ސެކިއުލާ ދައުލަތެއް (ދައުލަތުން އިސްކަންދޭ ވަކި ދީނެއް ނޯންނަ ދައުލަތެއް) ކަމަށް ވާ ތުރުކީގެ ރައީސް ރަޖަބް ތައްޔިބު އުރުދުޣާން އަކީ "އިސްލާމީ އުއްމަތުގެ އެންމެ އިސް ބޭފުޅާ" ކަމަށް ސިފަކުރައްވައި، ރައީސް ޑރ.މުހައްމަދު މުއިއްޒު އުރުދުޣާން އަށް ހައްދެއް ނެތް ތައުރީފު ކުރައްވައިފި އެވެ.
ސިފައިންގެ ހިދުމަތުގައި ޑްރޯންތައް ބޭނުންކުރަން ފަށަން ނ. މާފަރުގައި ރޭ ބޭއްވި ރަސްމިއްޔާތުގައި ރައީސް ވިދާޅުވީ އުރުދުޣާނަކީ އިސްލާމީ އުއްމަތް އެ ބޭފުޅަކަށް ފަޚުރުވެރިވާ ބޭފުޅެއް ކަމަށެވެ. ރައީސް ވިދާޅުވި ގޮތުގައި ސިފައިންނަށް ޑްރޯންތައް ހޯދުމުގައި އެންމެ ބޮޑު އެއްބާރުލުމެއް ދެއްވީ ތުރުކީގެ ރައީސް އުރުދުޣާން އެވެ.
"މިކަމުގައި އެންމެ ބޮޑު އެއްބާރުލެއްވުމެއް އަޅުގަނޑަށް ދެއްވީ އިސްލާމީ އުއްމަތް އެ ބޭފުޅަކަށް ފަޚުރުވެރިވާ، މިވަގުތު އިސްލާމީ އުއްމަތުގެ އެންމެ އިސް ބޭފުޅެއްގެ ގޮތުގައި އަޅުގަނޑުމެން އެންމެންނަށް ފެންނަ ތުރުކީގެ ރައީސް ރަޖަބް ތައްޔިބު އުރުދުޣާން،" ރައީސް ރޭ ވިދާޅުވި އެވެ.
އެމްއެންޑީއެފް އެއާ ކޯ ގައި މިއަދު ބޭނުންކުރަން ފެށި ބައެއް ޑްރޯންތަކަކީ ތުރުކީ ސަރުކާރުގެ ހިލޭ އެހީގެ ދަށުން ލިބިފައިވާ އާލާތްތަކެއް ކަމަށް ވެސް ރޭގެ ރަސްމިއްޔާތުގައި ރައީސް ވިދާޅުވި އެވެ.
އެމަނިކުފާނު ރޭ މި މޭރުމުން ވާހަކަފުޅުދެއްކެވީ، މިހައިތަނަށް ޑްރޯންތައް ގަތުމާ ގުޅޭ ގޮތުން ކުރެވުނު މުއާމަލާތްތަކާ ބެހޭ އެއްވެސް މައުލޫމާތެއް ހިއްސާނުކުރައްވާ ހުންނެވުމަށް ފަހުގަ އެވެ.
ރައީސް ރޭ ވިދާޅުވި ގޮތުގައި ޑްރޯންތައް ގެނައުމުގެ މަޝްވަރާތައް ފެށުނީ އެމަނިކުފާނު ވެރިކަމާ ހަވާލުވެވަޑައިގެން ތުރުކީއަށް ކުރެއްވި ދަތުރުގެ ތެރެއިންނެވެ. މިކަމުގައި އެންމެ ބޮޑު އެއްބާރުލުމެއް ދެއްވީ ތުރުކީގެ ރައީސް ރަޖަބް ތައްޔިބު އުރުދުގާން ކަމަށް ރައީސް ވިދާޅުވި އެވެ.
"ރައްޔިތުން އަޅުގަނޑާ ޒިންމާ ހަވާލުކޮށް ދެ ހަފުތާ ނުވަނީސް އެ ގައުމަށް އަޅުގަނޑަށް ދައުވަތު ދެއްވާ، އެމަނިކުފާނު އަޅުގަނޑަށް ކިޔުއްވި ހޫނު މަރުހަބާ އާއި ބެހެއްޓެވި ގާތްކަމަކީ އަދި ދެއްވެވި ސަމާލުކަމަކީ މިކަން މިއަދު ހަގީގަތަކަށް ވުމުގެ އަސްލު،" އެމަނިކުފާނު ވިދާޅުވި އެވެ.
ރައީސް ވިދާޅުވީ އަދި ތިން ޑްރޯން ފެންނަން ހުރި ނަމަވެސް މުސްތަގުބަލުގައި އެއަށް ވުރެ މާ ގިނަ ވާނެ ކަމަށެވެ. އަދި މިއީ ވެސް ރައީސް އުރުދުގާންއާ އޮންނަ ގާތްކަމުގެ ތެރެއިން ފަހިވެގެން ދާނެ ކަންކަން ކަމަށް ވިދާޅުވި އެވެ. ބައެއް ޑްރޯންތައް ހިލޭ ލިބުނު ކަމަށް ރައީސް ވިދާޅުވީ މިހެން ވިދާޅުވުމަށް ފަހެވެ.
