ދޫނިދޫ ޖަލުގައި ބަންދުކޮށްފައި ހުރި މީހެއްގެ ނަމުގައި ޕޯސްޓުން އައި ޕެކޭޖަކާ ހަވާލުވި މީހަކު 20 ދުވަހު ބަންދު ކޮށްފައި ބަހައްޓަން ކްރިމިނަލް ކޯޓުން އަމުރު ކޮށްފި އެވެ.
ކްރިމިނަލް ކޯޓުގެ އަމުރުގައި ބުނެފައި ވާގޮތުން އެ މައްސަލައިގައި ހައްޔަރުކޮށް ބަންދު ކޮށްފައި ވަނީ އިބްރާހިމް ރަޝާދު 40، މ. ބަދުރު، ކ. މާލެ އެވެ. އޭނާއަކީ މަސްތުވާތަކެތީގެ ރެކޯޑު އޮންނަ މީހެއްކަން ކޯޓު އަމުރުން އެނގެ އެވެ. އޭނާ ބަންދު ކުރަން އަމުރު ކޮށްފައި ވަނީ ކަސްޓޯޑިއަލް ޖަލެއްގަ އެވެ.
ކޯޓުގައި ފުލުހުން ބުނެފައި ވަނީ ރަޝާދު ހަވާލުވަން ދިޔަ ޕެކޭޖު އެޑްރެސް ކޮށްފައިވާ މީހާ އެ މުއްދަތުގައި ހުރީ ދޫނިދޫ ޖަލުގައި ކަމަށެވެ. އަދި ރަޝާދު ހަވާލުވި ޕެކޭޖަކީ އެނާގެ އެއްޗެއް ނޫން ކަމަށް ޖަލުގައި ހުރި މީހާ ބުނެފައިވާ ކަމަށް ވެސް ފުލުހުން ބުންޏެވެ.
ރަޝާދު ހަވާލުވި ޕެކޭޖުން 980 ގުރާމުގެ މަސްތުވާތަކެތި ފެނުނު ކަމަށް ފުލުހުން ކޯޓުގައި ބުންޏެވެ.
އެ މައްސަލައިގެ ތަހުގީގު ނިންމައި ކުރިއަށް އޮތް ހަތް ދުވަހުގެ ތެރޭގައި ޕްރޮސެކިއުޓާ ޖެނެރަލްގެ އޮފީހަށް ފޮނުވޭނެ ކަމަށް ވެސް ކޯޓުގައި ފުލުހުން ބުނެފައިވެ އެވެ.
