މާލެ އާއި ރަސްމާލެ ޒަމާނީ ވަސީލަތްތަކުން ދަތުރުފަތުރުގެ ނިޒާމަކުން ގުޅައިލެވޭނެ ކަމަށާއި އެ ގޮތުން ކަނޑުއަޑީގެ މަންޒަރުތައް ފެންނާނެ ފަދަ ޓަނަލަކުން ދެ ރަށް ގުޅުވާލަން ރައީސް ޑރ. މުހައްމަދު މުއިއްޒު ވައުދުވެއްޖެ އެވެ.
މާލެ ސިޓީގެ އާ މޭޔަރު އާދަމް އާޒިމް ވަނީ ކެމްޕެއިނު ދުވަސްވަރު މާލެއާ ކައިރި ފަޅުތައް ހިއްކުމުގެ މަސައްކަތް ނިންމައި އެ ރަށްރަށް އާބާދު ކުރުމުގެ މަސައްކަތް އެއްކޮށް ނިންމުމުގެ ކުރިއަށް ފުށިދިއްގަރުފަޅު ހިއްކައި ރަސްމާލެ ނަމުގައި އަވަށެއް ތަރައްގީ ކުރާތީ އެ ސިޔާސަތަށް ފާޑުވިދާޅުވެފަ އެވެ.
އާ މޭޔަރު ހުވާ ކުރުމަށް ދަރުބާރުގޭގައި ބޭއްވި ރަސްމިއްޔާތުގައި ވާހަކަ ދައްކަވަމުން މުއިއްޒު ވިދާޅުވީ އެ ކަމަށް ގާބިލްކަން ހުރި ކުންފުނިތަކާ މަޝްވަރާކޮށް އޭގެ ފީޒިބިލިޓީގެ މަސައްކަތް ވެސް މިހާރު ހިނގަމުންދާ ކަމަށެވެ.
"އެ ޓަނަލް ވެގެންދާނީ އެ ޓަނަލްގައި ދުއްވާ ޓްރެއިން (ރޭލު) ގައި ދާއިރުގައި ކަނޑު އަޑީގެ ރީތި މަންޒަރުތައް ވެސް ފެންނަ ޓަނަލަކަށް، އެތައް މިލިއަން ޓުއަރިސްޓުން އިތުރު ވެގެން ދާނެ މަޝްރޫއަކަށް، އަޅުގަނޑުމެން ގެންދާނީ ފޭރާން ހެޔޮ ސިޔާސަތެއް،" ރައީސް މުއިއްޒު ވިދާޅުވި އެވެ.
އެމަނިކުފާނު ވިދާޅުވި ގޮތުގައި މާލޭގެ ރައްޔިތުންނަށް ބޭނުން ޖެހިފައިވާ ގެދޮރު ފޯރުކޮށްދެވެން އަންނަނީ ގިރާވަރުފަޅާއި ގުޅީފަޅާއި އުތުރުތިލަފަޅުގެ އިތުރަށް ފުށިދިއްގަރުފަޅު ވެސް ހިއްކައި އެ ހުރިހާ ސަރަހައްދަކުން ގެދޮރު ދިނުމުންނެވެ.
