މި އަހަރު ނިމުމުގެ ކުރިން ރާއްޖޭގައި ހެލިކޮޕްޓަރުގެ ހިދުމަތް ފަށަން ކުރާ މަސައްކަތުގެ ތެރެއިން އެ ހިދުމަތް ދޭން ޝައުވެރިވާ ފަރާތްތައް ހޯދުމަށް ޓްރާންސްޕޯޓް މިނިސްޓްރީން އިއުލާނުކޮށްފި އެވެ.
އެ މިނިސްޓްރީން އިއްޔެ ކުރި އިއުލާނެއްގައި ވަނީ އެމަޖެންސީ ހާލަތްތަކުގައި ބޭނުން ކުރުމަށާއި ފަތުރުވެރިން އުފުލުމަށް ހެލިކޮޕްޓަރުގެ ހިދުމަތް ދިނުމަށް ޝައުގުވެރިވާ ފަރާތްތަކުން އެކްސްޕްރެޝަންސް އޮފް އިންޓްރެސްޓް (އީއޯއައި) ހުށަހަޅަން ހުޅުވާލައިފަ އެވެ.
މި މަޝްރޫއުގެ ދަށުން ހެލިކޮޕްޓަރު ބޭނުންކޮށްގެން ބަލިމީހުން އުފުލުމުގެ ހިދުމަތާއި ސާޗް އެންޑް ރެސްކިއު ހިދުމަތުގެ އިތުރުން ފަތުރުވެރިކަމަށް އެހީތެރިވުމުގެ ގޮތުން ވިޔަފާރި އުސޫލުން އެތެރޭގެ އާންމު އުދުހުންތަކުގެ ހިދުމަތް ވެސް ދޭން ޖެހޭނެ ކަމަށް މިނިސްޓްރީން ބުންޏެވެ.
ހެލިކޮޕްޓަރުގެ ހިދުމަތް ދިނުމަށް އެދި ހުށަހަޅާ ފަރާތްތަކުގެ ތެރެއިން ހޮވޭ ފަރާތަކަށް 10 އަހަރު ފަތުރުވެރިން އުފުލުމަށް އެކްސްކްލޫސިވިޓީ ދޭނެ ކަމަށް ވެސް ޓްރާންސްޕޯޓް މިނިސްޓްރީގެ އިއުލާނުގައި ފާހަގަކޮށްފައިވެ އެވެ.
ޝައުގުވެރިވާ ފަރާތްތަކުން މި މަހު 19، ގެ ކުރިން މެންދުރު 2:00 ގެ ކުރިން އީއޯއައި ހުށަހެޅޭނެ އެވެ.
މިނިސްޓްރީން ބުނީ މި މަސައްކަތަށް ހޯދަނީ ރާއްޖެ ފަދަ ޖަޒީރާ ގައުމެއްގައި ހެލިކޮޕްޓަރުގެ ހިދުމަތް ދިނުމުގައި ކުރިމަތިވާނެ ދަތިތަކާއެކުވެސް ރައްކާތެރި އަދި ރަނގަޅު ހިދުމަތެއް ދޭނެ ފަރާތެއް ކަމަށެވެ.
އީއޯއައި ހުށަހަޅާ ފަރާތްތަކަށް މިނިސްޓްރީން ޕްރޮޕޯސަލް ހުށަހެޅުމަށް ފުރުސަތު ދޭނެ އެވެ. ހެލިކޮޕްޓަރުގެ ހިދުމަތް ދޭނެ ފަރާތެއް ހޮވާނީ ކުންފުނިތަކުން ހުށަހަޅާ ބިޑުތަކަށް ބެލުމަށްފަހު އެވެ.
މި ސަރުކާރުން ހެލިކޮޕްޓަރުގެ ހިދުމަތް ދިނުމަށް ވަޒީރުންގެ މަޖިލީހުން ފާސްކޮށް އެކަމަށް "ވަރަށް އަވަހަށް" ހުޅުވާލާނެ ކަމަށް ސަރުކާރުން ބުނީ ޖެނުއަރީ 28، ގަ އެވެ. އޭގެ ފަހުން ރައީސް ޑރ. މުހައްމަދު މުއިއްޒު މާޗު 15، ގައި ވަނީ އެ ހިދުމަތް މި އަހަރު ނިމުމުގެ ކުރިން ފެށޭނެ ކަމަށް ވިދާޅުވެފަ އެވެ.
މީގެ ކުރިން ޓްރާންސްޕޯޓް މިނިސްޓްރީން ވަނީ ލިކޮޕްޓަރުގެ ހިދުމަތް ދޭން ފެށުމަށްޓަކައި ގާނޫނީ ލަފާ ދޭނެ ބަޔަކު ހޯދަން އިއުލާނުކޮށްފަ އެވެ.
އެކަމާ ގުޅިގެން މިނިސްޓަރު މުހައްމަދު އަމީން މެއި 20، ގައި ވިދާޅުވީ ހިދުމަތް ފެށުމަށް ތައްޔާރުކުރަން ޖެހޭ އާރްއެފްޕީއައި (ރިލަޔަބިލިޓީ، އެވެއިލަބިލިޓީ، މެއިންޓެއިނަބިލިޓީ އެންޑް ސޭފްޓީ އިންޑިކޭޓާ) އެކުލަވައިލުމުގެ މަސައްކަތް އޮތީ ގާތްގަނޑަކަށް ނިމިފައި ކަަމަށާއި އެ އުސޫލު ގެޒެޓް ކުރުމުން، ހެލިކޮޕްޓަރު އޮޕަރޭޓްކުރާނެ ބަޔަކު ވަރަށް އަވަހަށް ލިބޭނެ ކަމަށެވެ. އޭރު ބަޔަކު ހޯދުމަށް އިއުލާނެއް ނުކުރެ އެވެ.
