ލޮސް އެންޖެލްސް، ޔުނައިޓެޑް ސްޓޭޓްސް (ފެބްރުއަރީ 9) - ދުނިޔޭގެ އެންމެ ފޯރިގަދަ ބާސްކެޓްބޯޅަ ލީގު ކަމަށްވާ، ނެޝަނަލް ބާސްކެޓްބޯލް ލީގު (އެންބީއޭ) ގައި އެންމެ ގިނަ ޕޮއިންޓް އެއްކުރުމުގެ ރެކޯޑް ލޮސް އެންޖެލްސް (އެލްއޭ) ލޭކާސް އަށް ކުޅެމުން އަންނަ ތަރި، ލެބްރަން ޖޭމްސް، މުގުރާލާފައިވާއިރު، އޭނާގެ ނަން އަބަދުވެސް ރެކޯޑް ފޮތުގައި އޮންނާނެ ކަމަށް ބާސްކެޓްގެ ތަޖުރިބާކާރުން ބުނެފި އެވެ.
އެމެރިކާގެ މަޝްހޫރު ކުރީގެ ކުޅުންތެރިޔާ، ކަރީބް އަބްދުލް-ޖައްބާރު، އަތުގައި އެންމެ ގިނަ ޕޮއިންޓް އެއްކުރުމުގެ ރެކޯޑް އޮތީ، 38،387 ޕޮއިންޓާ އެކު އެވެ. އިއްޔެ، ލެބްރަން ޖޭމްސް، 38، އެ ރެކޯޑް މުގުރާލީ، އޮކްލަހޯމާ ސިޓީ އަތުން 133-130 އިން ލޮސް އެންޖެލްސް ލޭކާސް ބަލިވި މެޗުގަ އެވެ. އެ މެޗުގައި ލެބްރަން ޖޭމްސް ވަނީ ޖުމްލަ އެކު 38 ޕޮއިންޓް އެއްކޮށްފަ އެވެ.
ކަރީމް، އެންމެ ފުރަތަމަ އެންބީއޭގެ ރެކޯޑް ހެދީ 1984 ވަނަ އަހަރު އެވެ. އެއީ، ލެބްރަން ޖޭމްސް އުފަން ވުމުގެ އަށް މަސް ކުރިންނެވެ. ކަރީމް ކެރިއަރު ނިންމާލިއިރު، 1989 ގައި ވަނީ 1560 މެޗުން 38،387 ޕޮއިންޓް އެއްކޮށްފަ އެވެ. އެ ރެކޯޑް ލެބްރަން ޖޭމްސް މި މުގުރާލީ 1410 މެޗުންނެވެ.
ރެކޯޑް މުުރާލުމާ އެކު ލެބްރަން ޖޭމްސް (ކ) އަށް ހާއްސަ ކުރި ވަގުތުގައި ކަރީމް އޭނާ އަށް ބޯޅަ ހަވާލުކުރަނީ.
ލިވަޕޫލްގެ މައިނޯރިޓީ ހިއްސާދާރެއްގެ ގޮތުގައި ހުރި ލެބްރަން ޖޭމްސް، ތާރީހީ މި ރެކޯޑް މުގުރާލުމުން، އޭނާ އަށް ކޯޓުމަތީގައި މަރުހަބާ ކިއުމުގައި ކަރީމް ވެސް ބައިވެރިވި އެވެ.
އެންމެ ގިނަ ޕޮއިންޓް އެއްކުރުމުގެ ލިސްޓުގެ ކުރިގައި އޮތީ ލެބްރަން ޖޭމްސް އާއި ކަރީމް އެވެ.
މި ލިސްޓުގެ ތިން ވަނައިގައި އޮތީ 36،928 ޕޮއިންޓް ހޯދާފައިވާ ކާލް މަލޯނީ އެވެ. ހަތަރެއްގައި އޮތީ 2020 ވަނަ އަހަރު މަރުވި، މަޝްހޫރު ލެޖެންޑް، ކޯބީ ބްރަޔަންޓް އެވެ. ބްރަޔަންޓް ވަނީ އޭނާގެ ކާމިޔާބު ކެރިއަރުގައި 33،643 ޕޮއިންޓް އެއްކޮށްފަ އެވެ. ގަދަ ފަހެއްގެ ފަހު ޖާގަ ލިބެނީ، 32،292 ޕޮއިންޓް ހަމަކޮށްފައިވާ ތަރި، މައިކަލް ޖޯޑަން އަށެވެ.
ރެކޯޑް ފޮތުގައި ލެބްރަން ޖޭމްސްގެ ނަން ތާއަބަދަށް އޮންނާނެ ކަމަށް ބާސްކެޓްބޯޅައިގެ ތަޖުރިބާކާރުން ބުނާއިރު، މަޝްހޫރު ގިނަ ކުޅުންތެރިން ވަނީ ލެބްރަން ޖޭމްސްގެ މި ކާމިޔާބީގައި އޭނާ އަށް މަރުހަބާ ކިޔައިފަ އެވެ. ލެބްރަން ޖޭމްސް އަކީ ބާސްކެޓްބޯޅައިގެ ތާރީހުގައި ވެސް ފެނިގެންދިޔަ އެންމެ މޮޅު ކުޅުންތެރިޔާ، ގްރޭޓަސްޓް އޮފް އޯލް ޓައިމް (ގޯޓް) ކަމަށް ވެސް ބައެއް ކުޅުންތެރިން ވަނީ ބުނެފަ އެވެ.
