ޕްރެޒިޑެންޓްސް ކަޕް ފުޓްބޯޅަ މުބާރާތުގައި ބުރު ސްޕޯޓްސް ކްލަބް އަތުން 1-0 އިން މޮޅުވެ، ޓީސީ ސްޕޯޓްސް ކްލަބުން މުބާރާތުގެ ސެމީ ފައިނަލްގެ ޖާގައެއްގެ އުންމީދު ދަމަހައްޓައިފި އެވެ.
ގްރޫޕް ބީގައި ޓީސީ ކުޅުނު ފުރަތަމަ މެޗުން ވަނީ މާޒިޔާ ސްޕޯޓްސް އެންޑް ރެކްރިއޭޝަން އަތުން 2-0 އިން ބަލިވެފަ އެވެ. އެހެންކަމުން ތިން ޓީމު ވާދަކުރާ މި ގްރޫޕުން ސެމީ އަށް ދާ ދެ ޓީމުގެ ތެރޭގައި ހިމެނުމަށް މި މެޗުން އޮތީ ޓީސީ އަށް މޮޅުވުން މަޖުބޫރުވެފަ އެވެ. މި ގްރޫޕުން ސެމީގެ ޖާގަ ލިބޭ ދެ ޓީމެއް ޔަގީންވާނީ އަންނަ ބުރާސްފަތި ދުވަހުގެރޭ މާޒިޔާ އާއި ބުރު ކުޅޭ މެޗުންނެވެ. ސެމީގެ ޖާގައެއް ބޭނުންނަމަ ބުރު އެ މެޗުން މޮޅުވާން ޖެހޭނެ އެވެ.
މިއީ މިދިޔަ އަހަރު ދެ ވަނަ ޑިވިޝަންގެ ޗެމްޕިއަންކަން ހޯދައި، ކޮލިފިކޭޝަނެއް ކުޅެގެން ފުރަތަމަ ޑިވިޝަނަށް ޕްރޮމޯޓްވި ބުރުން ރާއްޖޭގެ އެއް ވަނަ ޑިވިޝަނުގައި ކުޅުނު ފުރަތަމަ މެޗެވެ. މި މެޗުގައި ބުރުގެ ކޯޗަކަށް ހުރީ ޓީސީ ފުރަތަމަ ޑިވިޝަނަށް ޕްރޮމޯޓްކޮށްދިނުމުގެ އިތުރުން އެ ކްލަބަށް ދެ ފަހަރެއްގެ މަތިން ކޯޗުކޮށްދިން މުހައްމަދު ނިޒާމް (ނިޒާމްބެ) އެވެ.
މިދިޔަ ސީޒަނުގައި ވެސް ޓީސީގެ ކޯޗަކަށް ހުރި ނިޒާމްބެގެ އިރުޝާދުގެ ދަށުން މިރޭ ބުރުން ނެރުނު ފުރަތަމަ އެގާރައިގައި ކުރިން ޓީސީ އަށް ކުޅުނު އަލީ އިޝްފާގު ހަސަން މަޖީދު (އިސްޕަ) އާއި މުހައްމަދު ސާމިރު ހިމެނެ އެވެ. ބުރުގެ ފުރަތަމަ އެގާރަ އަށް ބަލާއިރު، ހުރިހާ ކުޅުންތެރިންނަކީ ވެސް ކުރިން ފުރަތަމަ ޑިވިޝަން ކްލަބްތަކަށް ކުޅުނު ކުޅުންތެރިންނެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ނުވަ ވަނަ މިނިޓްގައި ވަނީ ފުރަތަމަ ހާފުގައި ލިބުނު އެންމެ ހުސް ފުރުސަތު ޓީސީ އަށް ލިބިފަ އެވެ. ޓީސީގެ އަބްދުލް ވާހިދު އިބްރާހިމް (ވާޑު) މަތިމަތިން އޭރިއާތެރެއަށް ނެގި ބޯޅަ މެއިން ކޮންޓްރޯލް ކުރުމަށް ފަހު، ޓީސީގެ ފޯވާޑް މުހައްމަދު މުސްލިހު (މުއްޓި) ޖެހި ބޯޅަ ދިޔައީ އަރިމަތިން ބޭރުންނެވެ.
މެޗުގެ ފުރަތަމަ 20 ވަރަކަށް މިނިޓަށް ފަހު، ބުރުން ރަނގަޅަށް ގޭމްގެ ތެރެއަށް ވަދެވޭތޯ ބޯޅަ ހިފަހައްޓައިގެން ކޮންމެ ވެސް ވަރަކަށް ކުޅެން ފެށި އެވެ. އެ ގޮތުން ބުުރުގެ މުހައްމަދު ތަޝްމީން (ތައްތި) އާއި މުހައްމަދު ނާއިމް އަށް އެޓޭކުގައި ބޯޅަތައް ލިބުނަސް ޓީސީ ޑިފެންޑަރުންގެ ތެރެއިން ޖާގައެއް ނުލިބޭތީ ރަނގަޅު އެޓޭކެއް ކުރެވޭ ގޮތެއްނުވި އެވެ. ޓީސީގެ ކީޕަރު ސްރީ ލަންކާގެ ސުޖަން ޕެރޭރާ އަށް ފުރަތަމަ ހާފުގައި މާ ބޮޑު ޕްރެޝަރެއް ކުރިމަތިވެފައިނުވެ އެވެ.
