އިޒްރޭލު ޕާސްޕޯޓު މަނާކޮށް، އެ ގައުމުގެ ފަތުރުވެރިން ރާއްޖެ އައުން ހުއްޓުވަން ރައްޔިތުންގެ މަޖިލީހުން ކުރަމުންދާ ކަންކަމަށް ފާރަވެރިވެ، ފަސްޖެހުމެއް ނެތި ސަރުކާރުން އަޅަން ޖެހޭ ފިޔަވަޅުތައް އަޅުއްވާނެ ކަމަށް ރައީސުލްޖުހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އިޒްރޭލު ޕާސްޕޯޓު މަނާކުރުމުގެ މަސައްކަތް ރައްޔިތުންގެ މަޖިލީހުން ފެށީ އޮކްޓޯބަރު 7، އިން ފެށިގެން އެ ގައުމުން ފަލަސްތީނަށް ދެމުންދާ ހަމަލާތަކާ ގުޅިގެންނެވެ. މި ލާއިންސާނީ ހަމަލާތަކުގައި ފަލަސްތީނުގެ ގިނަ އަދަދެއްގެ ކުޑަކުދިން ހިމެނޭހެން އެތައް ބަޔަކު މަރާލާފައިވާއިރު، އިޒްރޭލާ ދެކޮޅު އަޑުތައް ރާއްޖޭގައި އިންތިހާއަށް ގަދަ އެވެ.
ރައްޔިތުންގެ މަޖިލީހުގައި އިޒްރޭލު ޕާސްޕޯޓު މަނާކުރަން ތިން ކަމެއް އެބަ ކުރެވެ އެވެ.
އެއީ މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް ހާރިޖީ ގުޅުންތަކުގެ ކޮމިޓީއަށް ހުށަހަޅުއްވާފައިވާ ސިޓީ އާއި ވިލިނގިލި ދާއިރާގެ މެންބަރު ސައުދު ހުސައިން ހުށަހެޅުއްވާފައިވާ ގަރާރަކާއި ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ (މޮސްޓާ) އިމިގްރޭޝަން ގާނޫނަށް ހުށަހަޅުއްވާފައި އިސްލާހެއްގެ މަސައްކަތެވެ.
ގަރާރުގެ މަސައްކަތް ކޮމިޓީ މަރުހަލާގައި އޮތް އިރު، ހައިތަމް ފޮނުވި ސިޓީގެ މައްސަލައިގައި ހާރިޖީ ގުޅުންތަކުގެ ކޮމިޓީން ނިންމީ އިޒްރޭލު ފަތުރުވެރިން ރާއްޖެ އައުން މަނާކުރުމަށް ދިވެހި ސަރުކާރަށް ލަފާ އެރުވުމަށެވެ.
ރައީސް މުއިއްޒު ވަނީ މަޖިލީހުގެ ލަފާ އެޓާނީ ޖެނެރަލް އޮފީހަށް ލިބިފައިވާ ކަން ހާމަކުރައްވާފަ އެވެ. އަދި "ސީރިއަސް ކަމެއްގެ ގޮތުގައި" އެކަމާ ގުޅިގެން އަޅަން ޖެހޭ ފިޔަވަޅުތައް އަޅުއްވާނެ ކަމަށް އެމަނިކުފާނު ވިދާޅުވި އެވެ.
"އެ ގަރާރު ދިރާސާކޮށްފައި ސަރުކާރުގެ އިލްތިމާސެއް، މަޖުބޫރުވާ ކަމެއް ނުވަތަ ކުރަން ޖެހޭ ކަމެއް އޮވެއްޖެއްޔާމުން ވަގުތުން އެ ފިޔަވަޅު އަޅާނަން. އަދި އެކަން އަޅުގަނޑުމެން ކެބިނެޓާ ހަމައަށް ވެސް ގެންނާނަން،" ރައީސް މުއިއްޒު ވިދާޅުވި އެވެ.
ފާހަގަކޮށްލަން ޖެހޭ ގޮތުގައި ގަރާރެއް ލިބިވަޑައިގެންނެވި ކަމަށް ރައީސް ވިދާޅުވި ނަމަވެސް ގަރާރުގެ މަސައްކަތް އަދި އޮތީ ކޮމިޓީގަ އެވެ. މިހެންކަމުން ގަރާރެއް ކަމަށް ރައީސްއަށް ވިދާޅުވެވުނީ އޮޅުމަކުން ކަމަށް ބެލެވެ އެވެ.
އިޒްރޭލު ޕާސްޕޯޓު މަނާކުރަން ރައީސްއަށް ލަފާދޭން ހާރިޖީ ގުޅުންތަކުގެ ކޮމިޓީން ފާސްކުރީ ގާނޫނު އަސާސީގެ 115 ވަނަ މާއްދާގެ މ. އާ ހަވާލާދީ އެވެ. އެއީ ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތައް ބަޔާންކުރާ މާއްދާ އެވެ.
ކޮމިޓީން ރިއާޔަތްކުރާ އަކުރުގައި ވަނީ "ދިވެހިރާއްޖޭގެ ހާރިޖީ ސިޔާސަތު ކަނޑައަޅައި، ހިންގައި، އެ ސިޔާސަތު ހިނގާނުހިނގާ ގޮތް ބަލައި، ބޭރު ގައުމުތަކާއި ބައިނަލްއަގުވާމީ ޖަމްއިއްޔާތަކާއެކު ގުޅުން ގާއިމްކޮށް ދެމެހެއްޓުން" އަކީ ރައީސްއަށް ލިބޭ ބާރެއް ކަމަށެވެ.
