މާދަމާރޭ ބާއްވަން މަސައްކަތް ކުރަމުން އައި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އިންތިހާބު ކުރިއަށް ގެންދަން އެކަށީގެންވާ މާހައުލެއް ނެތް ކަމަށް ބުނެ، އިންތިހާބު ފަސްކޮށްފި އެވެ.
ދެ ފަހަރެއްގެ މަތިން، ކޮމިޝަނާ އޮފް ސްޕޯޓްސް މުހައްމަދު ތޮލާލް، އެންގުމުން ވެސް ބެޑްމިންޓަން އެސޯސިއޭޝަންގެ އިންތިހާބުގެ ކަންކަން ދިޔައީ ކުރިއަށެވެ. ތޮލާލް، އެ ގޮތަށް އެންގެވީ، ބެޑްމިންޓަން އެސޯސިއޭޝަންގެ އަސާސީ ގަވާއިދުގައި ހުރި މައްސަލަތައް ހައްލުކޮށްގެން އިންތިހާބެއް ބޭއްވުން އެއީ އެންމެ ރަނގަޅު ގޮތް ކަމަށްވާތީ އެވެ.
އޭގެ ފަހުން، އެންޓި ކޮރަޕްޝަން ކޮމިޝަން (އޭސީސީ) އިން ބެޑްމިންޓަން އެސޯސިއޭޝަންގެ އޮފީހަށް ވަދެ، ރެއިޑްކުރި އެވެ. އެއީ، އެ ކޮމިޝަނަށް ހުށަހަޅާފައިވާ ބެޑްމިންޓަން އެސޯސިއޭޝަންގެ ކޮރަޕްޝަން މައްސަލައެއްގަ އެވެ. އޭގެ ފަހުން، އެންޓި ކޮރަޕްޝަން ކޮމިޝަނުން އެންގީ، ބެޑްމިންޓަން އެސޯސިއޭޝަންގެ އިންތިހާބާ ގުޅޭ މި ކޮރަޕްޝަންގެ މައްސަލައިގެ ތަހުގީގު ކުރިއަށްދާތީވެ، ވަކި އެއްޗެއް އަންގަންދެން އިންތިހާބުގެ ކަންކަން މަޑުޖައްސާލުމަށެވެ.
"22 މާރިޗު 2024 ވަނަ ދުވަހަށް ތާވަލުކުރެވިފައިވާ ބެޑްމިންޓަން އެސޯސިއޭޝަނުގެ އަހަރީ ޢާންމު ޖަލްސާގެ ކަންކަން ކުރިއަށް ގެންދާނެ އެކަށިގެންވާ މާޙައުލެއް އޮތްކަމަށް މި އެސޯސިއޭޝަނަށް ނުފެންނާތީވެ, އަހަރީ އާންމު ޖަލްސާ ފަސްކުރެވިފައިވާ ވާހަކަ އެންމެހާ މެންބަރުންގެ މަޢުލޫމާތަށްޓަކައި ދެންނެވީމެވެ.،" މިރޭ، ބެޑްމިންޓަން އެސޯސިއޭޝަނުން ގެޒެޓްކުރި އިއުލާނުގައިވެ އެވެ.
ބެޑްމިންޓަން އެސޯސިއޭޝަންގެ އިންތިހާބު ބާއްވަން ނިންމާފައި އޮތީ، އައްޑޫ އިކުއޭޓްރަލް ވިލެޖުގައި މާދަމާރޭ 21:30 ގަ އެވެ.
ބެޑްމިންޓަން އެސޯސިއޭޝަންގެ ރައީސްގެ މަގާމު ތިން ވަނަ ދައުރަކަށް ފުރުއްވަމުން އަންނަ މޫސާ ނާޝިދު (މޫސަ) އަށް ވެސް ކޮރަޕްޝަންގެ ތުހުމަތުތަކެއް އަމާޒުވެ އެވެ. އޭނާ ކުރިއަށް އޮތް އިންތިހާބުގައި ވާދަކުރަން ކެންޑިޑެސީ ހުށަހެޅީ ނައިބު ރައީސްގެ މަގާމަށެވެ.
ރައީސްގެ މަގާމަށް ވާދަކުރަނީ، ބެޑްމިންޓަން އެސޯސިއޭޝަންގެ ކުރީގެ ޖެނެރަލް ސެކްރެޓަރީ، އިޝްފާން މުހައްމަދު (އިއްޕަ) އާއި ނުވަ ފަހަރު ގައުމީ ޗެމްޕިއަންކަން ހޯދާފައިވާ މުހައްމަދު އަޖުފާން (އަޖު) އެވެ. ރައީސް ކަމަށް ކުރިމަތިލުމަށް ފަހު، އަޖުފާން ވަނީ ގައުމީ ޓީމަށް ކުޅުން ހުއްޓާލަން ނިންމާފައިވާ ކަމަށް ހާމަކޮށްފަ އެވެ.
ބެޑްމިންޓަން އެސޯސިއޭޝަންގެ މިހާރުގެ ހިންގާ ބޯޑު އިންތިހާބު ކުރީ 2021 ވަަނަ އަހަރުގެ ފެބްރުއަރީ 24 ގަ އެވެ. އެ ހިންގާ ބޯޑު ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރީ، 2021، މާޗް 11 ގަ އެވެ. އެހެންކަމުން، މި މަހުގެ 11 އަށް މިހާރު އޮތް ބޯޑުގެ ދައުރު ވަނީ ހަމަވެފަ އެވެ.
ހިންގާ ކޮމިޓީގެ ދައުރު ހަމަވެފައިވާތީވެ، މީގެ އަމަލުކުރަންވީ ގޮތެއްގެ ލަފާ ހޯދަން، މޯލްޑިވްސް އޮލިމްޕިކް ކޮމިޓީ (އެމްއޯސީ)އާ ގުޅިގެން ބައިނަލްއަގުވާމީ ފެޑެރޭޝަނާ މަޝްވަރާ ކުރުމުގެ ކަންކަން ކުރުމަށް ކޮމިޝަނާ އޮފް ސްޕޯޓްސްގެ ބައްދަލުވުމުގައި ވަނީ ބެޑްމިންޓަން އެސޯސިއޭޝަނަށް އަންގައިފަ އެވެ.
