ހިއުމަން ރައިޓްސް ކޮމިޝަނާއި އެންޓި ކޮރަޕްޝަން ކޮމިޝަން (އޭސީސީ) ގެ ހުސްވެފައިވާ މަގާމުތަކަށް އައްޔަނު ކުރާ މެންބަރުންނަށް ރުހުން ހޯދުމުގެ މައްސަލަ މިނިވަން މުއައްސަސާތަކާ ބެހޭ ކޮމިޓީއަށް މިއަދު ފޮނުވައިފި އެވެ.

ހިއުމަން ރައިޓްސް ކޮމިޝަނުގެ ހުސްވެފައިވާ ނައިބު ރައީސް ކަމުގެ މަގާމަށް އައްޔަނު ކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަޖިލީހަށް ފޮނުއްވާފައި ވަނީ އެ ކޮމިޝަނުގެ މެންބަރެއްގެ ގޮތުގައި ހުންނެވި މުއުމިނާ ވަހީދު، މ. ޖިއެނާ ގެ ނަމެވެ.

އޭސީސީގެ ހުސްވެފައިވާ މެންބަރުކަމުގެ ދެ މަގާމަށް އައްޔަނު ކުރަން ރައީސް ހުށަހަޅުއްވާފައި ވަނީ އަހުމަދު ނާޝިދު، މއ. ގޯލްޑަންމޫން އާއި އާސިޔާ އަޒީމާ، ރޯޒްވިލާ، ރ. ހުޅުދުއްފާރު ގެ ނަމެވެ.

މަޖިލީހުގެ ދައުރުން މިއަދު ބޭއްވި ޖަލްސާގައި ރިޔާސަތުން ވަނީ އެ ދެ މައްސަލަ ވެސް ދިރާސާ ކުރުމަށް މިނިވަން މުއައްސަސާތަކާ ބެހޭ ކޮމިޓީއަށް ފޮނުވައިފަ އެވެ.

އޭސީސީގެ މަގާމުތަކެއް ހުސްވީ އެ ކޮމިޝަނުގެ ނައިބު ރައީސް، އަބްދުއްސަލާމް އާއި ކޮމިޝަނުގެ މެންބަރު، ތޯހާ މުހައްމަދު އިސްތިއުފާ ދެއްވުމުންނެވެ.

އެ ބޭފުޅުން އޭސީސީން އިސްތިއުފާ ދެއްވީ އެ ދެ ބޭފުޅުންގެ މައްޗަށް ވެސް ބޮޑެތި ތުހުމަތުތަކެއްކޮށް މަގާމުން ވަކި ކުރުމުގެ މަސައްކަތް މަޖިލީހުގައި ހިނގަމުން ދަނިކޮށެވެ.

އެގޮތުން ބިިންވެރިޔާ ސްކީމުގެ މައްސަލަ ތަހުގީގު ކުރުން ލަސް ކުރުމާއި އެހެން ލޯފާމެއްގައި މަސައްކަތް ކުރުން ފަދަ ގާނޫނާ ހިލާފު އެތައް އަމަލެއް ހިންގި ކަމުގެ ތުހުމަތު އެ ދެ ބޭފުޅުންނަށް ކޮށްފައިވެ އެވެ.

ނަމަވެސް އެ ދެ ބޭފުޅުން ވެސް މަގާމުން އިސްތިއުފާ ދެއްވީ ކުރެވުނު ތުހުމަތުތައް ދޮގުކޮށް ރައީސް މުއިއްޒުއަށް ފޮނުއްވި ސިޓީއަކުންނެވެ.