ލޮސް އެންޖެލްސް، ޔުނައިޓެޑް ސްޓޭޓްސް (ޖޫން 7) - ޕީއެސްޖީއާ އެކު ހަދާފައިވާ ކޮންޓްރެކްޓް ހަމަވެ، އެ ޓީމު ދޫކޮށްލަން ނިންމާފައިވާ މަޝްހޫރު ފުޓްބޯޅަ ތަރި ލިއޮނަލް މެސީ ދެން ކުޅޭނީ ޑޭވިޑް ބެކަމްގެ ހިއްސާ އޮންނަ ކްލަބް، އެމެރިކާގެ އިންޓަ މިއާމީ އެފްސީ އަށް ކަމަށް މީޑިއާ ރިޕޯޓްތައް ބުނެފި އެވެ.
ހަތް ފަހަރު ބެލޮންޑިއޯ އެވޯޑް ހޯދާފައިވާ މެސީ، 35، އަލުން ގެންދަން އޭނާގެ ކުރީގެ ކްލަބް ބާސެލޯނާ އިން މަސައްކަތް ކުރަމުންދާއިރު، ސައުދީ އަރަބިއްޔާގެ އަލް ހިލާލް އިން ބޮޑު އާމްދަނީއެއް ލިބޭ ކޮންޓްރެކްޓެއް ވެސް މެސީ އަށް ދޭން އޮތީ ނިންމައިފަ އެވެ.
އޭގެ އިތުރުން ޕީއެސްޖީން ވެސް ކޮންޓްރެކްޓް އާ ކުރަން ހުށަހެޅި ޕްރޮޕޯސަލަށް ނޫނެކޭ ބުނި މެސީ މިހާރު ވިސްނައިގެން ހުރީ ކުރީގެ މަޝްހޫރު ތަރި، ބެކަމްގެ ހިއްސާ އޮންނަ އިންޓަ މިއާމީއާ ގުޅުމަށެވެ.
މީގެ ދެ އަހަރު ކުރިން މެސީ އަށް ބާސެލޯނާ ދޫކޮށްލަން ޖެހުނީ ވެސް އެ ކްލަބްގެ މާލީ ހާލަތު ބޮއްސުންލައިފައި އޮތުމުންނެވެ. އޭރު މެސީގެ ކޮންޓްރެކްޓް އާ ކުރަން ބާސެލޯނާ އިން ކުރި މަސައްކަތް ނާކާމިޔާބުވުމާ އެކު، މެސީ އަށް ޖެހުނީ ޕީއެސްޖީން ލިބިފައި އޮތް ހުށަހެޅުން ގަބޫލުކޮށް އެ ޓީމަށް ބަދަލުވާށެވެ.
ޕީއެސްޖީއާ އެކު މެސީ އާ ކޮންޓްރެކްޓެއް ނަހަދާނެކަން ޔަގީންވި ހިސާބުން އެންމެ ފުރަތަމަ ވެސް މެސީ ހޯދަން މަސައްކަތް ފެށީ ބާސެލޯނާ އިންނެވެ. އެކަމަކު، ސްޕެނިޝް ލީގާ އެކު ބާސެލޯނާ އިން އެ ކްލަބްގެ މާލީ ކަންކަން ހަމަޔަަކަށް އަޅުވައި، މެސީ ހޯދަން އޮތް ފުރުސަތެއް ބަލަން ކުރި އެއްވެސް މަސައްކަތެއްގައި އަލިމަގެއް ނުފެނި އޮއްވައި މެސީ މި ވަނީ ދެން ބަދަލުވާނެ ޓީމަކީ އިންޓަ މިއާމީ ކަމަށް ނިންމައިފަ އެވެ.
މީޑިއާ ރިޕޯޓްތައް ބުނާގޮތުން، ސައުދީގެ އަލް ހިލާލުން މެސީ އަށް ހުށަހެޅި ކޮންޓްރެކްޓްގެ އަގު 500 މިލިއަން ޑޮލަރަށް ވުރެ އިތުރުވާނެ އެވެ. އަލް ހިލާލްގެ އޮފިޝަލުން ޕެރިހަށް ގޮސް މެސީގެ އާއިލާއާ ބައްދަލުކުރި ނަމަވެސް މެސީ ނިންމީ އެ ހުށަހެޅުމަކީ ކެރިއަރަށް މި ވަގުތު އެންމެ ރަނގަޅު ނިންމުން ކަމުގައި ނުވާނެ ކަމަށް ކަމުގައި މީޑިއާތަކުން ވަނީ ރިޕޯޓްކޮށްފަ އެވެ.
މި މަހު، 36 އަހަރު ފުރޭ މެސީ އަށް ޕީއެސްޖީން ހުށަހެޅި ކޮންޓްރެކްޓް ގަބޫލުނުކުރަން އޭނާ ނިންމި އެންމެ ބޮޑު ސަބަބަކީ ފަހަކަށް އައިސް އެ ކްލަބްގެ ސަޕޯޓަރުންގެ ބަޔަކުގެ ހަރަކާތްތައް ހުރި ގޮތުންނެވެ. އެ ގޮތުން، މެޗުތަކުގެ ތެރެއިން މެސީއާ ދެކޮޅަށް ގިނަ ސަޕޯޓަރުންތަކެއް އިސްނަގައިގެން ވަނީ އަޑުގަދަކޮށް ހަދައިފަ އެވެ.
