މުޅި ރާއްޖެއަށް މޫސުން ގޯސްވެ، މިހާރު ކުރަމުންދާ ވިއްސާރާގައި ވެރި ރަށް މާލޭގައި އެއްކޮށް ފެންބޮޑުވެއްޖެ އެވެ.
މެޓު އޮފީހުގެ ހުސެއިން ވަހީދު ޕީއެސްއެމްއަށް ދެއްވި އިންޓަވިއުއެއްގައި ވިދާޅުވީ މިހާރު ވެހެމުންދާ ވާރޭގައި ހާއްސަކޮށް މާލޭ ސަރަހައްދަށް ވަރަށް ގިނައިން ވާރޭ ވެހެމުންދާ ކަމަށެވެ. މިއަދު، އެއް ގަޑިއިރުގެ ތެރޭގައި 60 މިލިމީޓަރުގެ ވާރޭ ވެހިފައިވާ ކަމަށް ވެސް ވަހީދު ވިދާޅުވި އެވެ.
"މިދިޔަ 24 ގަޑިއިރަށް ބެލި ނަމަވެސް މާލޭ ސަރަހައްދަށް 140 މިލިމީޓަރުގެ ވާރޭ ވެހިއްޖެ،" އޭނާ ވިދާޅުވި އެވެ. "މިވަގުތު ވަރަށް ބޯކޮށް ވާރޭ ވެހޭ އެބަ، ކުރިއަށް އޮތް ފަސް، ހަ ގަޑިއިރު ވެސް މިވަރަށް ވާރޭ ވެހެމުންދާނެ."
ވަހީދު ވިދާޅުވީ، ވާރޭ ވެހެމުންދަނީ ރިކޯޑު މިންވަރަކަށް ކަމަށެވެ. އެހެންކަމުން މޫސުމަށް ވަރަށް ބޮޑަށް ސަމާލުވެ، ކަނޑުދަތުރު ކުރުމުގައި ވެސް އިންތިހާ ސަމާލުވުމަށް އޭނާ އިލްތިމާސް ކުރެއްވި އެވެ.
"ތަނެއް ދޮރެއް ނޭނގޭ މިންވަރަށް ކަނޑުމައްޗަށް ވެސް ވާރޭ ވެހެމުން ދަނީ،" އޭނާ ވިދާޅުވި އެވެ.
މާލޭ އެއްކޮށް ފެނު އަޑީގައި އޮތް އިރު، ފެން ހިންދުމުގެ މަސައްކަތް ކުރަމުންދާނެ ކަމަށް ބެލެވެ އެވެ. މަގުމަތީގައި ޕާކުކޮށްފައި ހުރި ބައެއް އުޅަނދުތައް ވެސް ވަނީ ފެނާއެކު އޮޔާ ގޮސްފަ އެވެ. އަދި ހިނގާބިނގާވެ އުޅުމަށް ވަރަށް ބޮޑަށް ވަނީ ހުރަސް އެޅިފަ އެވެ.
މޫސުން ގޯސްވުމުގެ ސަބަބުން މެޓް އޮފީހުން ވަނީ މެދުރާއްޖެ ތެރެއަށް އޮރެންޖު އެލާޓެއް ނެރެފަ އެވެ. އެލާޓު ނެރުނީ ބ. އަތޮޅުން ފެށިގެން ތ. އަތޮޅާ ހިސާބަށެވެ.
މޫސުން ގޯސްވުމުގެ ސަބަބުން ވަރަށް ގިނަ ރަށްރަށުގައި ވަނީ ފެންބޮޑުވެފަ އެވެ. އަދި ގަދަ ވިއްސާރައާއެކު ބައެއް ރަށްތަކަށް ވަނީ އުދަ ވެސް އަރައިފަ އެވެ.
