ހުކުރު ދުވަހު ތިލަފުށިން ފުރައިގެން މ. އަތޮޅުގެ ރިސޯޓަކަށް ދަތުރުކުރަމުން ދަނިކޮށް ގެއްލުނު ދޯނި ހޯދަން އެމްއެންޑީއެފްގެ އަސްކަރީ ޑްރޯންތައް ބޭނުން ނުކުރާ ސަބަބު ހާމަ ކުރަން އެމްއެންޑީއެފް އިން ދެކޮޅު ހަދައިފި އެވެ.

އެމްއެންޑީއެފް އިން އިއްޔެ ބުނީ، ގެއްލުނު ދޯނި ހޯދަން ވައިގެ މަގުން ބޭނުންކުރަނީ މޯލްޑިވިއަންގެ މަތިންދާބޯޓެއް ކަމަށެވެ. ފަހުން އެނގުނު ގޮތުގައި ބޭނުންކުރީ މޯލްޑިވިއަންގެ ސީޕްލޭނެކެވެ. އެ މައުލޫމާތާއެކު މި އޮޕަރޭޝަނުގައި ޑްރޯންތައް ބޭނުންނުކުރާ ސަބަބު ހޯދުމަށް މި ނޫހުން ވަނީ އެދިފަ އެވެ.

ނަމަވެސް މިހާތަނަށް ވެސް އެމްއެންޑީއެފްގެ ތަރުޖަމާނު ވިދާޅުވަމުން ގެންދަވަނީ، މިކަމުގައި އެކްސް އެކައުންޓާއި ޓެލެގްރާމް ގްރޫޕުގައި ހިއްސާކުރި މައުލޫމާތު ފިޔަވާ އިތުރު މައުލޫމާތެއް ދެވެން ނެތް ކަމަށެވެ. ޑްރޯން ބޭނުންނުކުރާ ސަބަބު ހޯދުމަށް ތަކުރާރުކޮށް އެދުމުން ވެސް އެމްއެންޑީއެފުން ބުނީ ބަހެއް ނެތް ކަމަށެވެ.

މިއަދު ހެނދުނު ސިފައިން ބުނި ގޮތުގައި ގެއްލިގެން ހޯދަމުން ދަނީ މ. އަތޮޅު މެދުފުށި އައިލެންޑް ރިޒޯޓަށް ދަތުރުކުރަމުން ދިޔަ “AAA-37” ނަމަކަށް ކިޔާ ދޯންޏެކެވެ. އެ ދޯނީގައި ތިބީ ދިވެއްސަކާއި ތިން ބަންގްލަދޭޝް މީހުން ކަމަށް ވެސް ސިފައިން ބުނެ އެވެ.

އެ ދޯނި ހޯދުމަށް ހިންގާ އޮޕަރޭޝަނާ ގުޅިގެން ސިފައިންގެއިން އިއްޔެ ބުނީ، ކަނޑުމަގުން ދޯނި ހޯދުމަށް އެމްއެންޑީއެފް ކޯސްޓްގާޑު ޝަހީދު އަލީ އާއި މޯލްޑިވިއަންގެ ސީޕްލޭނުން ކަނޑާއި ވައިގެމަގުން، މ. ރަތްމަންދޫގެ އިރުމަތީ ބިތުން ބޮޑު ސަރަހައްދެއް ބަލާފައިވާ ކަމަށެވެ. މިއަދު ހެދުނާ ހަމައަށް އެ ސަރަހައްދުގެ 4519 އަކަ ނޯޓިކަލް މޭލު ބަލާފައިވެ އެވެ.

ރާއްޖޭގެ ބޮޑު ބަޔަކަށް ހުކުރު ދުވަހުން ފެށިގެން ވައިގަދަވާނެ ކަމަށް ލަފާކޮށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އޮތީ ރީނދޫ އެލާޓް ނެރެފި އެވެ. މާލޭ ސަރަހައްދަށް ވެސް އިއްޔެ ވަރަށް ބޮޑަށް ވައި ގަދަވެ، ބޯކޮށް ވާރޭ ވެސް ވެހުނެވެ.