ބޮޑެތި އުމްރާނީ ތަރައްގީގެ މަޝްރޫއުތަކާއި ދަތުރުފަތުރުގެ ހިދުމަތް ފޯރުކޮށްދިނުމަށް އުފައްދާފައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީން ކުރާ މަސައްކަތްތައް ކުރާ އިތުރު ކުންފުންޏެއް އުފައްދަން ސަރުކާރުން ނިންމައިފި އެވެ.
ސަރުކާރުގެ މި ނިންމުން އިއުލާންކުރައްވަމުން ރައީސް އޮފީހުގެ ޕްރިންސިޕަލް ސެކެޓްރީ އޮން ޕަބްލިކް ޕޮލިސީ އަބްދުﷲ ނާޒިމް އިބްރާހިމް ވިދާޅުވީ މިކަމާ މެދު ކެބިނެޓުގައި މަޝްވަރާ ކުރެވުނީ އެމްޓީސީސީއާ ހަވާލުކޮށްފައިވާ މަސައްކަތްތައް ފުނިޖެހިފައިވާތީ އެވެ.
"އެނގިވަޑައިގަންނަވާނޭ ފަދައިން އެމްޓީސީސީގައި ވަރަށް ގިނަ މަސައްކަތްތަކެއް މިހާރު ވަނީ ފުނިޖެހިފައި. އެބޭފުޅުންނަށް ކުރެވޭ ވަރަށް ވުރެ މަސައްކަތްތަކުގެ އަދަދު ގިނަވެ، މަސައްކަތްތައް ބޮޑުވެފައި ވާތީވެ އެކަމަށް ހައްލެއް ހޯދުމުގެ ގޮތުން ކުރެވުނު މަޝްވަރާއެއް މަޝްވަރާއަކީ،" އޭނާ ވިދާޅުވި އެވެ.
މީގެ ކުރިން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވީ އެމްޓީސީސީއާ ހަވާލުކޮށްފައިވާ 46 މަޝްރޫއެއް ހުއްޓިފައިވާ ކަމަށެވެެ. އޭގެ ތެރޭގައި ރަށްރަށުގެ ބިންހިއްކުމާއި މަގު ހެދުމާއި ބަނދަރު ހެދުމުގެ މަސައްކަތްތައް ހިމެނެ އެވެ.
ނާޒިމް ވިދާޅުވި ގޮތުން ނަމަ ސަރުކާރުން އައު ކުންފުންޏެއް އުފެއްދުމުގެ ފަހަތުގައިވާ މަގުސަދަކީ އެމްޓީސީސީއަށް ނުތަކާ ވަރަށް ޕްރޮޖެކްޓުތައް ދިނުމާ ގުޅިގެން މަޝްރޫއުތަކުގެ މަސައްކަތްތައް ހުއްޓިފައި ވާތީ، މި މަޝްރޫއުތަކުގެ ހިންގުން އަވަސްކުރުމެވެ.
އެމްޓީސީސީއަކީ ދިވެހި ދައުލަތުން މެޖޯރިޓީ ހިއްސާވާ ޕަބްލިކް ކުންފުންޏެކެވެ.
