ދިރާގު ދިވެހި ޕްރިމިއާ ލީގުގައި މިރޭ ބުރު ސްޕޯޓްސް ކްލަބް 3-0 އިން ބަލިކޮށް ނިއު ރޭޑިއަންޓް ސްޕޯޓްސް ކްލަބުން މުހިންމު މޮޅެއް ހޯދައިފި އެވެ.
މި ނަތީޖާއާ އެކު ނިއު އިން ވަނީ 12 މެޗުން 23 ޕޮއިންޓް ހޯދައިފަ އެވެ. ލީގުގެ ދެ ވަނައިގައި އޮތް އޮޑި ސްޕޯޓްސް ކްލަބަށް 12 މެޗުން 28 ޕޮއިންޓް އަދި، އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށް 12 މެޗުން 34 ޕޮއިންޓް ލިބިފައިވެ އެވެ. އަދި، ކުރިން ތިން ވަނައިގައި އޮތް ބުރު މިހާރު ހަތަރެއްގައި އޮތީ 12 މެޗުން 20 ޕޮއިންޓާ އެކު އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ރަނގަޅު ކުޅުމެއް ދައްކަމުން ދިޔަ ނިއު އިން ލީޑުނެގީ 26 ވަނަ މިނިޓްގައި ހަސަން ރާއިފް އަހުމަދު (ހަންނަ) ޖެހި ގޯލުންނެވެ. މިއީ، ނިއުގެ ކެޕްޓަން، އަލީ ފާސިރު (ސެންޓޭ) ދިން ބޯޅައަކުން އޭރިއާތެރެއިން ތިރިތިރިން ގޯލަށް ފޮނުވާލައިގެން ހަންނަ ޖެހި ގޯލެކެވެ.
ދަގަނޑޭ (ކ) އާއި ސެންޓޭ މިރޭގެ މެޗުގެ ތެރެއިން.--- ފޮޓޯ: އަދަދު ސްޕޯޓްސް / އިމޭޖަސް.އެމްވީ
ބުރުން ނަތީޖާ ހަަމަހަމަކުރެވޭތޯ މަސައްކަތް ކުރަމުންދިޔަ ނަމަވެސް ދެ ވަނަ ހާފު ފެށިގެން ހަތް ވަނަ މިނިޓްގައި ނިއު އިން ދެ ވަަނަ ލަނޑު ޖެހި އެވެ. މެޗުގެ 52 ވަނަ މިނިޓްގައި މަތިން އައި ބޯޅައެއް ބުރުގެ ޑިފެންސް ފަހަތުން ސެންޓޭ އަށް ލިބުމުން އޭނާ ވަނީ ތިރިތިރިން ގޯލުގެ ދުރު ކަނަށް އަމާޒުކޮށްލައިފަ އެވެ. އޭގެ ހަ މިނިޓް ފަހުން، ނިއުގެ ތިން ވަނަ ލަނޑު ޖެހީ ވެސް ސެންޓޭ އެވެ. މިއީ، ހަންނަ ދިން ބޯޅައެއް އޭރިއާ ތެރެއިން ކޮންޓްރޯލް ކުރުމަށް ފަހު، ޖާގައެއް ހޯދާލައި، ގޯލުގެ ތިރީ ކަނަށް އަމާޒުކޮށްލައިގެން ސެންޓޭ ޖެހި ގޯލެކެވެ.
ނިއު އިން މި މެޗުގެ ފަހު ވިއްސަކަށް މިނިޓަށް ވަނީ ބަދަލަކަށް އަލީ އަޝްފާގު (ދަގަނޑޭ) ކުޅެން އަރުވައިފަ އެވެ. މިއީ، މި އަހަރު ނިއު އަށް ސޮއިކުރުމަށް ފަހު އަނިޔާ އިން ރަނގަޅުވެ ދަގަނޑޭ ކުޅުނު ފުރަތަމަ މެޗެވެ. އަދި، ފުރަތަމަ ޑިވިޝަނުގައި ދެ އަހަރަށް ވުރެން ގިނަ ދުވަސް ފަހުން ދަގަނޑޭ ކުޅުނު ފުރަތަމަ މެޗެވެ.
މި މެޗުގައި ނިއުގެ ގޯލު ބެލެހެއްޓީ، ކ. ގުރައިދޫ ގޯލްކީޕަރު، އަހުމަދު ސަމީރު އެވެ.
ދިވެހި ޕްރިމިއާ ލީގުގެ ކުޅުން ދެން ފަށާނީ ޖެނުއަރީ ހަތަރު ވަނަ ދުވަހު އެވެ. އެ ދުވަހު ހަވީރު، ޔުނައިޓެޑް ވިކްޓަރީ (ޔޫވީ) ކުޅޭނީ މާޒިޔާއާ އެވެ. އަދި އެރޭ ކުޅޭ މެޗުގައި ވިކްޓަރީ ސްޕޯޓްސް ކްލަބުން ވެލެންސިއާއާ ބައްދަލުކުރާނެ އެވެ. އަދި، ފަސް ވަނަ ދުވަހު، ހަވީރު، ކްލަބް އީގަލްސް އާއި ޓީސީ ސްޕޯޓްސް ކްލަބް ބައްދަލުކުރާއިރު، އެރޭ ބުރު އާއި ގްރީން ސްޓްރީޓްސް ވާދަކުރާނެ އެވެ. އަދި، ހަ ވަނަ ދުވަހުގެ ރޭ ނިއު އިން ކުޅޭނީ އޮޑިއާ އެެވެ.
