އިދިކޮޅު ލީޑަރު، ކުރީގެ ރައީސް އަބްދުﷲ ޔާމީން އަބްދުލް ގައްޔޫމް މިނިވަން ކުރުމަށް ގޮވާލާ މިރޭ ކުރިއަށް ގެންދިޔަ މުޒާހަރާގެ ތެރެއިން މާވަށު ދާއިރާގެ މަޖިލިސް މެންބަރު މުހައްމަދު ސައީދު ހިމެނޭހެން 17 މީހުން ހައްޔަރުކޮށްފި އެވެ.

އިދިކޮޅުން މިހާރު ސިލްސިލާ ކޮށް ކުރިއަށް ގެންދަން ފަށާފައިވާ މުޒާހަރާ މިރޭ ވެސް ފަށާފައިވަނީ މަޖީދީ މަގުންނެވެ. މުޒާހަރާ ފެށިގެން މާ ގިނައިރު ތަކެއް ނުވަނީސް ފުލުހުން ވަނީ މުޒާހަރާ ރޫޅާލުމުގެ މަސައްކަތް ފަށައިފަ އެވެ.

ސައީދުގެ އިތުރުން މުޒާހަރާގެ ތެރެއިން 16 މީހުން ހައްޔަރުކޮށްފައިވާ ކަމަށް ޕީޕީއެމްގެ ތަރުޖަމާނު ހީނާ ވަލީދު ވަނީ ވިދާޅުވެފަ އެވެ. އެހެންނަމަވެސް ހައްޔަރުކޮށްފައިވާ މީހުންގެ ޖުމްލަ އަދަދު ފުލުހުން ހާމަކޮށްފައި ނުވެ އެވެ.

މިރޭގެ މުޒާހަރާގައި ވެސް ޕީޕީއެމްގެ މަތީފަޑީގެ ގިނަ އަދަދެއްގެ ބޭފުޅުން ބައިވެރިވި އެވެ. އެގޮތުން ޕީއެންސީގެ ރައީސް އަބްދުއްރަހީމް އަބްދުﷲ އާއި މާލެ ސިޓީ މޭޔަރު ޑރ. މުހައްމަދު މުއިއްޒާއި ޕީޕީއެމްގެ ނައިބު ރައީސް އަހުމަދު ޝިޔާމުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) ހިމެނެ އެވެ.

ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ، ޔާމީން 11 އަހަރަށް ޖަލަށް ލުމަށް ކްރިމިނިލް ކޯޓުން ހުކުމް ކުރީ އާދިއްތަ ދުވަހުގެ އިރުއޮއްސުމަށް ގާތްވެފައި އޮއްވަ އެވެ. އެއާއެކު ގިނަ އިރުތަކެއް ނުވެ، ކަރެކްޝަންސްގެ ބެލުމުގެ ދަށުން ޔާމީން މާފުށީ ޖަލަށް ގެންދިޔަ އެވެ.

ސިލްސިލާކޮށް މުޒާހަރާތައް ކުރިއަށް ގެންދިއުމުގެ އިތުރަށް އަންނަ ހުކުރު ދުވަހު ބޮޑު މުޒާހަރާއެއް ކުރުމަށް ޕީޕީއެމުން ވަނީ ނިންމާފަ އެވެ. ހުކުރު ދުވަހުގެ ހަރަކާތް ހުރިހާ ރަށެއްގައި ވެސް ހަވީރު 4:00 ގައި ފަށަން ހަމަޖެހިފައިވާއިރު، މާލޭގައި މުޒާހަރާ ފަށާ ސަރަހައްދެއް ފަހުން އިއުލާން ކުރާނެ ކަމަށް އެ ޕާޓީން ވަނީ ބުނެފަ އެވެ.