ތުރުކީ ސަރުކާރުން ރާއްޖެއަށް ހިލޭއެހީގެ ގޮތުގައި ހަދިޔާކުރި ޑޯގަން ކްލާސްގެ މަނަވަރަކީ އިންޑިއާ ކަނޑުގެ ރައްކާތެރިކަން ދެމެހެއްޓުމަށް އެޅުނު މުހިންމު ފިޔަވަޅެއް ކަމަށް ޑިފެންސް މިނިސްޓްރީން މިރޭ ބުނެފި އެވެ.
ޑިފެންސް މިނިސްޓްރީން ނެރުނު ނޫސް ބަޔާނެއްގައި ބުނީ އެ މަނަވަރު ލިބުމަކީ އިންޑިއާ ކަނޑުގެ ރައްކާތެރިކަން ދެމެހެއްޓުމުގައި ބައިނަލްއަގުވާމީ މުޖުތަމައުގެ ޒިންމާދާރު މެންބަރެއްގެ ހައިސިއްޔަތުން ރާއްޖެއިން އަދާކުރަން ޖެހޭ ދައުރު އަދާކުރުމުގެ ގާބިލު ބަޔަކަށް ސިފައިން ހެދުމަށް ކުރެވުނު މުހިންމު ކަމެއް ކަމަށެވެ.
"ދިވެހިރާއްޖެއިން އަދާކުރަން ޖެހޭ ދައުރު ފުރިހަމައަށް އަދާކުރުމުގެ ގާބިލުކަން ހުރި ބަޔަކަށް ދިވެހި ސިފައިން ހެއްދެވުމަށް، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުހައްމަދު މުއިއްޒު ކަނޑައަޅުއްވާފައިވާ ލަނޑުދަނޑިއަށް ވާސިލުވުމަށް ނެގުނު ވަރަށް މުހިންމު ފިޔަވަޅެއް،" ޑިފެންސުން ބުންޏެވެ.
ޑިފެންސް މިނިސްޓްރީން ބުނީ ތުރުކީ ހަދިޔާކުރާ މަނަވަރު ރާއްޖެއަށް ގެނެސް، ރާއްޖޭގެ ދިފާއީ ބާރުގެ ހިދުމަތަށް ނެރެ ސިފައިން އެ އުޅަނދު އޮޕަރޭޓް ކުރުމާ ގުޅޭ ގޮތުން ތުރުކީގައި ދިވެހި ސިފައިން ތަމްރީނު ކުރަމުންދާ ކަމަށެވެ.
ރައީސް މުއިއްޒު އެންމެ ބޮޑު އިސްކަމެއް ދެއްވާ ސިޔާސަތަކީ ރާއްޖޭގެ މިނިވަންކަމާއި ސިޔާދަތާއި އިސްތިގުލާލު ހިމާޔަތްކޮށް ރައްކާތެރި ކުރުންކަން ވެސް ޑިފެންސުން ފާހަގަކުރި އެވެ.
"ސިފައިންގެ ހިދުމަތަށް އިތުރުކުރެވޭ މި ގާބިލުކަމަކީ، ގާނޫނު އަސާސީ އާއި ސިފައިންގެ ގާނޫނުގައި ކަނޑައަޅައި ބަޔާންކޮށްފައިވާ މަސްއޫލިއްޔަތާއި ވާޖިބުތައް އަދާކުރުމުގައި ދިވެހިރާއްޖޭގެ ގައުމީ ދިފާއީ ބާރަށް ލިބިގެންވާ ބޮޑު ކުރިއެރުމެއް،" ޑިފެންސުން ބުންޏެވެ.
ތުރުކީން ރާއްޖެއަށް ހަދިޔާކުރި މަނަވަރަކީ ރާއްޖޭގެ ދިފާއީ ކަންކަމުގައި އެހީތެރިވެދިނުމުގެ ގޮތުން ދެ ގައުމުގެ ދެމެދުގައި ވެފައިވާ އެމްއޯޔޫގެ ދަށުން ހަދިޔާކުރި އުޅަނދެކެވެ.
ތުރުކީން ހަދިޔާކުރަނީ މަނަވަރަކީ އެ ގައުމުގައި އުފައްދާފައިވާ ޓީސީޖީ ވޮލްކަން (ޕީ-343) މަނަވަރެވެ. ޖަރުމަނު ކުންފުންޏަކުން ފަރުމާކޮށްފައިވާ މި އުޅަނދަކީ ވަޔާއި ކަނޑުގެ މަގުން ހަމަލާދިނުމުގެ ގާބިލިއްޔަތުކަން ލިބިފައިވާ އުޅަނދެކެވެ. މިއީ މެއި، 1984 އިން ފެށިގެން ތުރުކީ އަސްކަރިއްޔާއިން ބޭނުންކުރަމުން އައިސްފައިވާ އުޅަނދެކެވެ.
އަންނަ ޖުލައި މަހުގެ ތެރޭގައި މި މަނަވަރު ރާއްޖެ އަންނާނެ ކަމަށް ތުރުކީން ބުނެފައިވާއިރު، މަނަވަރު ބޭނުންކުރަން ދިވެހި ސިފައިން ދަނީ މިހާރު ވެސް ތަމްރީނުތައް ހޯދަމުންނެވެ. މިދިޔަ ހަފުތާގައި ސިފައިން ފެށި މި ތަމްރީނުތައް ހަދަމުން ދަނީ ތުރުކީގެ ނޭވަލް ފޯސަސް ކޮމާންޑުންނެވެ. އަދި އަންނަ މަހުގެ 9 ގައި ތަމްރީނުތައް އެއްކޮށް ނިންމާލާނެ އެވެ.
ތުރުކީން މި މަނަވަރު ހަދިޔާކުރަން ނިންމާފައި މިވަނީ މިސައިލްތަކެއްގެ ބަދަލުގައި ތުރުކީގެ އިންވެސްޓަރަކަށް ޓޫރިޒަމްގެ ބޭނުންތަކަށް ފަޅުތަކެއް ދޭން މަސައްކަތް ކުރަމުން އަންނަ ކަމަށް އަޑުއަރާފައިވާ ދަނޑިވަޅެއްގަ އެވެ. އެކަމާ ގުޅިގެން ސަރުކާރުން މިހާތަނަށް އެއްވެސް ބަހެއް ނުބުނާއިރު، މިކަން ދޮގެއް ނުކުރެ އެވެ.
