ޕޮލިސް ކޯޕަރޭޓިވް ސޮސައިޓީ (ޕޮލްކޯ) އުވާލުމަށް މަސައްކަތް ކުރި ކަމަށާއި އެކަމަށް ހުރަސްއެޅި 19 ވަނަ ރައްޔިތުންގެ މަޖިލީހުން ކަމަށް ކުރީގެ ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެއްޖެ އެވެ.

މިހާރު ފެންމަތިވެފައިވާ ޕޮލްކޯގެ ކޮރަޕްޝަނުގެ ބިޔަ މައްސަލަތަކާ ގުޅިގެން "އަދަދު" އާ ވާހަކަދައްކަވަމުން ހަމީދު ވިދާޅުވީ، އަަލަށް އެކުލަވާލި ފުލުހުންގެ ގާނޫނުގެ މަސައްކަތުގެ ތެރެއިން ފުލުހުންގެ ވިޔަފާރި ކުންފުނި އުވާލުމަށް އޭނާ ކޮމިޝަނަރަކަށް ހުންނެވިއުރު ގިނަ މަސައްކަތްތަކެއް ކުރެއްވި ކަަމަށެވެ.

"ނަމަވެސް އެކަމަށް މަޖިލީހުން ހުރަސް އެޅީ. އެބޭފުޅުން ދެއްކެވި ސަބަބުތަކަކީ ހިނގަމުންދާ މަޝްރޫއުތަކާއި ސިފައިންގެ ވިޔަފާރި ކުންފުނި ސިފްކޯ ވުޖޫދުގައި އޮތުން،" ހަމީދު ވިދާޅުވި އެވެ.

ޕޮލްކޯ އުވާލެވޭ ގޮތް ނުވުމުން، 2021 ގައި މަޖިލީހުން ފާސްކޮށް ތަސްދީގުކުރި ފުލުހުންގެ ގާނޫނުގެ ދަށުން އެ ކުންފުނި، ކޯޕަރޭޓް ގަވަނަންސް އޮނިގަނޑަށް ފެއްތުމަށް ކުރިއަށްވުރެ ހަރުކަށި މާއްދާތަކެއް ހިމެނިކަން ވެސް ހަމީދު ފާހަގަކުރެއްވި އެވެ.

މި މައްސަލާގައި ހަމީދު ވާހަކަދައްކަވާފައި މިވަނީ، ޕޮލްކޯގެ ކޮރަޕްޝަންގެ މައުލޫމާތު ހިމެނޭ ރިޕޯޓެއް 2019 ގައި އޭނާއަށް ފޮނުވި ކަމަށް މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެފައި ވަނިކޮށެވެ. ނަމަވެސް ހަމީދު އެކަން ދޮގުކުރައްވަ އެވެ.

އޭނާ ވިދާޅުވީ ޕޮލްކޯގެ ކޮރަޕްޝަނާ ގުޅޭ އެއްވެސް ރިޕޯޓެއް ނުލިބޭ ކަމަށެވެ. އަދި އެފަދަ އެހެން ރިޕޯޓުތައް ލިބުމާއެކު ކަމާބެހޭ އިދާރާތަކާއި ފުލުހުންގެ ޕްރޮފެޝަނަލް ސްޓޭންޑާޑް ކޮމާންޑާ ހިއްސާކުރެއްވި ކަމަށްވެސް ހަމީދު މިއަދު ވިދާޅުވި އެވެ.

ގިނަ އަހަރުތަކެއްވަންދެން ޕޮލްކޯގެ ތެރޭގައި ކޮރަޕްޝަންގެ އެތައް އަމަލެއް ހިންގާ ކަމުގެ ތުހުމަތު އެކި ފަހަރުމަތިން ވަނީ ކުރެވި އެވެ. މިހާރު ފެންމަތިވެގެން އުޅޭ ޕޮލްކޯ ފްލެޓުތަކުގެ މައްސަލައިގައި ވެސް އޮޑިޓަރުން ގިނަ މައްސަލަތަކެއް ފާހަގަކޮށްފައިވެ އެވެ. މި މަޝްރޫއާ ގުޅޭ ބައެއް ލިޔުންތައް ވެސް އޮޑިޓަަށް ލިބިފައި ނުވާ ކަމަށް ވެސް އޮޑިޓު އޮފީހުން ބުނެފައިވެ އެވެ.