ރާއްޖޭގެ އިގުތިސޯދީ ކުރިއެރުން ދެމެހެއްޓުމަށް ރާއްޖޭން އެކުލަވާލާފައިވާ މާލީ ރިފޯމު އެޖެންޑާ ތަންފީޒު ކުރުން ކޮންމެހެން ބޭނުންތެރި ކަމަށް ވޯލްޑް ބޭންކުން ބުނެފި އެވެ.
އިއްޔެ ވޯލްޑް ބޭންކުން ވަނީ މިއަހަރުގެ "މޯލްޑިވްސް ކަންޓްރީ އަޕްޑޭޓް" ޝާއިއުކޮށްފަ އެވެ. އެ ރިޕޯޓުގައި ވަނީ ރާއްޖޭގެ އިގުތިސޯދީ ހާލަތާއި މެދު ރާސްތާގައި ރާއްޖޭގެ އިގުތިސޯދަށް އަންނާނެެ ބަދަލުތަކާ ގުޅޭ އަންދާޒާތައް ހިމަނާފަ އެވެ.
"ރާއްޖޭގެ އިގުތިސޯދީ ކުރިއެރުން ދެމެހެއްޓުމަށްޓަކައި ސަރުކާރުގެ ފިސްކަލް ރިފޯމް އެޖެންޑާ ތަންފީޒުކުރުމަކީ ކޮންމެހެން ބޭނުންތެރި ކަމެއް. މި އިސްލާހީ މަސައްކަތްތަކުގައި ވޯލްޑް ބޭންކުން އަބަދުވެސް ރާއްޖެއަށް އެއްބާރުލުން ދޭނެ," އެ ރިޕޯޓުގައި ވޯލްޑް ބޭންކުން ދިވެހިރާއްޖެ އާއި ސްރީ ލަންކާ އަދި ނޭޕާލް އަށް ކަނޑައަޅާފައި ހުންނަވާ ކަންޓްރީ ޑިރެކްޓަރު ފާރިސް އެޗް ހަދާދު-ޒާވޮސް ވިދާޅުވި އެވެ.
ސަރުކާރުން އިގުތިސޯދީ އެޖެންޑާއަކަށް އަމަލުކުރާނެ ކަމުގެ ޔަގީންކަން ދީފައިވާ ކަމަށް ވޯލްޑް ބޭންކުން ބުނެފައިވެ އެވެ. އެއީ, ސަބްސިޑީތައް ރިފޯމް ކުރުމާއި, ދައުލަތުގެ ކުންފުނިތައް ހަރުދަނާ ކުރުމާއި, އާސަންދައިގައި ހުރި ބާގަނޑުތައް ބެއްދުމާއި, ކެޕިޓަލް ހަރަދުތައް އަލުން ތަރުތީބުކުރުން ހިމެނޭ އެޖެންޑާ އެކެވެ.
އެގޮތުން, ވޯލްޑް ބޭންކުން ސަބްސިޑީ ޓާގެޓު ކުރުމަށް ބޭނުން ނިޒާމު ގާއިމު ކުރުމަށާއި މިހާރު އޮތް ސަބްސިޑީގެ ނިޒާމު ފޭސްއައުޓްކޮށް ބޭނުން ކުރުން ހުއްޓާލުމަށް ބޭނުންވާ އެހީތެރިކަން ފޯރުކޮށްދޭނެ ކަމަށް އެ ބޭންކުން ބުނެފައިވެ އެވެ.
"ސަރުކާރު ހިއްސާވާ ކުންފުނިތަކުގެ ބަލިކަށިކަން ހައްލުކުރުމާއި، ސިއްހީ ހަރަދުގެ އެފިޝަންސީ އިތުރުކުރުމާއި، އިންވެސްޓްމަންޓްތަކުގެ ސްޓްރެޓެޖިކް ޕްލޭނިން ހަރުދަނާކުރު އޭގެ ތެރޭގައި ހިމެނޭ," ވޯލްޑް ބޭންކުން ރާއްޖެއަށް ދެމުންދާ ފަންނީ ލަފާގެ ތަފްސީލު ދެއްވަމުން ފާރިސް ވިދާޅުވި އެވެ.
މި ސަރުކާރުގެ އިގްތިސާދީ މެނިފެސްޓޯ އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި ވޯލްޑް ބޭންކުން ބަލައިގަންނަ ކަމަށް ރައީސް ޑރ. މުހައްމަދު މުއިއްޒު މީގެކުރިން ވިދާޅުވެފައިވެ އެވެ.
ވޯލްޑް ބޭންކުން ލަފާކުރަނީ ރާއްޖޭގެ އިގުތިސޯދު މިއަހަރު 4.7 ޕަސެންޓުން ކުރިއަރާނެ ކަމަށެވެ. އައިއެމްއެފް އިން ވަނީ މި އަހަރު ރާއްޖޭގެ އިގްތިސާދީ ދުވެލި 3.3 ޕަސެންޓު ދަށްވާނެ ކަމަށް ލަފާކޮށްފަ އެވެ.
މި އަހަރު ރާއްޖޭގެ އިގްތިސާދު ކުރިއަރާނީ 5.5 ޕަސެންޓު ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ލަފާ ކޮށްފައިވާ އިރު، ސަރުކާރުން ލަފާކުރާ ގޮތުގައި މި އަހަރު ރާއްޖޭގެ އިގްތިސާދީ ދުވެލި ހުންނާނީ 6.7 ޕަސެންޓުގަ އެވެ.
