މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ޗީފް އެގްޒެކެޓިވް އޮފިސަރު މުހައްމަދު ވަޖީހު އިބްރާހިމް އެ މަގާމުން ވަކިކޮށްފި އެވެ.
ޕްރައިވެޓައިޒޭޝަން އެންޑް ކޯޕޮރަޓައިޒޭޝަން ބޯޑް (ޕީސީބީ) އިން ބުނީ އެމްޕީއެލްގެ ސީއީއޯގެ މަގާމުންނާއި ބޯޑު ޑިރެކްޓަރު ކަމުގެ މަގާމުން ވަޖީހު ވަކިކޮށްފައިވާ ކަމަށެވެ.
ވަޖީހު މަގާމުން ވަކި ކުރި ސަބަބެއް ޕީސީބީއިން ހާމައެއް ނުކުރެ އެވެ. އެ މަގާމަށް އޭނާ އައްޔަން ކުރީ ނޮވެމްބަރު 28، 2023، ގަ އެވެ.
އެމްޕީއެލްގެ ސީއީއޯގެ މަގާމަށް ވަޖީހު އައްޔަން ކުރުމުގެ ކުރިން އެ ކުންފުނީގައި ނުވަ އަހަރު އެކި މަގާމުތައް އޭނާ ފުރުއްވި އެވެ. އޭގެ ކުރިން އެޑިއުކޭޝަން ދާއިރާގައި މަސައްކަތް ކުރެއްވި އެވެ. އަދި ރައްޔިތުންގެ މަޖިލީހުގެ މެންބަރަކަށް ވެސް ހުންނެވި އެވެ.
ވަޖީހުގެ ލީޑާޝިޕްގެ ދަށުން އެމްޕީއެލް އިން ވަނީ މިދިޔަ އަހަރު ބައެއް މުހިންމު ލަނޑުދަނޑިތައް ހާސިލްކޮށްފަ އެވެ. އެގޮތުން، ސީ-ޓު-އެއާ ކާގޯގެ ހިދުމަތް ތައާރަފު ކުރުމާއި އިންޓަނޭޝަނަލް ބަންކަރިންގެ ހިދުމަތް ފެށުން ހިމެނެ އެވެ.
ޕީސީބީގެ އެންގުމަކުން ވަޖީހު މިއަދު މަގާމުން ވަކި ކުރިއިރު، ސަރުކާރުގެ ބައެއް އިސް މަގާމުތަކަށް ވަނީ މި ފަހުން ވެސް ބަދަލުތަކެއް ގެނެސްފަ އެވެ. އެގޮތުން ޓުއަރިޒަމް މިނިސްޓަރު އިބްރާހިމް ފައިސަލް ވެސް ވަނީ މަގާމުން ވަކިކޮށްފަ އެވެ.
ފައިސަލް މަގާމުން ވަކި ކުރުމަށްފަހު އޭނާގެ ބަދަލުގައި އެ މިނިސްޓްރީއަށް ވަޒީރަކު އައްޔަން ކުރުމުގެ ބަދަލުގައި ރައީސް ޑރ. މުހައްމަދު މުއިއްޒު ވަނީ ޓުއަރިޒަމް މިނިސްޓްރީ، ތިމާވެއްޓާ ބެހޭ މިނިސްޓްރީއާ އެއްކޮށްލައިފަ އެވެ.
