ނޭޕާލް ގައުމީ ޓީމުގެ ކޯޗަކަށް އިންޑިއާގެ ސުޕަ ލީގާއި އައި ލީގުގައި މަސައްކަތް ކޮށްފައިވާ އިޓަލީގެ ކޯޗު ވިންޗެންޒޯ އަލްބާޓޯ ހަމަޖައްސައި، އޭނާއާ އެކު މަސައްކަތް ފެށުމުގެ ގޮތުން މި މަހު ތުރީ ނޭޝަންސް އިންޓަނޭޝަަނަލް މުބާރާތެއް ކުޅެން ނިންމައިފި އެވެ.
މި މުބާރާތުގައި ބައިވެރިވަނީ ނޭޕާލްގެ އިތުރުން ބޫޓާނާއި ލާއޯސް އެވެ. މިއީ މީގެ ކުރިން ނޭޕާލުން، 2021 ވަނަ އަހަރު ބަންގްލަދޭޝާއި ބޫޓާނާ އެކު ކުރިއަށްގެންދިޔަ ފޯމެޓަށް ރޭވިފައިވާ މުބާރާތެކެވެ. މުބާރާތް ފަށަން ތާވަލުކޮށްފައިވަނީ މި މަހު 22 ވަަނަ ދުވަހު އެެވެ.
ނުރަނގަޅު ނިންމުންތަކެއްގެ ސަބަބުން ނޭޕާލްގެ ފުޓްބޯޅަ އަށް ގިނަގުނަ ނޭދެވޭ އަސަރުތަކެއް ފާއިތުވި ހަތަރު މަހެއްހާ ދުވަސްތެރޭގައި ކޮށްފައިވާއިރު، ސަރުކާރުގެ އިސްނެގުމާ އެކު ބާއްވާ މި ތުރީ ނޭޝަންސް ކަޕާ އެކު، ނޭޕާލްގެ ފުޓްބޯޅަ ރަނގަޅު މިސްރާބަށް އެޅުވޭނެ ކަމަށް އޯލް ނޭޕާލް ފުޓްބޯލް އެސޯސިއޭޝަން (އަންފާ) އިން ގަބޫލުކުރެ އެވެ.
މީގެ އިތުރުން އާ ކޯޗު، ވިންޗެންޒޯއާ އެކު ނޭޕާލުން މަސައްކަތް ފަށަން ޖެހޭނީ ފުޓްބޯޅައިގެ ފޯރިގަދަ މާހައުލެއްގައި ކަމަށްވާއިރު، އުންމީދަކީ ރަނގަޅު ފޯމެއްގައި އަންނަ ޖޫން މަހު އިންޑިއާގައި ބާއްވާ ސާފް ޗެމްޕިއަންޝިޕަށް ތައްޔާރުވުން ކަމަށް އަންފާގެ އޮފިޝަލަކު، އެ ގައުމުގެ މީޑިއާ އަށް ވަނީ މައުލޫމާތު ދީފަ އެވެ.
2013 ވަަނަ އަހަރު ނޭޕާލުގައި ކުރިއަށްދިޔަ ސާފް ޗެމްޕިއަންޝިޕް ފުޓްބޯޅަ މުބާރާތުގެ ތެރެއިން ރާއްޖެ އާއި ބޫޓާން ކުޅުނު މެޗުގެ ތެރެއިން.
ތިން އަހަރެއްހާ ދުވަސް ފަހުން ބޫޓާން ބައިނަލްއަގުވާމީ ފުޓްބޯޅަ އަށް
ކޮވިޑް-19ގެ ސަބަބުން ދެކުނު އޭޝިއާ ސަރަަހައްދުގެ ގައުމުތަކުގެ ފުޓްބޯޅަ އަށް ވަނީ ގިނަ ގުނަ ބަދަލުތަކެއް އަތުވެފަ އެވެ. އޭގެތެރެއިން އެންމެ ބޮޑު ގޮންޖެހުންތަަކަކާ ކުރިމަތިލީ ބޫޓާން އެވެ.
އެ ގޮތުން، ބޫޓާނުން އެންމެ ފަހުން ބައިނަލްއަގުވާމީ މެޗެއް ކުޅެފައިވަނީ 2019 ވަނަ އަހަރު ވޯލްޑް ކަޕް ކޮލިފައިން މެޗެއްގައި ގުއާމާ ދެކޮޅަށެވެ. ކޮވިޑް-19އާ ހެދި 2021 ވަނަ އަހަރު ރާއްޖޭގައި ހޯސްޓްކުރި ސާފް ޗެމްޕިއަންޝިޕްގައި ބޫޓާން ނުކުޅެ އެވެ.
ބޫޓާން ފުޓްބޯޅަ ފެޑެރޭޝަނުން މިހާރު ވަނީ މި މަހު ނޭޕާލުގައި ބާއްވާ ތުރީ ނޭޝަންސް ކަޕްގައި ކުޅޭނެ ކަމަށް އިއުލާނުކޮށްފަ އެވެ. އޭގެ އިތުރުން ޖޫން މަހު އިންޑިއާގައި ބާއްވާ ސާފް ޗެމްޕިއަންޝިޕުން ވެސް ބޫޓާން ފެންނާނެ ކަމަށް އިއުލާނުކޮށްފައިވާއިރު، އޭގެ އިތުރުން ބައިނަލްއަގުވާމީ އެކުވެރިކަމުގެ މެޗުތަކެއް ކުޅެން ވެސް ބޫޓާނުން ވަނީ ނިންމައިފަ އެވެ.
ދެކުނު އޭޝިއާގެ އެހެން ގައުމުތަކުގެ ފުޓްބޯޅައިގެ ކަންކަމަށް ބަލާއިރު، މި މަސް ތެރޭ ޕާކިސްތާނާއި ރާއްޖޭން އެކުވެރިކަމުގެ މެޗެއް ކުޅެން ވަނީ ރާވައިފަ އެވެ. ޖޫން މަހު ސާފް ޗެމްޕިއަންޝިޕް ހޯސްޓްކުރުމުގެ ކުރިން އިންޑިއާ އިން ހީރޯ އިންޓަ ކޮންޓިނެންޝިއަލް ކަޕްގެ ނަމުގައި މުބާރާތެއް ބޭއްވުމަށް އަންނަނީ ތައްޔާރުވަމުންނެވެ.
