އިދިކޮޅު އެންމެ ބޮޑު ޕާޓީ އެމްޑީޕީގެ ހަރުގެ ހުންނަ ސަރަހައްދުގައި ބެރިކޭޑު ޖަހައި ގިނަ އަދަދެއްގެ ފުލުހުން ހަރަކާތްތެރިވާން ފަށައިފި އެވެ.
ޗާންދަނީ މަގުގައި އެމްޑީޕީ ހަރުގެ ހުންނަ ސަރަހައްދުގައި ދެ ފަރާތުން ފުލުހުން ވަނީ ބެރިކޭޑު ޖަހައިފަ އެވެ. އެ ސަރަހައްދުގައި ގިނަ އަދަދެއްގެ ފުލުުހުން މިވަގުތު ވެސް ދަނީ ހަރަކާތްތެރިވަމުންނެވެ.
އެ ސަރަހައްދުގައި ހުރި އަދަދުގެ ނޫސްވެރިޔާ ބުނީ އަމީނިއްޔާ ސްކޫލް ކުރިމައްޗަށްވާ ސަރަހައްދުގައި އެސްއޯ ފުލުހުން ވެސް ހަރަކާތްތެރިވަމުންދާ ކަމަށެވެ.
ފުލުހުން އެ ސަރަހައްދުގައި ހަރަކާތްތެރިވަމުން ދަނީ ކިހިނެއްވެގެން ކަމެއް އަދި ނޭނގެ އެވެ.
އެމްޑީޕީގެ ޗެއާޕާސަން، ފައްޔާޒް އިސްމާއިލް ވިދާޅުވީ މިރޭ އެމްޑީޕީގެ އެއްވެސް ހަރަކާތެއް ވެސް ރާވާފައި ނެތް ކަމަށެވެ. ފުލުހުން އެ ސަރަހައްދުގައި ހަރަކާތްތެރިވަމުން ދަނީ ބިރު ދެއްކުމުގެ ގޮތުން ކަމަށް އެނާ ވިދާޅުވި އެވެ.
"އެއްވެސް ހަރަކާތެއް ވެސް މިރޭ އަޅުގަނޑުމެން ރާވައިފައެއް ނެތް، އެއްގޮތަކަށް ވެސް ނޭނގެ ކީއްކުރަންކަމެއް، ބިރު ދެއްކުން ނޫން އެހެން ކަމެއް ނޫން، އެކަމަކު އަޅުގަނޑުމެން ބިރެއް ނުގަންނާނެ،" ފައްޔާޒް ވިދާޅުވި އެވެ.
އެމްޑީޕީ ހަރުގެ ސަރަހައްދުގައި ގިނަ އަދަދެއްގެ ފުލުހުން މިރޭ ހަރަކާތްތެރިވަމުން އަންނައިރު، ރޭގައި ވެސް ފުލުހުން އެ ސަރަހައްދުގައި ހަރަކާތްތެރިވެފައިވެ އެވެ.
މާލެ ތެރެއަށް ފުލުހުން ނުކުމެ އުޅުން ގިނަވީ މިދިޔަ ހުކުރު ދުވަހުގެރޭ އެމްޑީޕީން ކުރިއަށް ގެންދިޔަ ސުލްހަވެރި މުޒާހަރާއާ ގުޅިގެންނެވެ. މީގެ މަހެއްހާ ދުވަސް ކުރިން ފެށިގެން އާންމުކޮށް އަންގައި އިއުލާނު ކޮށްގެން ކުރިއަށް ގެންދަން މަސައްކަތް ކުރި އެ މުޒާހަރާއަށް ފުލުހުން ހުރަސް އަޅައި ހުއްޓުވި އެވެ.
އެ މުޒާހަރާ ނިންމައިލީ ސަރުކާރަށް ފަސް ޑިމާންޑެއް ކުރުމަށްފަހު އެވެ. އެ ޑިމާންޑުތައް ސަރުކާރުން ނުފުއްދައިފި ނަމަ އަންނަ ނޮވެމްބަރު 17، ގައި އަނެއްކާވެސް ބޮޑު މުޒާހަރާއެއް ބާއްވަން ރޭ ބޭއްވި އެ ޕާޓީގެ ގައުމީ މަޖިލީހުން ވަނީ ނިންމައިފަ އެވެ.
