ގެދޮރުވެރިޔާ ސްކީމުގެ ދަށުން ދޫކުރާ 4،000 ފްލެޓުގެ ލިސްޓު އާންމުނުކުރާތީ ނުރުހުން ފާޅު ކުރަން ބަޔަކު ހައުސިން މިނިސްޓްރީއަށް ދިޔުމުން އެތަނުގެ މަސްރަހު ހޫނުވެއްޖެ އެވެ.
މިއަދު ގާތްގަނޑަށް 30 ވަރަކަށް މީހުން މިނިސްޓްރީއަށް ދިޔަ އެވެ. އެމީހުން އެދުނީ ހައުސިން މިނިސްޓަރު އަލީ ހައިދަރުއާ ބައްދަލު ކުރުމަށެވެ. ނަމަވެސް އެއްވި މީހުންނާ ނިސްޓްރީގެ އޮފިޝަލަކު ވެސް ބައްދަލެއް ނުކުރި އެވެ.
ހައުސިން މިނިސްޓްރީގެ ގޯތި ތެރެއަށް މީހުން ވަދެގަތުމުން ފުލުހުން ވަނީ އެ އޮފީހަށް ގޮސް އެއްވި މީހުން ކޮންޓްރޯލް ކުރަން މަސައްކަތްކޮށްފަ އެވެ.
މިނިސްޓަރު ހައިދަރު ކުރިން ވިދާޅުވީ އިއްޔެ ފްލެޓު ލިސްޓު އާންމު ކުރާނެ ކަމަށެވެ. އެކަމަކު، އިއްޔެ ކުއްލިއަކަށް ހައުސިން މިނިސްޓްރީން ބުނީ ފްލެޓު ލިސްޓު އާންމު ކުރުން މުއްދަތެއް ނެތް ގޮތަށް ފަސްކޮށްފައިވާ ކަމަށެވެ.
ރީއިވެލުއޭޓު ކުރުމަށް ފަހު ފުލެޓު ލިސްޓު އިއުލާނު ކުރާނެ ކަމަށް ހައުސިިިން މިނިސްޓަރީން އޭގެ ކުރިން ބުނީ އޮކްޓޯބަރު މަހުގެ ފަހު ހަފުތާގަ އެވެ. ނަމަވެސް އިތުރު ވަގުތު ބޭނުންވާ ކަމަށް ބުނެ މި ހަފުތާއަށް ފަސް ކުރީ އެވެ.
ހައިދަރު މީގެ ކުރިން ވިދާޅުވީ ފްލެޓުގެ ހައްގުވެރިންނަށް މި އަހަރު ތެރޭގައި އެ ފްލެޓްތައް ހަވާލުކޮށް ނިންމާނެ ކަމަށެވެ.
މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ.
އޭގެ ތެރެއިން އެންމެ ފުރަތަމަ ފުލެޓު ލިބޭ 4،000 މީހުންގެ ލިސްޓު އިއުލާނު ކުރިފަހުން އޭސީސީއަށް ހުށަހަޅުނު މައްސަލައަކާ ގުޅިގެން ފުލެޓުތަކުގެ މަސައްކަތް ވަގުތީ ގޮތުން ހުއްޓައިލަން އެ ކޮމިޝަނުން އެންގި އެވެ.
