ފައިސާގެ މައްސަލަތަކާ ހެދި މިއަހަރުގެ ދިވެހި ޕްރިމިއާ ލީގުގެ ބާކީ ބައި ނުކުޅެ ލީގުން ވަކިވާން ކްލަބް ވެލެންސިއާ އިން ނިންމައިފި އެވެ.
ރާއްޖޭގެ އެންމެ ކާމިޔާބު އެއް ކުލަބު ކަމަށްވާ ކުލަބް، ވެލެންސިއާ އިން ދިވެހި ޕްރިމިއާ ލީގުގެ ބާކީ ބައި ނުކުޅެ ވަކިވާން ނިންމާފައިވަނީ މާލީ ގޮތުން ކުލަބަށް ދިމާވެފައިވާ ދަތިތަކުގެ ސަބަބުންނެވެ. މީގެ އިތުރުން އަވަސް އަވަހަށް ލީގުގެ ޝެޑިއުލް ބަދަލުވެ، ފުޓްބޯޅަ ސީޒަން ދިގުލައިގެންދާތީ، މާލީ ގޮތުން ފުދުންތެރިކަންނެތި މެޗުތައް ކުޅެން ޖެހިއްޖެނަމަ އެކަމުގެ ސަބަބުން އެ ކުލަބަށް ލިބިދާނެ ގެއްލުންތަކަށް ދުރާލާ ތައްޔާރުވުމުގެ ގޮތުންކަމަށް ބުނެ އެވެ.
ވެލެންސިއާ އިން މިއަދު ނެރުނު ބަޔާނުގައި ބުނެފައިވަނީ އެކުލަބަށް ދިމާވެފައިވާ މަލީ މައްސަލަތައް ދިމާވުމުގައި އެންމެ ބޮޑު އެއް ސަބަބަކީ އެކުލަބަށް ލިބެންޖެހޭ ފައިސާތަކެއް ނުލިބި ހުރުމެވެ. އެ ގޮތުން މިދިޔަ އޮގަސްޓް މަހު ފުރަތަމަ ޑިވިޝަންގެ އަށް ކުލަބަށް ރައީސުލްޖުމްހޫރިއްޔާ ދެއްވަން ނިންމެވި ފައިސާގެ ބޮޑު ބައި އެކުލަބަށް ނުލިބެ އެވެ.
އެއް މިލިއަން ރުފިޔާގެ ބަދަލުގައި އެކުލަބަށް ލިބުނީ 250،000 ރުފިޔާ އެވެ. ވެލެންސިއާގެ އިތުރުން ޔުނައިޓެޑް ވިކްޓްރީ، ކުލަބު ގްރީން ސްޓްރީޓްސް އަދި ޓީސީ ސްޕޯޓްސް ކުލަބަށްވެސް ފައިސަ ލިބުނީ މިއަދަދަށެވެ. އަނެއް ހަތަރު ކުލަބަށް އެއް މިލިއަން ރުފިޔާ ޔޫތު މިނިސްޓްރީން ވަނީ ދީފަ އެވެ. މިކަމާ ގުޅޭގޮތުން ވެލެންސިއާ އިން މިނިސްޓްރީ އަށް ސިޓީ ފޮނުވައި އެކަން ސާފުކުރަން މަސައްކަތް ކުރުމުން މިނިސްޓްރީން ދީފައިވާ ޖަވާބަކީ، ބަޖެޓުގެ ތާށިކަން ހުރުމުން ފައިސާ އެއްކޮށް ދެވެން ނެތީ ކަމަށެވެ.
މި ފައިސާގެ އިތުރުން އާ ސީޒަނަށް ތައްޔާރުވުމުގެ ގޮތުން މިނިސްޓްރީ އިން ކުލަބުތަކަށް ދޭން ބުނި ފައިސާ ވެސް އެކުލަބަށް ނުލިބޭކަމަށް ވެލެންސިޔާގެ ބަޔާނުގައި ބުނެފައި އެވެ.
މީގެ އިތުރުން ގައުމީ މުބާރާތު (ޕްރެޒިޑެންޓްސް ކަޕް)ގެ 2022ގެ ޗެމްޕިއަންކަން ހޯދުމުން އިނާމް ފައިސާގެ ގޮތުގައި ލިބެންޖެހޭ 500،000 ރުފިޔާ ވެސް އެ ކުލަބަށް ނުލިބޭކަމަށް ވެލެންސިއާ އިން ބުނެ އެވެ.
ވެލެންސިއާ އިން ބުނީ 2023ގެ ޕްރެޒިޑެންޓްސް ކަޕްގެ ޗެމްޕިއަން، މާޒިޔާ ސްޕޯޓްސް އެންޑް ރެެކްރިއޭޝަން އަށް މިނިސްޓްރީ އިން އިތުރަށް ފައިސާ ދީފައިވާ ކަމަށާއި، ކުލަބުތަކަށް ފައިސާ ދިނުމުގައި މިނިސްޓްރީ އިން "ތަފާތުކުރުން ގެންގުޅޭ" ކަމަށެވެ.
ވެލެންސިއާ އިން ލީގުން ވަކިވުމާ ގުޅޭގޮތުން ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނީ ވެލެންސިއާ އިން ލީގުން ވަކިވާން ނިންމުމުން އެފްއޭއެމް އެމާޖެންސީ ކޮމިޓީ އިން އެކުލަބު ޖޫރިމާނާ ކުރަން ނިންމާފައިވާ ކަމަށެވެ.
މާލީ ހާލަތާ ހެދި ވެލެންސިއާ އަށް ލީގުގައި ކުޅެވެން ނެތް ކަމަށް އެ ކްލަބުން އެފްއޭއެމަށް އަންގާފައިވަނީ މިދިޔަ މަހު 27 ވަނަ ދުވަހު އެވެ. އެފްއޭއެމް އިން އެކަމާ ގުޅިގެން ވެލެންސިއާ އެކު ގިނަ ވާހަކަތަކެއް ދެކެވުނު ކަމަށް އެފްއޭއެމްގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) ވަނީ ވިދާޅުވެފަ އެވެ. އެ ގޮތުން ދެކެވުނު ވާހަކަތަކަށް ބަލައި، ޖަވާ ވިދާޅުވީ، ވެލެންސިއާގައި ހިމެނޭ ގިނަ ކުޅުންތެރިންނަކީ ސްކޫލް ކުދިން ކަމަށްވާތީ ޓެސްޓް ދުވަސްވަރު ވެސް ކުރިމަތީގައި އޮތުމާ އެކު، އެކަށީގެންވާ ވަރަށް ކުޅުންތެރިން ގޮވައިގެން މެޗުތައް ކުޅެވެން ނެތް ކަމަށެވެ.
ވެލެންސިއާ ކުޅެން ހުރި މެޗުތައް ނުހިމަނައި އާ ޝެޑިއުލް އެފްއޭއެމް އިން ނެރެފައިވާއިރު، ލީގުގެ ބާކީ ހުރި މެޗުތައް ކުޅެން ކުލަބު ގްރީން ސްޓްރީޓްސް އިން ބޭނުން ނުވާކަމަށް އަޑުވަނީ ފެތުރިފަ އެވެ. ނަމަވެސް ރަސްމީކޮށް މިކަން އެފްއޭއެމަށް އެކުލަބުން އަންގާފައެއް ނުވެ އެވެ.
