ބޭންކް އޮފް މޯލްޑިވްސް (ބީއެމްއެލް) ކާޑުތަކުގެ ލިމިޓަށް ބަދަލު ގެންނަން އެ ބޭންކުގެ ބޯޑުން ނިންމި ޕްރޮފެޝަނަލް ނިންމުމަކީ "މާލީ ބަގާވާތެއް" ކަމަށް ރައީސް ޑރ. މުހައްމަދު މުއިއްޒު ހަދައި، އެކަމުގެ ތަހުގީގު ފުލުހުން ފަށާފައި ވަނިކޮށް، ބީއެމްއެލްގެ ސީއީއޯ ކާލް ސްޓުމަކް ރާއްޖޭން ފުރައިފި އެވެ.
އިތުބާރު ހުރި މަސްދަރަކުން "އަދަދު" ނޫހަށް މައުލޫމާތު ދިން ގޮތުގައި ކާލް އިއްޔެ ފުރީ ދުބާއީ އަށެވެ.
"ދުބާއީ އަށް ދިޔައީ، ކާލްގެ އާއިލާ އެތަނުގައި އުޅޭތީ،" އޭނާ ބުންޏެވެ.
ބީއެމްއެލް އާއި އެމްޑީޕީ ގުޅިގެން އޯގަސްޓު 25 ގައި ބަގާވާތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ތަހުގީގުކުރާކަން ފުލުހުން ހާމަކުރީ އޯގަސްޓު 26, ގެ ރޭ ގަ އެވެ.
"ތަހުގީގުގައި، ހޯދަން ޖެހޭ އެންމެހައި މައުލޫމާތު އެއްކުރުމާއި، ބަލަންޖެހޭ އެންމެހައި ކަންކަން ތަފްސީލުކޮށް ދިރާސާކުރުމުގެ މަސައްކަތް ދަނީ ކުރަމުން. މީގެ އިތުރުން، ފިޔަވަޅު އަޅަންޖެހޭ ފަރާތެއްވާ ނަމަ އެކަން ދެނެގަތުމާއެކު، ތަހުގީގު މަރުހަލާގައި ކުރަންޖެހޭ އެންމެހައި މަސައްކަތްތައް ވެސް ދަނީ ކުރަމުން," ފުލުހުން އޭރު މީޑިއާތަކަށް ފޮނުވި މެސެޖެއްގައި ބުނެފައިވެ އެވެ.
titledesc
ކާޑުތަކުގެ ލިމިޓަށް ގެންނައި ބަދަލުތައް އިއުލާނުކުރީ އޯގަސްޓު 25 ގަ އެވެ. އެ ނިންމުމާ ގުޅިގެން ރައްޔިތުން ރަތަށް ދިޔަ އެވެ. އެހެންވެ ސަރުކާރުން ޕްރެޝަރުކޮށްގެން އެ ދުވަހުގެ ހަވީރު އެ ނިންމުން ކުރިން އޮތް ގޮތަށް ބަދަލުކުރި އެވެ.
އާދީއްތަ ދުވަހު ގެންނަން އުޅުނީ މާ ކުރީއްސުރެއް ރޭވިގެން ގެންނަން އުޅުނު ބަގާވާތެއް ކަމަށް ރައީސް މުއިއްޒު ވެސް ވިދާޅުވެފައިވެ އެވެ.
"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު މި ދެންނެވި ހުރިހާ ޑޮޓުތަކެއް ގުޅިގެންދާކަން އެނގޭނެ، މިކުރި ކަންތައް މިއީ، ހަމަ ޝިޔާމު [މިނިސްޓަރު ޝިޔާމު] ވެސް ފާހަގަކުރެއްވި ގޮތަށް ވާނީ ހަމަ އެޓެމްޕެޑް ކޫއަކަށް، އެކުރި ބަޔަކު ކުރީ،" ރައީސް މުއިއްޒު ވިދާޅުވި އެވެ.
ނަމަވެސް، ތުހުމަތު އެ ކުރާ ބަގާވާތަށް ހަފުތާއެއް ވެގެން ދިޔައިރު، އެ މައްސަލައިގައި އެއްވެސް މީހަކާ ސުވާލެއް ކުރި ކަމަށް، ތަނެއް ބަލައި ފާސްކުރި ކަމަށް އަދި ތުހުމަތު ކުރެވޭ މީހަކު ހުރިކަން ހާމައެއް ނުކުރެ އެވެ.
"އެއްވެސް ބަޔަކު އަދި މިހައިތަނަކަށް އެއްވެސް ސިފައެއްގައި ފުލުހުން ނީންނާނެ މިވެނި މީހަކަށް ޝައްކު ކުރެވެޔޭ މިވެނި މީހަކު އިންވޯލްވްވެޔޭ ބުނެފަކައެއް، ނީންނާނެ އިނގޭތޯ؟ އެ މައުލޫމާތު ފުލުހުން ހާމަ ކުރާނެ، އަޅުގަނޑަށް އެނގިފައެއް ނެތް އަދި މިހައިތަނަކަށް އެއްވެސް ފަރާތަކަށް މިވެނި މީހެއްގެ ޝައްކު ކުރެވޭ މީހެކޭ މިކަމުގައި މިވެނި މީހެކޭ، ތަހުގީގުކޮށް އެގޮތަކަށް ނިންމައިފައެއް ނެތް އިނގޭތޯ؟" ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވި އެވެ.
މާލީ ބަގާވާތުގެ ތަހުގީގުކުރާކަން ފުލުހުން އިއުލާނު ކުރުމުގެ ކުރިން އެއީ ބަގާވާތެއްކަން ދެއްކުމަށް ލިޔެއެކުލަވާލަން ސަރުކާރުން މަސައްކަތް ކުރި އެވެ. އެގޮތަށް ލިޔުންތައް ގެންނަން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލް ބައެއް ނޫސްތަކަށް އިރުޝާދު ދެއްވި އެވެ.
