ފިނޭންސް މިނިސްޓަރު ޑރ. މުހައްމަދު ޝަފީގު އިސްތިއުފާ ދެއްވަން އެންގެވީ، ނިމިގެން ދިޔަ ހަފުތާގައި މަސްވެރިން ކުރި މުޒާހަރާތަކާ ގުޅިގެން ކަން "އަދަދު" ނޫހަށް އެނގިއްޖެ އެވެ.
ޑރ. ޝަފީގު އިސްތިއުފާ ދެއްވީ އާދީއްތަ ދުވަހު ބޭއްވި ކެބިނެޓު ބައްދަލުވުމުގައި ވެސް ބައިވެރިވެވަޑައިގަތުމަށް ފަހު އެވެ.
ނަމަވެސް އިސްތިއުފާ ދެއްވި ސަބަބެއް އޭނާ ހާމައެއް ނުކުރައްވަ އެވެ.
އެއީ ދުރާލާ ރާވާފައިވާ ނިންމުމެއް ނޫންކަން ޑރ. ޝަފީގުއާ އަރިސް ބައެއް މީހުން މި ނޫހަށް ވިދާޅުވި އެވެ. ނަމަވެސް އިސްތިއުފާގެ ފަހަތުގައިވާ ސަބަބެއް އެ މީހުންނަށް ވެސް ނޭނގެ އެވެ.
އެ މައުލޫމާތު އެނގޭ މަސްދަރަކުން ބުނީ އިސްތިއުފާ ދެއްވަން ޑރ. ޝަފީގަށް އެންގެވީ މަސްވެރިންނަށް 17 މިލިއަން ރުފިޔާ ނުދީ އޮވެގެން އެ މަސްވެރިން މުޒާހަރާ ކުރަން ޖެހުމުން ކަމަށެވެ.
އޯގަސްޓް 24، އިން ފެށިގެން ސެޕްޓެމްބަރު 25، ގެ ނިޔަލަށް މިފްކޯއަށް ކިރުވާފައިވާ މަހަށް މަސްވެރިންނަށް ދޭން އޮތީ 17.35 މިލިއަން ރުފިޔާ އެވެ. އެ ފައިސާ މަސްވެރިންނަށް ޖަމާކުރީ މުޒާހަރާތަކާ ގުޅިގެންނެވެ.
ނިމިގެން މިދިޔަ ހަފުތާގައި ގއ. އަތޮޅަށް ދިޔަ ފިޝަރީޒު މިނިސްޓްރީގެ ޓީމު އެ އަތޮޅުގެ ބައެއް ރަށްރަށް ނޭރުވީ މަސްވެރިންނަށް ފައިސާ ނުދީ އޮތުމުންނެވެ.
ފިޝަރީޒް މިނިސްޓްރީގެ ޑެޕިއުޓީ މިނިސްޓަރު އަހުމަދު ޝާފިއު އިސްކޮށް ހުންނެވި އެ ޓީމު، ގއ. ދާންދޫ، އަދި އެ އަތޮޅު ދެއްވަދޫން ބޭރުކުރި އެވެ. ރ. އަތޮޅު ދުވާފަރު މަސްވެރިން ވެސް ހިތްހަމަ ނުޖެހުން ފާޅުކޮށް، ސަރުކާރާ ދެކޮޅު ޝުއޫރުތައް ލިޔެ ބެނާތައް ދަމާފައިވެ އެވެ.
ފިޝަރީޒު މިނިސްޓްރީގެ ޓީމެއް ގއ. އަތޮޅަށް ދިޔައީ، ދޯނި ފަހަރުގައި ލޮނު ފެނުން މަސް ފިނިކުރާ ނިޒާމު ގާއިމު ކުރުމުގެ މަޝްރޫއާ ބެހޭ މައުލޫމާތު ދިނުމަށެވެ.
ފައިސާ ނުދީ އޮތުމުގެ ސަބަބުން މަސްވެރިން ރަތަށް ދިޔައިރު ރައީސް ޑރ. މުހައްމަދު މުއިއްޒު ހުންނެވީ އދ. އާންމު މަޖިލީހުގައި ތަގުރީރު ކުރެއްވުމަށް ނިއުޔޯކަށް ކުރައްވާ ދަތުރުގަ އެވެ.
"އެ ދަތުރު ވަރަށް ކާމިޔާބު ކަމާއެކު ކުރިޔަށް ދަނިކޮށް، ރާއްޖޭގައި މަސްވެރިން މުޒާހަރަން ފެށީ. ކިހާ ފައިސާއެއް ނުދީ އޮވެގެންތޯ މަސްވެރިން މުޒާހަރާ ކުރީ ރައީސް ބެއްލެވިއިރު އޮތީ އެންމެ 17 މިލިއަން. އެވަރުގެ ކުޑަ އެއްޗެއް ނުދީ އޮވެގެން މުޒާހަރާ ކުރަން ޖެހުމަކީ މައްސަލައެއް ކަމަށް ދެކެވަޑައިގަތީ. އެހެންވެ އިސްތިއުފާ ދެއްވަން އެންގެވީ،" އަދަދު ނޫހާ ވާހަކަ ދެއްކެވި މަސްދަރުން ވިދާޅުވި އެވެ.
ފިނޭންސް މިނިސްޓަރުގެ މަގާމުން ޝަފީގު އިސްތިއުފާ ދެއްވުމުން، އެ މަގާމަށް އައްޔަން ކުރެއްވީ ފޮރިން މިނިސްޓަރަކަށް ހުންނެވި މޫސާ ޒަމީރެވެ. އަދި ފޮރިން މިނިސްޓަރަކަށް ޑރ. އަބްދުﷲ ހަލީލު ބަދަލު ކުރެއްވުމަށް ފަހު، ހެލްތު މިިނިސްޓަރުކަން ހަވާލުކުރެއްވީ ރައީސް އޮފީހުގެ ޕަބްލިކް ޕޮލިސީ ސެކްޓަރީގެ މަގާމުގައި ހުންނެވި އަބްދުﷲ ނާޒިމް އެވެ.
