަން ހުންނަ މީހަކާ ތަފާތު ވިސްނުމެއް ދައުލަތުގައި ގެންގުޅުމަކީ ވަރަށް އުނދަގޫ ކަމަކަށް ވެގެންދާނެއޭ. ހަމަ ހާއްސަ އިރުޝާދުގެ ދަށުން ހިނގާ ނިޒާމަކަށް ބަދަލުވެގެންދާނެ. އެހެންވީމަ އަހަރެއް ދެކޭ ގޮތުގައި މިއީ ދެ އިންތިހާބު އެއްކުރާ ވޯޓެއް ނޫން."

މިއީ ބާރުތައް މަރުކަޒުވެ އެމީހެއްގެ މުށުތެރެއަށް ޖަމާވެ، ގާނޫނުއަސާސީގެ ފަރުމާ މިހާރު މިއޮތް ވަރަށްވުރެ ގެއްލިގެންދާނެ ވޯޓެއްކަން ފާހަގަކުރައްވާ އައިމަން ވިދާޅުވީ ދެ އިންތިހާބު އެއްކޮށްލާ ވޯޓަކީ އެންމެ މީހެއްގެ ބާރުގެ ދަށަށް ބާރުތައް ދޫކޮށްލަން އެއްބަސްވުމާ ގުޅޭގޮތުން ނަގާ ވޯޓެއް ކަމަށެވެ.

އޭނާ ވިދާޅުވީ ސުވާލަކީ ދެ އިންތިހާބު އެއްކޮށްލުމާ ގުޅޭ ސުވާލެއް ނޫން ކަމަށާއި ސުވާލަކީ މުސްތަގުބަލުގައި ގައުމު ބައްޓަންކުރާނެ ގޮތް ކަމަށެވެ.

ފެންނަ ނުފެންނަ ވޯޓުގައި އަހާނީ ކޮން ސުވާލެއް؟

މި ވޯޓުގައި ރައްޔިތުންނާ ކުރިމަތިލާނީ ގާނޫނުއަސާސީއަށް ގެންނަން ނިންމާފައިވާ ބަދަލާ ގުޅޭ ސުވާލެކެވެ. އެއީ؛

"ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެކުގައި ބޭއްވުމަށާއި ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވާފައިވާ ގާނޫނުއަސާސީ އަށް 8 ވަނަ އިސްލާހު ގެނައުމުގެ ބިލު ރައީސުލްޖުމްހޫރިއްޔާ ތަސްދީގު ކުރައްވަން ފެނޭ ހެއްޔެވެ؟"

މި ވޯޓުގައި ރައްޔިތުންގެ ތާއިދު އޮތް ކަމަށް ފާސްވެއްޖެނަމަ، 2028 ވަނަ އަހަރުގެ ރިޔާސީ އިންތިހާބާއި މަޖިލިސް އިންތިހާބު ބާއްވާނީ އެކުއެކީގައެވެ.