ސްޕެޝަލް އިކޮނޮމިކް ޒޯނު (އެސްއީޒެޑު) ގެ ގޮތުގައި ކަނޑައެޅޭ ސަރަހައްދުތަކުގައި ދެމެހެއްޓެނިވި ޓައުންޝިޕްތައް ތަރައްގީކުރަން ބޭނުންވާ ނަމަ މަދުވެގެން 500 މިލިއަން ޑޮލަރު އިންވެސްޓުކުރަން ޖެހޭ ގޮތަށް އެސްއީޒެޑު ބޯޑު އޮފް އިންވެސްޓްމަންޓުން މިއަދު ކަނޑައަޅައިފި އެވެ.
ދެމެހެއްޓެނިވި ޓައުންޝިޕް ތަރައްގީކުރުމަށް ރަސްމީ މާނައެއް ކަނޑައަޅައި އެ ބޯޑުން ގެޒެޓުކުރި އިއުލާނުގައި ވަނީ މި އިންވެސްޓުމަންޓުގެ މުޅި އަދަދު ހާއްސަކުރެވިފައި ހުންނަންވާނީ ހަމައެކަނި ޓައުންޝިޕް ތަރައްގީކުރުމުގެ ބަޔަށް ކަމަށެވެ.
އެސްއީޒެޑުތަކުގައި ޓައުންޝިޕް ނުވަތަ މީހުން ދިރިއުޅޭ ސަރަހައްދުތަކުގެ މަގުސަދަކީ މުއްސަނދި އާއިލާތަައް ރާއްޖޭގައި އުޅުމަށް ޝައުގުވެރިކުރުމެވެ. އެސްއީޒެޑު އިންވެސްޓްމަންޓު ބޯޑުން ވަނީ މިފަދަ މަޝްރޫއުތަކުގައި ހިމެނޭނެ ތަންތަން ވެސް ކަނޑައަޅާފަ އެވެ.
އޭގެ ތެރޭގައި ހިމެނެނީ:
- ލަގްޒަރީ ވިލާތަކާއި މަތީ ފެންވަރުގެ ގެދޮރު ހިމެނޭ ގޮތަށް ރިއަލް އެސްޓޭޓު ތަރައްގީކުރުން
- އެންމެ މަތީ ފެންވަރުގެ ޓޫރިސްޓު ރިސޯޓާއި ހޮޓާ އަދި މެރީނާ
- ރާއްޖެއަކީ މި ސަރަހައްދުގައި ސިއްހީ އަދި ތައުލީމީ ފަތުރުވެރިކަމުގެ މަންޒިލެއްގެ ގޮތުގައި ގާއިމުކުރުމަށް, ދުނިޔޭގެ ފެންވަރުގެ ސިއްހީ މަރުކަޒުތަކާއި ތައުލީމީ ވަސީލަތްތައް
- ދިގު މުއްދަތަކަށް ތިމާވެށި ދެމެހެއްޓެނިވި ގޮތެއްގައި ހިމާޔަތްކުރަން މަގުފަހިކުރަން, މަދުވެގެން 60 ޕަސެންޓު އިޔާދަކުރަނިވި ހަކަތަ ބޭނުންކޮށްގެން ހިންގޭ ހަކަތަ އާއި ކުނި މެނޭޖުކުރުމަށް އަމިއްލައަށް ފުދުންތެރި އިންފްރާސްޓްރަކްޗާ
- ކާބޯތަކެތީގެ ރައްކާތެރިކަމަށް ޓަކައި ޒަމާނީ ޒަމާނީ ދަނޑުވެރިކަމުގެ ޓެކްނޮލޮޖީތަކާއި އެކުއަކަލްޗާ މެދުވެރިކޮށް، އިންވެސްޓްމަންޓް ބޯޑުން ކަނޑައަޅާ މަދުވެގެން ދެ މުހިންމު ބާވަތެއްގެ ނުވަތަ އުފެއްދުމެއްގެ ގައުމީ އިމްޕޯޓުގެ މަދުވެގެން 50 ޕަސެންޓު ކަށަވަރުކުރުން
- މުއްސަނދި އާއިލާތައް ރާއްޖޭގެ އެކި ސްޕެޝަލް އިކޮނޮމިކް ޒޯންތަކުގައި ދިރިއުޅުމަށް ޝައުގުވެރިކުރުވުމަށް ބޭނުންވާ ސަޕޯޓް އިންފްރާސްޓްރަކްޗާ
- މުވައްޒަފުންނާއި އެ މީހުންގެ އާއިލާތަކަށް ބޭނުންވާ ސަޕޯޓް އިންފްރާސްޓްރަކްޗާ އާއި އަސާސީ ހިދުމަތްތައް، މީގެ ތެރޭގައި ގެދޮރު، ތައުލީމު، ސިއްހީ ދުމަތް، އަދި މުނިފޫހިފިލުވުމުގެ ހިދުމަތްތައް ހިމެނޭގޮތަށް.
އެސްއީޒެޑު ބޯޑު އޮފް އިންވެސްޓްމަންޓުން ބުނީ ޓައުންޝިޕްތަކުގެ މާނަކުރުން ރަސްމީކުރުމުގެ ބޭނުމަކީ އެސްއީޒެޑު ގާނޫނުގެ ދަށުން ރިވިއުކުރުމުގެ މަރުހަލާ އަވަސްކުރުމެވެ.
މި މާނަކުރުމުގެ ސަބަބުން ރާއްޖޭގެ ތަރައްގީގެ މަގުސަދުތަކަށް އެހީތެރިވެދޭ ދެމެހެއްޓެނިވި, އަގުހުރި, ސްޓްރެޓެޖިކް ގޮތުން ފައިދާހުރި އިންވެސްޓުމަންޓުތައް އިތުރުކުރަން ސަރުކާރުން ދޭ އަހައްމިއްޔަތުކުރަން ކަށަވަރުކޮށްދެވޭނެ ކަމަށް ވެސް އެ ބޯޑުން ބުންޏެވެ.
އެސްއީޒެޑު ގާނޫނުގެ ދަށުން މިހާތަނަށް ތަަރައްގީކުރުމުގެ ހުއްދަ ދޫކުރީ "ޕްރޮޖެކްޓު ސޯލާ ސިޓީ" އަށެވެ. މި ޕްރޮޖެކްޓުގެ މައިގަނޑު ބޭނުމަކީ ފްލޯޓިން ސޯލާ ޕެނަލްތަކެއް ބޭނުންކޮށްގެން މާލޭ ސަރަހައްދަށް ބޭނުންވާ ކަރަންޓު އުފައްދައި, ފޯރުކޮށްދިނުމެވެ.
ކެނެޑާގެ ނެޑާގެ އަބްރަކްޒަސް ކުންފުނިން ހިންގާ މި ޕްރޮޖެކްޓަށް 187 މިލިއަން ޑޮލަރު އިންވެސްޓުކުރާނެ ކަމަށް އިކޮނޮމިކް މިނިސްޓްރީން ބުނެފައިވެ އެވެ. އޭގެ ތެރެއިން 100 މިލިއަން ޑޮލަރު އިންވެސްޓުކުރަނީ ސޯލާ ހަކަތައިގެ ނިޒާމަށެވެ. ބާކީ 87 މިލިއަން ޑޮލަރު އިންވެސްޓުުކުރަނީ ރިއަލް އެސްޓޭޓާއި ސިނާއީ ސަރަހައްދެއް ގާއިމުކުރުމަށެވެ.