ދެ ވަނަ ހާފް ފެށިގެން ބުރުން ކުރިއަށް ޖެހިގެން ރަނގަޅު ހަމަލާތަކެއް އުފައްދަން މަސައްކަތް ކުރަނިކޮށް، ޓީސީން އަވަސްކޮށް ކުރިއަށް ކުޅުނު ބޯޅައެއްގައި ގޯލު ޖެހި އެވެ. އެ ޓީމުން ލަނޑު ޖެހީ ދެ ވަނަ ހާފުގައި ބަދަލަކަށް ކުޅެން އެރި އައިހަމް ހަމްދޫން (ސްކީ) އެވެ. ބުރުގެ ޑިފެންސް ތެރެއިން ދޫވި ބޯޅަ ހިފައިގެން އޭރިއާތެރެއަށް ވަދެ، އައިހަމް ވަނީ ހަމަޖެހިލައިފައި ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ.
ޓީސީ އަށް ދެ ވަނަ ލަނޑެއް ޖަހައިދީ ލީޑުފުޅާކޮށްދޭން މެޗުގެ 60 ވަނަ މިނިޓްގައި އަހުނަފް މުހައްމަދު ތަސްނީމް (ނަފްކޮ) އަށް ރަނގަޅު ފުރުސަތެއް ލިބުނެވެ. ނަފްކޮ އޭރިއާތެރެއަށް ބޯޅަ ހިފައިގެން ވަދެ، ގޯލަށް ޖަހަން މަސައްކަތް ކުރި ބޯޅަ ބުރުގެ ކީޕަރު ޝައިހާން އަލީ ވަނީ މަތަކޮށްފަ އެވެ. އެ ބޯޅަ ޓީސީގެ އެހެން ކުޅުންތެރިއަކަށް ދީގެން ޖެހުމުގެ ފުރުސަތު ވެސް އޮތެވެ.
އޭގެ ތިން މިނިޓް ފަހުން، ބުރަށް އެއްވަރުކޮށްދޭން ހުސް ފުރުސަތެއް ލިބުނެވެ. އެ ޓީމުގެ މުހައްމަދު ނާއިމް އޭރިއާތެރެއިން ޖެހި ބޯޅަ ޓީސީ ކީޕަރު ސުޖަން ވަނީ މަތަކޮށްފަ އެވެ. މެޗުގެ 75 މިނިޓްގައި ބުރުގެ ތައްތި ޖެހި ބޯޅަ ވެސް ވަނީ ކީޕަރު ސުޖަން ވަނީ ހުއްޓުވައިފަ އެވެ.
މެޗުގެ ފަހު ވަގުތުގައި ބުރުން ވަރަށް ބޮޑަށް ކުރިއަށް ޖެހިގެން ކުޅުނެވެ. އެކަމަކު، ގޯލެއް ޖެހޭގޮތެއްނުވި އެވެ.
އަހުސަން ރަޝީދު (ޗޭ) ބުނީ ފުރަތަމަ މެޗުގައި މާޒިޔާއާ ކުޅުނު ގޮތަށް މި މެޗުގައި ކުޅެން ނުޖެހޭނެކަން އެނގޭ ކަމަށާއި އެހެންވެ، ތައްޔާރުވީ ވެސް މޮޅުވާން ލިބޭ ފުރުސަތުގެ ބޭނުންހިފައި އެކަން ކުރުމަށް ކަމަށެވެ. އަދި ޓީސީގެ ކޮންމެ ކުޅުންތެރިއަކު ވެސް ވަރަށް ރަނގަޅަށް ކުޅުނުކަމަށާއި މި ދެ މެޗަށް ބަލާއިރު، އެންމެ ސަޕްރައިޒިން ކުޅުމެއް ޓީސީން ދެއްކީ ފުލްބެކް، އަހުމަދު މާއިޝް ރަޝީދު (މާއި) ކަމަށް ޗޭ ވަނީ ބުނެފަ އެވެ.
ބުރުގެ ކޯޗު ނިޒާމްބެ ބުނީ ބަލިވީ ހެދުނު އެންމެ ގޯހެއްގެ ސަބަބުން ފަހަތަށް އައި ބޯޅައެއް ކޮޅަށް ވަދެގެން ކަމަށާއި ފުރަތަމަ މެޗާ އަޅާބަލާއިރު ރަނގަޅު ކަންތައްތަކެއް ފެނިގެންދިޔަ ކަމަށެވެ. އިދިކޮޅުގައި އޮތް ޓީސީއާ ބެހޭގޮތުން ނިޒާމްބެ ބުނީ އެ ޓީމުން ދެއްކީ ވަރަށް އޮގަނައިޒް ކުޅުމެއް ކަމަށާއި ބޭނުންވި ކަންތައް ހާސިލްކުރީ މަސައްކަތް ވެސް ކޮށްގެން ކަމަށެވެ.
