ލިޒްބަން (ސެޕްޓެމްބަރު 22) - ކޯޗިން ކެރިއަރުގެ ކޮންމެ ވެސް ހިސާބަކުން، އުފަން ގައުމު، ޕޯޗުގަލް އަށް އެނބުރި އަންނަން ޖެހޭނެކަން އެނގޭ ކަމަށާއި އެކަމަކު އުންމީދުކުރީ ގައުމީ ޓީމުގެ ވަޒީފާ އަށް އަންނަން ޖެހޭނެ ކަމަށް ކަމުގައި ދާދި ފަހުން ބެންފީކާއާ ހަވާލުވި ކޯޗު ހޯސޭ މޮރީނިއޯ ބުނެފި އެވެ.
މިދިޔަ މަހު ތުރުކީގެ ފެނަބާޗޭގެ ކޯޗުކަމުން މޮރީނިއޯ ވަކިވިއިރު، ގެއްލުނީ، ކޮލިފައިންގައި ބެންފީކާ އަތުން ބަލިވުމުންނެވެ. ބެންފީކާގެ ކޯޗަކަށް އެންމެ ފަހުން ހުރި ބްރޫނޯ ލާޖް، އެ މަގާމުން ވަކިކުރީ ޗެމްޕިއަންސް ލީގުގައި އަންގާރަ ދުވަހުގެރޭ އަޒަރުބައިޖާންގެ ގަރަބަގް އަތުން ބަލިވުމުންނެވެ. ހެޑް ކޯޗެއްގެ ގޮތުގައި މޮރީނިއޯ، ކެރިއަރު ފެށީ 2000 ވަނަ އަހަރު ބެންފީކާގައި ހުރެ އެވެ. އެއީ އެ ފަހަރު ސީޒަން ފަށައިގެން ހަތަރު ވަނަ ހަފްތާގައި، ޖަރުމަނުގެ ކޯޗު ޔުޕް ހެއިންކެސް ބެންފީކާގެ މަގާމުން ވަކިވުމުންނެވެ. އެ އަހަރު ބެންފީކާ އަށް ކޯޗުކޮށްދިނުމަށް ފަހު، މޮރީނިއޯ ވަނީ އެ ޓީމު ދޫކޮށްލައިފަ އެވެ.
ބެންފީކާ އަށް 25 އަހަރަށް ފަހު އެނބުރި އައިސް، މޮރީނިއޯ، އެ ޓީމަށް އިރުޝާދުދިން ފުރަތަމަ މެޗުގައި، ބެންފީކާ ވަނީ އޭވީއެސް އަތުން 3-0 އިން މޮޅުވެފަ އެވެ. އެ މެޗަށް ފަހު، މޮރީނިއޯ ބުނީ، ބެންފީކާގެ ކޯޗުގެ އޮފާއާ އެކު، ހައިރާންކަން ލިބިގެންދިޔަ ކަމަށެވެ.
"ތެދަށް ބުނާކަމަށްވާނަމަ، އަހަންނަށް އަބަދުވެސް އުންމީދު އޮތް އެނބުރި ޕޯޗުގަލް އަށް އަންނަން ޖެހޭނެކަމުގެ. އެކަމަކު ހީކުރެވިފައި އޮތީ، އަހަރެން އަންނާނީ ގައުމީ ޓީމުގެ ވަޒީފާ އަށޭ،" މޮރީނިއޯ، 62، ބުންޏެވެ. "އަހަންނަށް އެނގޭ، ލަހެއް ނުވެ، ގައުމީ ޓީމުގެ އެކަން ވެސް ވާނެކަން. އަހަރެންގެ އުންމީދު އަދިވެސް އެ ކަމަށް އެބައޮތް، އެއީ އަހަރެންގެ ކެރިއަރު މިދާ ގޮތުން އޮތް ގޮތް ކަމަށް ފެންނަނީ، ދެން، އެކަމު މި ވަގުތު މި ހުރީ ބެންފީކާގައި، މިއީ ވެސް ބޮޑު ކްލަބެއް،"
މޮރީނިއޯ ވަނީ ކޯޗިން ކެރިއަރުގައި 10 ކްލަބަކަށް އިރުޝާދުދީފަ އެެވެ. ބާސެލޯނާގެ އެސިސްޓަންޓް ކޯޗުކަން ވެސް ކުރި މޮރީނިއޯ، ބެންފީކާ އިން ކޯޗިން ކެރިއަރު ފެށުމަށް ފަހު، ޗެލްސީ، މެންޗެސްޓާ ޔުނައިޓެޑް، ރެއާލް މެޑްރިޑް، އިންޓަ މިލާން، ޓޮޓެންހަމް ހޮޓްސްޕާސް، ޕޯޓޯ، ރޯމާ، ފެނަބާޗޭ އަދި އުނާއީ އަށް ކޯޗުކޮށްދިނެވެ.
ދާދި ފަހުން، އިޓަލީން ވެސް މޮރީނިއޯއާ ޓީމު ހަވާލުކުރުމުގެ މަޝްވަރާތަކެއް ކުރިއަށްގެންގޮސް، ފަހުން އެކަން ހުއްޓައިލައި، ޖެނާރޯ ގަޓޫސޯއާ އެ ޓީމު ހަވާލުކުރި އެވެ.
