ބޭރުގެ އާގު ބޯޓުފަހަރަށް ތެޔޮ އެޅުމާއި ސާވިސް ދިނުމަށް ހިންގަން ނިންމާފައިވާ އިހަވަންދިއްޕޮޅު ބަންކަރިން މަޝްރޫއު ކުރިއަށް އޮތް ދެތިން ހަފްތާ ތެރޭގައި ފަަށައިގަނެވޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް ޑރ. މުހައްމަދު މުއިއްޒު އުތުރުގެ ހަތަރު އަތޮޅަށް މިއަދު ފެއްޓެވި ދަތުރުފުޅުގައި ހއ. ހޯރަފަުއްޓަށް ވަޑައިގެން ބޭއްވި ޖަލްސާގައި މިނިސްޓަރު ސައީދު ވިދާޅުވީ އަންނަ ޖުލައި މަސް ނިމުމުގެ ކުރިން އިހަވަންދިއްޕޮޅުގައި ބަންކަރިން ވިޔަފާރި ފަށައިގަނެވޭނެ ކަމަށެވެ.
"އިރާދަކުރެއްވިއްޔާ ދެތިން ހަފްތާ ތެރޭގައި އަޅުގަނޑުމެންނަށް ދުނިޔޭގެ ޓޮޕް 10 ގައި ހިމެނޭ އެންމެ ވަރުގަދަ އެއް ކުންފުންޏާއެކު ބަންކަރިން ހިދުމަތަށް މި ސަރަަހައްދު ވަންނާނެ، އެކަން އެހިސާބަށް ދިޔައިމަ ކުރިއަށް އޮތް ދެ ތިން މަސްތެރޭގެ، އަޅުގަނޑުމެން އުއްމީދު މި ކުރަނީ ޖުލައި މަސް ނިމުމުގެ ކުރިން މިތާ އެ ވިޔަފާރި ފަށައިގަނެވޭނެ ކަމަށް،" ސައީދު ވިދާޅުވި އެވެ.
އިހަވަންދިއްޕޮޅު ގައި ބަންކަރިން ހިދުމަށް ފެށުމަށް ހަވާލުކޮށްފައިވަނީ ގަތަރުގެ އާބަކޮން ޓްރޭޑިން އެންޑް ކޮންޓްރެކްޓިން ކުންފުންޏާ އެވެ. ރާއްޖޭގެ އެންމެ މަތީފަންތީގެ އެއް ރިސޯޓު، ވޮލްޑޯފް އެސްޓޯރިއާ އިތާފުށި ރިސޯޓު، ޑިޒައިން އެންޑް ބިލްޑު އުސޫލުން ތަރައްގީކުރި ގަތަރުގެ އާބަކޮންއަކީ އިމާރާތްކުރުމުގެ ދާއިރާގައި މެދުއިރުމަތީގެ އެންމެ ފުއްނާބު އުސް އެއް ކުންފުންޏެވެ.
ސައީދު ވިދާޅުވީ ބަންކަރިން ހިދުމަތް ފެށުމުން ވަޒީފާތައް އުފެދި ކުދި އަދި މެދުފަންތީގެ ވިޔަފާރިތަކަށް ވިޔަފާރި ފުރުސަތު ތަނަސްވެ ރާއްޖޭގެ އާމްދަނީ އިތުރުވާނެ ކަމަށެވެ. އަދި އެއާއެކު ރާއްޖެއަށް ބޭރު ފައިސާ ވަންނާނެ ބޮޑު ދޮރެއް މި މަޝްރޫއާ އެކީ ހުޅުވޭނެ ކަމަށް އޭނާ ވިދާޅުވި އެވެ.
އޭގެ އިތުރުން "މޯލްޑިވްސް އިކޮނޮމިކް ގޭޓްވޭ"ގެ ނަމުގައި ހޯރަފުށި ފަޅުތެރޭގައި ކުރިއަށްގެންދާ މަޝްރޫއަށް ބޭނުންވާ ބިން ހިއްކުން މި އަހަރުތެރޭ ފަށައިގަންނާނެ ކަމަށް ވިދާޅުވި އެވެ.
"އެކަމަށް ފައިސާ ހޯދުމަށް އަޅުގަނޑުމެން މިދަނީ ޔޫރަޕިއަން ބޭންކަކާ ވާހަކަ ދައްކަމުން، އަދި އޭގެ ކުރިމަގު އިރާދަކުރެއްވިއްޔާ އަޅުގަނޑުމެންނަށް އެބަފެނޭ،" ސައީދު ވިދާޅުވި އެވެ.
ބަންކަރިން މަޝްރޫއާ ގުޅޭގޮތުން އެސްޓީއޯއިން ކުރިން ހާމަކޮށްފައިވާ މައުލޫމާތަށް ބަލާއިރު ރާއްޖޭގެ އެންމެ އުތުރުން އޮންނަ އިހަވަންދިއްޕޮޅު އަތޮޅު އޮންނަނީ އިންޑިއާ ކަނޑުގެ މާލީ މުއާމަލާތްތައް ހިނގާ ޝިޕިންގެ އިރުމައްޗަށް އަދި ހުޅަނގަށް ދަތުރުކުރާ މައި މަގުގަ އެވެ. އަދި އެ ސަރަހައްދުން ދުވާލަކު 300 އަށް ވުރެ ގިނަ ބޮޑެތި އާގުބޯޓު ހުރަސް ކުރެއެވެ.
