ލަންޑަން (މެއި 17) - އިނގިރޭސި އެފްއޭ ކަޕްގެ ފައިނަލުގައި މިރޭ މެންޗެސްޓާ ސިޓީ އަތުން 1-0 އިން މޮޅުވެ، ކްރިސްޓަލް ޕެލަސް އިން އެ ކްލަބްގެ 120 އަހަރުވީ ދިގު ތާރީހުގައި ފުރަތަމަ ތަށި ހޯދައިފި އެވެ.
މިއީ، އެފްއޭ ކަޕް ފައިނަލުގައި ޕެލަސްގެ ތިން ވަނަ ފެނިލުމެވެ. މީގެ ކުރިން ދެ ފަހަރު ވެސް ޕެލަސް އިން ފައިނަލުގައި ކުޅެން ޖެހުނީ މެންޗެސްޓާ ޔުނައިޓެޑާ އެވެ. އެ ގޮތުން، ޔުނައިޓެޑް އަތުން ޕެލަސް ވަނީ 1990 އާއި 2016 ގެ ފައިނަލުން ބަލިވެފަ އެވެ.
މިއީ، 2016/2017 ވަނަ އަހަރުގެ ސީޒަނަށް ފަހު، ޕެޕް ގާޑިއޯލާގެ ކޯޗުކަމުގައި ކުޅޭ ޓީމެއް، މުބާރާތެއްގެ ތަށްޓެއް ނުލިބި ސީޒަނެއް ނިންމާލި ފުރަތަމަ ފަހަރެވެ. އެ ފަހަރަކީ، ގާޑިއޯލާ ސިޓީއާ ހަވާލުވި ފުރަަތަމަ އަހަރެވެ.
މި ސީޒަނުގައި ސިޓީން އިނގިރޭސި ފުޓްބޯޅަ ސީޒަން ފަށަން ކުޅޭ ޗެރިޓީ ޝީލްޑް ކާމިޔާބުކުރި ނަމަވެސް، އެއީ އިނގިރޭސި ފުޓްބޯޅައިގައި ޓްރޮފީއެެއްގެ ގޮތުގައި ފާހަގަކުރާ މުބާާރާތެއް ނޫނެވެ. އެހެން ކަމުން، މިއީ އަށް އަހަރު ތެރޭ ސިޓީން ބޮޑު ކާމިޔާބެއްނުލިބި ސީޒަން ނިންމާލާ ފުރަތަަމަ ފަހަރެެވެ.
ވެމްބްލީ ސްޓޭޑިއަމްގައި މިރޭ ކުޅުނު ފައިނަލް މެޗުގައި ފެނިގެންދިޔަ ހަމައެކަނި ލަނޑު ޕެލަސް އަށް ޖަހައިދިނީ އިނގިރޭސި މިޑްފީލްޑަރު، އެބްރެޗީ އެޒޭ އެވެ. މިއީ މެޗުގެ 16 ވަނަ މިނިޓްގައި ޑެނިއަލް މުނޯޒް ދިން ބޯޅައަކުން އެޒޭ ޖެހި ގޯލެކެވެ. އެޒޭ ވަނީ، ސެމީ ފައިނަލުގައި އެސްޓަން ވިލާ އަތުން މޮޅުވި މެޗުގައި ވެސް ލަނޑު ޖަހައިފަ އެވެ.
މި މެޗުގައި، ސިޓީ އަށް އެއްވަރުކޮށްދޭން އެންމެ ރަނގަޅު ފުރުސަތެއް ލިބިގެންދިޔައީ، ފުރަތަމަ ހާުފުގަ އެވެ. އެ ގޮތުން، އެ ޓީމަށް ލިބުނު ޕެނަލްޓީއަކުން މިސްރުގެ ފޯވާޑް އޮމަރު މާމޫޝަށް ކާމިޔާބެއް ނުކުރެވުނެވެ. މާމޫޝްގެ ޕެނަލްޓީ ޕެލަސްގެ ކީޕަރު، ޑީން ހެންޑަސަން މަތަކުރީ އެވެ.
ޕެލަސް އިން ވަނީ މި މެޗުގައި އިތުރު ގޯލެއް ޖަހައިފަ އެވެ. އެކަމަކު، އެ ޓީމުގެ މުނޯޒް ޖެހި ގޯލު، ވީޑިއޯ އެސިސްޓަންޓް ރެފްރީ (ވީއޭއާރް) އިން އޮފްސައިޑް ކަމަށް ނިންމީ އެވެ. އެއީ، އޮފްސައިޑްގައި ހުރި ޕެލަސްގެ އިސްމާއިލާ ސާ ގައިގައި ބޯޅަ ޖެހުމުންނެވެ.
ފަހު ވަގުތާ ޖެހެންދެން ވެސް ސިޓީން އެޓޭކްކުރަމުން ދިޔައިރު، ގޯލެއް ޖެހޭތޯ ކުރި މަސައްކަތް ޕެލަސްގެ ކީޕަރު، ހެންޑަސަން ވަނީ ހުއްޓުވައިފަ އެވެ.
