ރިއޯ ޑި ޖަނެއިރޯ، ބްރެޒިލް (ނޮވެމްބަރު 19) - ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިންގް، ވިނީޝިއުސް ޖޫނިއާ އަށް މި އަހަރުގެ ބާކީ ބައިގައި ނުކުޅެވޭނެ ކަމަށް ރެއާލުން ހާމަކޮށްފި އެވެ.
ވިނީޝިއުސް، 23، ގެ ފަލަމަސްގަނޑަށް އަނިޔާވީ މިދިޔަ ހަފްތާގައި ބްރެޒިލުން ފީފާ ވޯލްޑް ކަޕް ކޮލިފައިންގައި ކޮލަމްބިއާއާ ވާދަކޮށް ބަލިވި މެޗުގަ އެވެ. އެ މެޗުގައި ވިނީޝިއުސް އަށް އަނިޔާވެގެން، މެޗަށް ފަހު ހެދި ޓެސްޓްތަކަށް ފަހު، އޭނާ ވަނީ ޓީމުގެ ކޭމްޕް ދޫކޮށްލައި، ރެއާލްގެ މެޑިކަލް ޓީމާ އެކު ފަރުވާގެ ކަންކަން ފަށައިފަ އެވެ.
ރެއާލްގެ މެޑިކަލް ޓީމުން ހެދި ފުރަތަމަ ޓެސްޓްތަކުން ހޯދުނު ހޯދުންތަކަށް ބަލާއިރު، ވިނީޝިއުސްގެ ފަލަމަސްގަނޑަށް ލިބިފައިވަނީ ހީކުރި ވަރަށް ވުރެ ބޮޑު އަނިޔާއެެކެވެ. އެހެންވެ، އިތުރު ޓެސްޓްތަކެއް ކުރިއަށް އޮތް ދުވަސްތަކުގައި ހަދާނެ އެވެ.
މެޑްރިޑްގެ ކުޅިވަރު ދިރާސާކުރާ ނޫސްވެރިއެއް ކަމަށްވާ އަރާންކާ ރޮޑްރީގޭޒް ރިޕޯޓްކުރިގޮތުގައި، ވިނީޝިއުސް އަށް ކުޅުމަށް އެނބުރި އާދެވޭނީ އަންނަ އަހަރުގެ ފެބްރުއަރީ މަހުގަ އެވެ. ރެއާލުން ވެސް ވަނީ ވިނީޝިއުސް ދެ މަހަށް ކުޅުމާ ދުރަށް ދާން ޖެހޭނެ ކަމަށް ބުނެފަ އެވެ.
މި ސީޒަނުގައި ވިނީޝިއުސް އަށް މީގެ ކުރިން ވެސް ފަލަމަސްގަނޑުގެ އަނިޔާއެއް ލިބިފައިވާތީ އެވެ. އެއީ، މި ފަހަރު ރެއާލުން ސެލްޓަ ވިގޯއާ ދެކޮޅަށް ކުޅުނު މެޗުގަ އެވެ. އެ ފަހަރު ލިބުނު އަނިޔާއާ ހެދި ވިނީޝިއުސް އަށް މަހެއްހާ ދުވަހު ކުޅުމާ ދުރުގައި ހުންނަން ޖެހުނެވެ. މި ސީޒަނުގެ މިހާތަނަށް ހުރިހާ މުބާރާތެއްގައި ކުޅުނު 13 މެޗުން ވިނީޝިއުސް ވަނީ ހަ ގޯލު ޖަހައިފަ އެވެ.
