ރާއްޖޭގައި ފުރަތަމަ ފަހަރަށް ގާއިމުކޮށްފައިވާ ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް) ހުޅުވަން ބޭނުންވާ ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ދޫކޮށްފި އެވެ.
އެމްއެމްއޭ އިން ބުނީ ރާއްޖޭގައި ބޭންކިން ހިދުމަތް ދިނުމަށް ބޭނުންވާ ބޭންކިން ލައިސަންސް ޑީބީއެމް އަށް ދިނީ މިއަދު ކަމަށެވެ. ޑީބީއެމް އަކީ މި ސަރުކާރުން ގާއިމުކުރި، 100 ޕަސެންޓު ސަރުކާރު ހިއްސާވާ ބޭންކެކެވެ.
"މި ބޭންކްގެ ހިދުމަތް ފެށުމުން، އިގުތިސޯދީ އަދި މާލީ ކުރިއެރުމަށް ބޭނުންވާ ދިގު މުއްދަތުގެ ފައިނޭންސިންގެ ހިދުމަތް ދިވެހިރާއްޖޭގައި ތައާރަފު ވެގެންދާނެ ކަމަށް މި އޮތޯރިޓީން ދެކެން،" ޑީބީއެމް އަށް ހުއްދަ ދިނުމާ ގުޅިގެން އެމްއެމްއޭ އިން މީޑިއާތަކަށް ދިން މައުލޫމާތުގައި ބުންޏެވެ.
އެ އިދާރާއިން ބުނި ގޮތުގައި މިއަދު ދިން ހުއްދައިގެ ދަށުން ޑީބީއެމް އިން އޮކްޓޯބަރު 12، 2025 ގެ ކުރިން ބޭންކިން ހިދުމަތްތައް ފަށަން ޖެހޭނެ އެވެ.
ހުއްދަ ހޯދާ، ޑީބީއެމްގެ ހުޅުވާނެ ކަމަށް ސަރުކާރުން ފުރަތަމަ ބުނީ ނިމިދިޔަ ޖުލައި މަހުގެ ތެރޭގަ އެވެ.
ނަމަވެސް ޖުލައި މަހާ ހަމައަށް ވެސް ޑީބީއެމްގެ މަސައްކަތް ނުނިމެ އެވެ. އެ ބޭންކުގެ ރަސްމީ އޮފީސް އަދި އައުޓްލެޓް ހުޅުވަނީ ކުރިން ބިޒްނަސް ސެންޓަރު ކޯޕަރޭޝަން (ބީސީސީ) އިން އެސްއެމްއީ ހަބު ހިންގި އިމާރާތުގެ ފުރަތަމަ ފަންގިފިލާގަ އެވެ. އެ މަސައްކަތް ކުރަނީ އެމްޓީސީސީންނެވެ.
ސެޕްޓެމްބަރު 25، ގައި މިކަން ލަސްވަމުންދާ ސަބަބު ހޯދުމަށް ސުވާލުކުރުމުން މިނިސްޓަރު ސައީދު "އަދަދު" އަށް ވިދާޅުވީ ޑީބީއެމް އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. އަދި ވަރަށް އަވަހަށް އެ މަސައްކަތް ނިމޭނެ ކަމަށް ވެސް ސައީދު ވިދާޅުވި އެވެ.
